ސްޓެލްކޯ އިން އީގަލްސް ބަލިކޮށްފި
އީގަލްސްއާ ދެކޮޅަށް ކުޅުނު މެޗު ސްޓެލްކޯ އިން ކާމިޔާބު ކުރީ 3-1 އިންނެވެ.
އެފްއޭއެމް ވެޓެރަންސް ލީގުގައި ކްލަބް އީގަލްސް އާއި ސްޓެލްކޯ ބައްދަލުކުރި މެޗުގެ ތެރެއިން
މިހާރު ކުރިއަށްދާ ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ވެޓަރަންސް ލީގުަގައި ކުލަބު އީގަލްސް ބަލިކޮށް, ސްޓެލްކޯ އިން މޮޅަކުން މުބާރާތް ފަށައިފި އެވެ.
މާފަންނު ޓާފު ދަނޑުގައި ބުރާސްފަތި ދުވަހުގެ ހަވީރު ކުޅުނު މެޗު ސްޓެލްކޯ އިން ކާމިޔާބު ކުރީ 3-1 އިންނެވެ.
މެޗުގެ ފުރަަތަމަ ހާފުގައި ސްޓެލްކޯ އިން ވަނީ ދެ ލަނޑު ޖަހައިގެން ލީޑު ނަގައިފަ އެވެ. ދެ ވަނަ ހާފުގައި އީގަލްސް އިން ލަނޑެއް ޖަހައި ފަރަގު ކުޑަ ކުރި ނަމަވެސް, ސްޓެލްކޯ އިން ވަނީ ތިން ވަނަ ލަނޑެއް ޖަހައިފަ އެވެ.
މެޗު ފަށައިގެން ހަތް ވަނަ މިނެޓުގައި ސްޓެލްކޯ އިން ލީޑު ނެގީ މުޙައްމަދު ޒޮރީފް ޖެހި ލަނޑުންނެވެ. އޭގެ ފަހުން މެޗުގެ ފުރަތަަމަ ހާފު ނިމުމުގެ ކުރިން މުޙައްމަދު ޝަރީފް ވަނީ ލަނޑު ޖަހައި ސްޓެލްކޯގެ ލީޑު ފުޅާ ކޮށްފަ އެވެ.
މެޗުގެ ދެ ވަނަ ހާފުގައި އަޙުމަދު ޝަނީޒް ވަނީ ލަނޑު ޖަހައި އީގަލްސް އަށް ފަރަގު ކުޑަ ކޮށްދީފަ އެވެ. މެޗުގައި ސްޓެލްކޯގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްދިނީ ޒޮރީފް އެވެ.
މިއަހަރުގެ ވެޓަރަންސް ލީގުގައި ޖުމުލަ 10 ޓީމަކުން ބައިވެރިވެފައިވެ އެވެ. އަދި މުބާރާތް ކުރިއަށް ގެންދަނީ ދެ ގުރޫޕަކަށް ބަހާލައިގެންނެވެ.
