ޑާވިންޗީގެ ކުރެހުން 450 މިލިއަން ޑޮލަރަށް ބައްލަވައިގެންނެވީ ސައުދީ ޕްރިންސެއް

ދުނިޔޭގެ ރެކޯޑު އަގެއް ކަމަށްވާ 450 މިލިއަން ޑޮލަރަށް ވިއްކާލެވުނު އިޓަލީގެ މަޝްހޫރު ކުރެހުންތެރިޔާ ލިއޮނާޑޯ ޑަވިންޗީގެ ކުރެހުން ބައްލަވައިގަތީ ސައުދީ އަރަބިއްޔާގެ ޕްރިންސެއް ކަމަށްވާ ޕްރިންސް ބަދުރް ބިން އަބްދުﷲ ބިން މުހައްމަދު ބިން ފަރްހާން އަލްސައުދް ކަމަށް ރިޕޯޓުތައް ބުނެފިއެވެ.

އިނގިރޭސިވިލާތުގެ ނީލަންކިޔާ ކުންފުންޏެއް ކަމަށްވާ 'ކްރިސްޓީސް' އިން އެމެރިކާގެ ނިއުޔޯކުގައި ކުރިޔަށް ގެންދިޔަ ނީލަމުގައި ވިއްކާލެވުނީ ޑާވިންޗީގެ ކުރެހުންތަކުގެ ތެރެއިން އާންމުކޮށް ދައްކާލަމުން ބެހެއްޓިފައި ނުވާ ހަމައެކަނި ކުރެހުމެވެ. ނިއުޔޯކް ޓައިމްސްއިން ރިޕޯޓު ކޮށްފައިވާ ގޮތުގައި 'ސެލްވެޓޯރ މުންޑީ' ނުވަތަ 'ސޭވިއާ އޮފް ދަ ވާރލްޑް' ގެ ނަމުން ނަންދީފައިވާ މި ކުރެހުން ބައްލަވައިގަތީ ޕްރިންސް ބަދުރްއެވެ.

ޕްރިންސް ބަދުރް މި ކުރެހުން ބައްލަވައިގަތީ 19 މިނެޓަށް ދިގު ދެމިގެންދިޔަ ނީލަމަކަށް ފަހު، 450،312،500 މިލިއަން ޑޮލަރަށެވެ. މި އަދަދަކީ މުޅި ޖުމްލަ ނީލަމުގެ ހަރަދަށް ޕްރިންސް ބަދުރްގެ އަތުން ހިންގަވާފައިވާ އަދަދެކެވެ. ޕްރިންސް ބަދުރް މި ނީލަމުގައި ބައިވެރިވެ ވަޑައިގެންނެވީ ފޯނު މެދުވެރިކޮށެވެ. މި އަދަދު ދެއްކުމަށް ޕްރިންސް އެއްބަސްވެ ވަޑައިގެންފައިވަނީ އިންސްޓޯލްމަންޓަށް ކަމަށް ވެސް ވަނީ އެނގިފައެވެ.

ސައުދީގެ މަސްދަރުތަކަކުން ހުށަހެޅި ޑޮކިއުމެންޓްތަކުގެ އަލީގައި ނިއުޔޯކް ޓައިމްސްއިން ބުނީ ޕްރިންސް ބަދުރް މި ނީލަމުގައި ބައިވެރިވެ ވަޑައިގެންނެވީ އެންމެ ފަހު ވަގުތު ކަމަށެވެ. އަދި 'ކްރިސްޓީސް' ގެ މެނޭޖްމަންޓުން ޕްރިންސް ބަދުރްއަކީ ކޮން މީހެއްކަން ހޯދުމަށް އެތަކެއް މަސައްކަތްތަކެއް ކޮށްފައިވާ ކަމަށާއި އަދި އޭނާ ފައިސާ ހޯއްދަވާ ގޮތް ސާފުކުރުމަށް ވެސް އެތަކެއް މަސައްކަތްތަކެއް ކޮށްފައިވާ ކަމަށެވެ. ހަމައެހެންމެ ނީލަމުގައި ބައިވެރިވުމަށް 100 މިލިއަން ޑޮލަރު ބިޑް ކުރުމުން ނީލަމުގައި ބައިވެރިވި އެހެން ފަރާތްތަކުން ޕްރިންސް ބަދުރްއަކީ ކޮންމެ މީހެއްކަން ހޯދުމަށް 'ކްރިސްޓީސް'ގެ ވަކީލުންގެ ގާތުގައި އެދިފައިވާ ކަމަށް ރިޕޯޓުތައް ބުނެއެވެ.

