އައްޑޫ ބިޔުރޯ

އައްޑޫގެ ކަރަންޓްގެ މައްސަލައަށް ހައްލު ނުލިބޭތީ އެކަމާއި ދެކޮޅަށް މުޒާހަރާކޮށް، އައްޑޫ އިންޖީނުގެ ރައްޔިތުންނާއި ހަވާލުކުރުމަށް ގޮވާލައިފި އެވެ.

އައްޑޫ ސިޓީގެ އިންޖީނުގެ ކުރިމަތީގައި ހުކުރު ދުވަހުގެ ހަވީރު ރައްޔިތުން ނިކުމެ ކުރި މުޒާހަރާގައި ވަނީ ފެނަކަ އެމްޑީގެ އިސްތިއުފާއަށް ގޮވައި، ކަރަންޓަށް ދާއިމީ ހައްލެއް ހޯދައިދިނުމަށް ގޮވާލާފައެވެ.

މިމުޒާހަރާގައި އައްޑޫ ސިޓީގެ މޭޔަރު އަލީ ނިޒާރާއި ބައެއް ކައުންސިލަރުންނާއި އާއްމު ރައްޔިތުން ވަނީ ބައިވެރިވެފައެވެ.

ރޯދަ މަހަށް އައްޑޫ ސިޓީގެ ކަރަންޓްގެ މައްސަލަ އަށް ހައްލު ހޯދައިދޭނެ ކަމަށް ރައީސް ޑރ. މުހައްމަދު މުއިއްޒު ވިދާޅުވި ނަމަވެސް އައްޑޫގެ ކަރަންޓްގެ މައްސަލަ އަށް ދާއިމީ ހައްލެއް ހޯދައިދިނުމަށް ސަރުކާރުން އެކަށީގެންވާ ގޮތެއްގައި މަސައްކަތްކޮށްފައި ނުވާ ކަމަށް އައްޑޫ ސިޓީ ކައުންސިލުންވެސް ބުންޏެވެ.

ފެނަކަ އެމްޑީ އައްޑޫ ސިޓީއަށް ވަޑައިގެންނެވިިއިރު، އެސިޓީގެ ބައެއް ދާއިރާތަކުގެ ރައްޔިތުންގެ މަޖިލީހުގެ މެމްބަރުންވެސް ވަޑައިގެންނެވިއެވެ.

އައްޑޫ ސިޓީ މޭޔާރ އަލީ ނިޒާރު ރާއްޖެޓީވީއަށް ވިދާޅުވީ، އައްޑޫގެ ކަރަންޓްގެ މައްސަލަ ހައްލު ކުރުމަށްވުރެ މުހިއްމު ކަމެއް ސަރުކާރަށް މިވަގުތު އޮވެގެން ނުވާނެ ކަމަށެވެ.

ހަފްތާއެއް ވަންދެން ކަރަންޓް މެދުނުކެނޑި އޮތުމަށްފަހު އަންގާރަ ދުވަހުން ފެށިގެން އަނެއްކާވެސް އެސިޓީގެ އެކި ސަރަހައްދުތަކުން ވަނީ ކަރަންޓް ކަނޑަން ފައްޓާފައެވެ.

ހުކުރު ދުވަހުވެސް އައްޑޫ ސިޓީގެ އެކި ސަރަހައްދުތަކުން ވަނީ ކަރަންޓް ކަނޑާފައެވެ.