ޕެރިސް އެގްރީމެންޓުން އެމެރިކާ ބޭރުވާނެކަން ރަސްމީކޮށް އިއުލާން ކޮށްފި

މޫސުމަށް އަންނަ ބަދަލުތައް ކުޑަކުރުމަށް ދުނިޔޭގެ ގަައުމުތަކުން ޕެރިހުގައިވި އެއްބަސްވުމުން އެމެރިކާ ބޭރުވާނެކަން ރަސްމީކޮށް އިއުލާން ކޮށްފިއެވެ.

އެޤައުމުން އެގޮތައް އިއުލާން ކުރެއްވީ ބުރާސްފަތި ދުވަހުގެރޭ އެމެރިކާގެ ރައީސް ޑޮނަލްޑް ޓްރަމްޕްއެވެ.

ޓްރަމްޕް މިގޮތަށް ނިންމާފައި މިވަނީ އެމެރިކާގެ އެ ނިންމުމާ ދެކޮޅަށް ތެދުވުމަކީ "ޔޫރަޕްގެ ޒިންމާއެއް"ކަމަށް ޔޫރަޕިއަން ކޮމިޝަނުގެ ރައީސް ވިދާޅުވެފައިވަނިކޮށެވެ.

ދުނިޔޭގެ 195 ގައުމަކުން ސޮއިކޮށްފައިވާ ޕެރިސް އެއްބަސްވުމުން ބޭރުވުމަށް ޓްރަމްޕް ނިންމާފައިވާއިރު ދުނިޔޭގެ ޤައުމުތަކުން ދަނީ އެމެރިކާއިން އެއެއްބަސްވުން ދެމެހެއްޓުމަށް ޕްރެޝަރ ކުރަމުންނެވެ.

ޓްރަމްޕް ވިދާޅުވީ އެމަނިކުފާނުގެ ދައުރަކީ އެމެރިކާއާއި އެމެރިކާގެ ރައްޔިތުން ދިފާއު ކުރުން ކަމަށާއި އެހެންކަމުން ޕެރިސް އެގްރީމެންޓުން އެމެރިކާ ވަކިވާނެ ކަމަށެވެ.

"އެކަމަކު ވާހަކަ ދެއްކިދާނެ އެއެއްބަސްވުމާމެދު ނުވަތަ އާ އެއްބަސްވުމަކަށް. އެކަމަކު އެއެއްބަސްވުން ވާން ޖެހޭނެ އެމެރިކާއަށް އިންސާފްވެރި އެއްބަސްވުމަކަށް" ވައިޓް ހައުސްގެ ރޯސްގާޑްން ގައި ހުންނަވައިގެން ޓްރަމްޕް ވިދާޅުވިއެވެ.

ޔޫރަޕިއަން ކޮމިޝަނުގެ ރައީސް ޖީން ކްލައުޑީ ޖަންކަރ ބުދަދުވަހު ވިދާޅުވީ "އެމެރިކާއަށް ހަމަ އެހެން މި އެއްބަސްވުމުން ނުނިކުމެވޭނެ" ކަމަށައި "އެކަމުން ނުކުތުމަށް ތިނެއް ނޫނީ ހަތަރު އަަހަރު ނަގާނެ" ކަމަށެވެ.

ބާލިންގައި އޮތް ކޮންފެޑެރޭޝަން އޮފް ޖަރމަން އެމްޕްލޮޔަރސް ބައްދަލުވުމުގައި ވާހަކަދައްކަވަމުން، އެމެރިކާގެ ސަރުކާރަށް މަލާމާތުގެ ރާގެއްގައި ޖަންކަރ ވިދާޅުވީ"ލިޔެފައިވާ ބައިނަލްއަގްވާމީ ކޮންމެ އެއްބަސްވުމަކީ ފޭކް ނިއުސްއެއް ނޫން" ކަމަށެވެ.

އޭނާ ވިދާޅުވީ ޕެރިސް އެއްބަސްވުމުން ރައީސް ޓްރަމްޕް ބޭރުވެ ވަޑައިގެންފި ނަމަ އެއީ އެކަން މަސައްކަތްކުރާނެ ގޮތް ނޫން ކަމަށް ޖެހިގެން އަންނަ ދުވަހު ނުވަތަ ގަޑިއިރުތަކުގެ ތެރޭ ބުނެދިނުމަކީ ޔޫރަޕްގެ ޒިންމާއެއް ކަމަށެވެ.

ޓްރަމްޕްގެ މިނިންމުން ނިންމަވާފައިވަނީ މިވާހަކަތައް މިގޮތައް ދެކެވިފައިވަނިކޮށެވެ.

ދުނިޔޭގެ ހޫނުމިން މައްޗަށްދާ އެވްރެޖް މިންވަރު ކުޑަކުރުމަށް ދުނިޔޭގެ ގައުމުތަކުން ވަނީ ކާބަން ބޭރުކުރާ މިންވަރު މަދުކުރުމަށް އެއްބަސްވެފައެވެ.