ލިވަޕޫލް އިން ޕީއެސްޖީ ބަލިކުރިއިރު، ތަފާތު ދެއްކީ އެލިސަން

ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގައި ފްރާންސްގެ ޕެރިސް ސެއިންޓް ޖާމަން (ޕީއެސްޖީ)އާ ދެކޮޅަށް ކުޅުނު މެޗުން ލިވަޕޫލް މޮޅުވެއްޖެ އެވެ.

ޕީއެސްޖީގެ އަމިއްލަ ދަނޑު، ޕާކް ޑި ޕްރިންސެސް ގައި ބުދަ ދުވަހުގެ ރޭ ދަންވަރު ކުޅުނު މެޗު ލިވަޕޫލް އިން ކާމިޔާބު ކުރީ 1-0 އިންނެވެ. މެޗުގައި އެ ޓީމުން ލަނޑު ޖަހައި ކުރި ހޯދީ ވެސް ދެ ވަނަ ހާފުގަ އެވެ.

ޕީއެސްޖީގެ އަމިއްލަ ދަނޑުގައި އެ ޓީމުން ވަނީ ލިވަޕޫލާ ދެކޮޅަށް މޮޅަށް ކުޅެފަ އެވެ. ޚާއްސަކޮށް މެޗުގައި ލަނޑު ޖެހުމަށް، ލިވަޕޫލްގެ ގޯލަށް އަމާޒުކޮށް ޕީއެސްޖީން ވަނީ ގިނަ ހަމަލާތަކެއް އުފައްދައިފަ އެވެ. މެޗުގައި ޕީއެސްޖީން އުފެއްދި ހަމަލާތަކުގެ ހުރަހަކަށްވީ ލިވަޕޫލްގެ ގޯލު ކީޕަރު އެލިސަން ބެކާ އެވެ. 

މެޗުގައި ޕީއެސްޖީން ވަނީ ލިވަޕޫލްގެ ގޯލާ އަމާޒުކޮށް 10 ހަމަލާއެއް ފޮނުވާލައިފަ އެވެ. މެޗުގެ ފުރަތަމަ ހާފުގެ 20 ވަނަ މިނެޓުގައި ޕީއެސްޖީ އަށް ކުޅެމުން އަންނަ ކްވިޗާ ކްރަވަޝްކޭލިއާ ލަނޑެއް ޖެހި އެވެ. ނަމަވެސް، ވީޑިއޯ އެސިސްޓެންޓް ރެފްރީ (ވީއޭއާރު) ބެލުމަށްފަހު ރެފްރީ ވަނީ އެ ލަނޑު ބަލައި ނުގަންނަން ނިންމައިފަ އެވެ.

މެޗުގެ ފުރިހަމަ ވަގުތު ހަމަވާން އެންމެ ތިން މިނެޓަށް ވެފައި ވަނިކޮށް، ލިވަޕޫލް އިން ވަނީ ލަނޑު ޖަހައި ލީޑު ނަގައިފަ އެވެ. ޑާވިން ނޫނޭޒް ތަނަވަސްކޮށްދިން ފުރުސަތެއްގައި ލިވަޕޫލަށް އެ ލަނޑު ޖަހައިދިނީ ހާވީ އެލިއަޓް އެވެ. މެޗުގައި އޭނާ ކުޅެން ނިކުތީ ވެސް ބަދަލު ކުޅުންތެރިޔެއްގެ ގޮތުގަ އެވެ.

ފުރަތަމަ ލެގުގައި ލިވަޕޫލް އިން ކުރި ހޯދިއިރު، މާޗު މަހުގެ 12 ވަނަ ދުވަހު ކުޅޭ ދެ ވަނަ ލެގު އޮތީ ޕީއެސްޖީގެ އަމިއްލަ ދަނޑު އެންފީލްޑުގަ އެވެ.