ނައުރޫ ޤައުމުގެ ރައްޔިތަކަށް ވުމުގެ ފުރުޞަތު 105،000 ޑޮލަރަށް ވިއްކަން ނިންމައިފިއެވެ.

މި ގޮތުން ދުނިޔޭގެ އެންމެ ކުދި ޤައުމުތަކުގެ ތެރެއިން އެއް ޤައުމު ކަމުގައިވާ ނައުރޫ އިން ވަނީ "ގޯލްޑަން ޕާސްޕޯޓް" ޕްރޮގްރާމެއް ތަޢާރަފު ކޮށްފައެވެ. މި ޕްރޮގްރާމްގެ މަޤްޞަދަކީ މޫސުމަށް އަންނަ ބަދަލުތަކާ ގުޅިގެން އަޅަންޖެހޭ ފިޔަވަޅުތަކަށް ބޭނުންވާ ފައިސާ ހޯދުން ކަމަށް އެ ގައުމުން ބުނެއެވެ.

8 އަކަމޭލުގެ ސަރަޙައްދެއްގައި އޮންނަ މި ޖަޒީރާ ޤައުމަށް މޫސުމަށް އަންނަ ބަދަލުތަކުގެ ސަބަބުން ވަރަށް ބޮޑެތި ގޮންޖެހުންތަކާ ކުރިމަތިލާން ޖެހިފައިވެއެވެ. މޫދުގެ ލޮނުގަނޑު އުފުލުމާއި، ރާޅުގެ އަސަރު އިތުރުވުމާއި، ގޮނޑުދޮށް ގިރުމަކީ ނައުރޫ އަށް ކުރިމަތިވެފައިވާ ބޮޑެތި ގޮންޖެހުންތައް ކަމަށް ވެސް އެ ގައުމުން ބުނެއެވެ.

ނައުރޫގެ ރައީސް ޑޭވިޑް އަޑެއަންގ ވިދާޅުވި ގޮތުގައި، ދުނިޔެ މޫސުމީ ބަދަލުތަކާ މެދު ބަހުސްކުރަމުން ދާއިރު، އެ ޤައުމުގެ މުސްތަޤްބަލް ރައްކާތެރިކުރުމަށް އަވަސް ފިޔަވަޅުތަކެއް އަޅަން ޖެހެއެވެ. އާބާދީގެ 90 އިންސައްތަ މީހުން އުސް ބިންތަކަށް ބަދަލުކުރުމަށް ރޭވިފައިވާ މަޝްރޫޢުއަށް ޕާސްޕޯޓް ވިއްކައިގެން ލިބޭ ފައިސާ ބޭނުންކުރެވޭނެ ކަމަށް އޭނާ ވިދާޅުވިއެވެ.

ނައުރޫގެ ޕާސްޕޯޓް ލިބޭ ފަރާތްތަކަށް 89 ޤައުމަކަށް ވީޒާ ނުލައި ދަތުރުކުރެވޭނެއެވެ. މީގެ ތެރޭގައި ޔުނައިޓެޑް ކިންގްޑަމް، ހޮންގކޮންގ، ސިންގަޕޫރު އަދި ޔުނައިޓެޑް އަރަބް އެމިރޭޓްސް ހިމެނެއެވެ. ނަމަވެސް، ނަުއުރޫ އިން ބުނާ ގޮތުގައި ބައެއް ބާވަތުގެ ކުށުގެ ރެކޯޑު އޮތް ފަރާތްތަކަށް މި ފުރުޞަތެއް ނުލިބޭނެއެވެ.

މިފަދަ "ގޯލްޑަން ޕާސްޕޯޓް" ޕްރޮގްރާމްތަކަކީ އާ ކަމެއް ނޫނެވެ. އަދި މީގެ ކުރިން މިފަދަ ޕްރޮގްރާމްތައް ނަހަމަ ގޮތުގައި ކުށް ކުރާ ފަރާތްތަކުން ބޭނުން ކޮށްފައިވާކަން ފާހަގަކުރެވެއެވެ. ނަމަވެސް، މޫސުމީ ބަދަލުތަކާ ކުރިމަތިލުމަށް ކުދި ޤައުމުތަކަށް ބޭނުންވާ ފައިސާ ހޯދުމަށް އާ ގޮތްތައް ހޯދަން ޖެހިފައިވާކަން ވެސް ތަޖުރިބާކާރުން ފާހަގަ ކުރެއެވެ.