މި ސުވާލުތަކުގެ ޖަވާބެއްގެ ގޮތުން ޕްރިންސް ބަދުރް ވިދާޅުވީ އޭނާއަކީ ރިއަލް ސްޓޭޓް އިންޑަސްޓްރީގައި މަސައްކަތް ކުރާ މީހެއް ކަމަށާއި އަދި އޭނާއަކީ ސައުދީއަށް ނިސްބަތްވާ 5000 ޕްރިންސުންގެ ތެރެއިން ބޭފުޅެއް ކަމަށްވެސް މި ރިޕޯޓުގައިވެއެވެ.

ބަދުރް ބައްލަވައިގެންނެވި ކުރެހުން

ޕްރިންސް ބަދުރް މި ކުރެހުން ބައްލަވައިގެންނެވުމުގެ ދެ ހަފްތާ ކުރިން ސައުދީގެ ވަލީއަހުދު މުހުއްމަދު ބިން ސަލްމާންގެ އަމުރުފުޅަށް އެ ގައުމުގެ ޝާހީ އާއިލާއަށް ނިސްބަތްވާ ގިނަ އަދަދެއްގެ އަމީރުންނާއި ވިޔަފާރިވެރިން ހައްޔަރު ކުރެވުނެވެ.

އެހެން ނަމަވެސް ޕްރިންސް ބަދުރްގެ މައްޗަށް ތަހުގީގެއް ހިންގިފައި ނުވާއިރު އޭނާއަކީ އެ ގައުމުގެ ވަލީއަހުދާއި ވިޔާފާރީގެ ގޮތުން ގުޅުން އޮންނަ އެމަނިކުފާނުގެ ގާތް ބޭފުޅެއް ކަމަށް ވަނީ އެނގިފައެވެ. ބެލެވޭ ގޮތުގައި ޕްރިންސް ބަދުރްއަކީ ސަލްމާން ރަސްގެފާނާއިއެކު ކިޔަވާވަޑައިގެންނެވި ބޭފުޅެކެވެ. ހަމައެހެންމެ އޭނާއަކީ ސައުދީ ސަރުކާރުގެ މުހިންމު މަގާމުތައް ދެއްވާފައިވާ ބޭފުޅެއް ކަމަށްވެސް ރިޕޯޓުތައް ބުނެއެވެ.

މި ކުރެހުމަކީ އިސްލާމްދީނަށް ފުރައްސާރަ ވާގޮތަށް ކުރަހާފައިވާ ކުރެހުމަކަށް ވާއިރު ސައުދީގެ އަމީރަކު މި ކުރެހުން ބައްލަވައިގެންނެވިކަން ފަޅާއެރުމުން އެ ގައުމުގެ ޝާހީ އާއިލާއަށް އެކަމުގެ ފާޑުކިޔުންތައް ދަނީ އަމާޒުވަމުންނެވެ.

ޕްރިންސް ބަދުރް މި ކުރެހުން ބައްލަވައިގެންނެވީ ރަޝިއާގެ އިންވެސްޓަރެއް ކަމަށްވާ ޑިމިޓްރީ ރައިބްލޯވްގެ އަތުންނެވެ. ފްރާންސްގެ މޮނާކޯގެ ވެސް ޗެއާމަންކަން ކުރަމުން އަންނަ ޑިމިޓްރީ 2013 ވަނަ އަހަރު މި ކުރެހުން ގަނެފައިވަނީ 127.5 މިލިއަން ޑޮލަރަށެވެ.

ބެލެވޭ ގޮތުގައި މި ކުރެހުމަކީ 1500 ގެ އަހަރުތަކުގައި ޑާވިންޗީ ކުރާހާފައިވާ ކުރެހުމެކެވެ. މި ކުރެހުން 1649 ވަނަ އަހަރު އެންމެ ފުރަތަމަ ގަތް ފަރާތަކީ އިނގިރޭސިވިލާތުގައި އޭރު ރަސްކަން ކުރެއްވި ޗާލްސް 1 އެވެ.

ޕްރިންސް ބަދުރް މި ކުރެހުން ބައްލަވައިގަތުމާއެކު މި ކުރެހުން ވެގެން ގޮސްފައިވަނީ ދުނިޔޭގެ އެންމެ އަގުބޮޑު ކުރެހުމަށެވެ.