ގަތަރުގެ މައްސަލައަށް ހައްލު ހޯދުމަށްޓަކައި އެެމެރިކާގެ ޚާރިޖީ ވަޒީރު ކުވައިތުގައި މަޝްވަރާތައް ބާއްވަވައިފި
ކުވައިތުން ދަނީ ގަތަރުގެ މައްސަލައަށް ހައްްލު ހޯދުމަށްޓަކައި މެދުވެރިއެއްގެ ރޯލް އަދާކުރަމުން
އެމެރިކާގެ ސެކްރެޓަރީ އޮފް ސްޓޭޓް ރެކްސް ޓިލާސަން
ގަތަރުގެ މައްސަލައަށް ހައްލެއް ހޯދުމަށްޓަކައި އެމެރިކާގެ ސެކްރެޓަރީ އޮފް ސްޓޭޓް ރެކްސް ޓިލާސަން ކުވައިތުގައި މަޝްވަރާތައް ބާއްވަވައިފިއެވެ.
ގަލްފް ސަރަހައްދަށް ޓިލާސަން ކުރައްވަމުން ގެންދަވާ ހަތަރު ދުވަހުގެ ދަތުރުފުޅުގައި ގަތަރާއި އަދި ސައުދީ އަށް ވެސް ޒިޔާރަތް ކުރައްވަފާނެ ކަމަަށް ރިޕޯޓުތައް ބުނެއެވެ.
ކުވައިތަށް ކުރައްވަމުން ގެންދަވާ ދަތުރުފުޅުގައި ޓިލާސަން ވަނީ ކުވައިތުގެ އަމީރު ޝެއިޚް ސަބާހް އަލް-އަހްމަދު އަލް-ސަބާހް އާއި އަދި ކުވައިތުގެ އެހެނިހެން އިސް އޮފިޝަލުންނާ ހޯމަ ދުވަހުގެ ރޭ ބައްދަލު ކުރައްވާފައެވެ. މި ބައްދަލު ކުރެއްވުމުގައި ޓިލާސަން އަށް ކުވައިތުގެ އަމީރު ވިދާޅުވި ކަމަށް މީޑިއާ ރިޕޯޓުތައް ބުނެފައި ވަނީ، އެބޭފުޅުން މަސަައްކަތްޕުޅު ކުރައްވަމުން ގެންދަވަނީ ހަމައެކަނި އެބޭފުޅުންނާއި ގުޅޭ މައްސަލައެއް ހައްލު ކުރެއްވުމަށް ނޫން ކަމަށާއި އެބޭފުޅުން މަސައްކަތް ކުރައްވަނީ މުޅި ދުނިޔެއާ ގުޅިފައިވާ މައްސަލައެއް ހައްލު ކުރެއްވުމަށް ކަމަށެވެ.
ގަތަރުން ޓެރަރިޒަމަށް ހިތްވަރު ދޭ ކަމަށް ބުނެ ގަތަރާ އޮންނަ ޑިޕްލޮމިޓިކް ގުޅުން އަރަބި ހަ ގައުމަކުން ވަނީ ކަނޑާލާފައެވެ. އެ ގައުމުތަކަކީ ސައުދީ އަރަބިއްޔާ، ޔޫއޭއީ، މިސްރު، ބަހްރައިން, ޔަމަން އަދި ލީބިއާއެވެ. ގަތަރާ މެދު ކުރެވޭ އެންމެހާ ތުހުމަތުތައް ގަތަރުން ދޮގު ކުރެއެވެ. ޑިޕްލޮމެޓިކް ގުޅުން ކަނޑާލި ގައުމުތަކުން ދަނީ ގަތަރަށް އެކި ގޮތްގޮތުން ފިއްތުންތައް ކުރިމަތި ކުރަމުންނެވެ.
ދާދިފަހުން ސައުދީ، ޔޫއޭއީ، ބަހްރައިން އަދި މިސްރުން ވަނީ ގަަތަރަށް 13 ޑިމާންޑެއް ވެސް ކޮށްފައެވެ. ގަތަރުން ވަނީ އެ ޝަރުތުތަައް ގަބޫލު ނުކޮށްފައެވެ. ގަތަރާއި ގުޅުން ކަނޑާލައިފައިވާ ހަތަރު ގައުމަކުން ގަތަރަށް ކޮށްފައިވާ ޑިމާންޑްތަކަށް ބޯނުލެނބުމުގެ ސަބަބުން ގަތަރަށް އިތުރު ފިއްތުންތައް ކުރިމަތި ކުރާނެ ކަމަށް ވެސް އެގައުމުތަކުން ވަނީ ބުނެފައެވެ.
