އައްޑޫ ސިޓީ ހިތަދޫ-ހުޅުމީދޫ ބްރިޖުގެ ފަންނީ ބައެއް މަސައްކަތްތަކަށް ލަފާ ދޭނެ ބަޔަކު ހޯދުމަށް އިއުލާން ކޮށްފިއެވެ.

މި އިއުލާން ކޮށްފައިވަނީ މި މަސައްކަތް އިއުލާނު ކުރަން ރައީސް ޑރ. މުހައްމަދު މުއިއްޒު ކަނޑައެޅުއްވި ތާރީހު ފަހަނަ އަޅައިދިއުމުން އެކަން މީޑިއާތަކުގައި ރިޕޯޓުކޮށްފައިވަނިކޮށެވެ. މިއަހަރުގެ ރިޔާސީ ބަޔާނުގައި ރައީސް މުއިއްޒު ވިދާޅުވީ އައްޑޫ ބުރިޖުގެ މަސައްކަތް ކުރިއަށް ގެންދިއުން އަވަސްކުރުމަށް ޑީޓެއިލްޑް ސާވޭ އާއި، އިންޖިނިއަރިން ޑިޒައިން ކުރާނެ ފަރާތެއް ހޯދައި، ޓެކްނިކަލް މަސައްކަތް ކުރިއަށް ގެންދިއުމަށް ސަރުކާރުން މި މަހުގެ ތެރޭގައި، ބަޔަކު ހޯދަން އިއުލާނު ކުރާނެ ކަމަށެވެ. ނަމަވެސް ފެބްރުއަރީ މަސް ނިމިގެންދިޔައިރު ވެސް އިއުލާން ކޮށްފައިނުވެއެވެ.

2 މާރިޗު 2025 ގައި މިނިސްޓްރީ އޮފް ފިނޭންސް އެންޑް ޕްލޭނިންގ އިން ބުނީ އިމާރާތްކުރުމާއި، ގެދޮރުވެރިކަމާއި ބިނާރާ ބެހޭ ވުޒާރާގެ އެދިލެއްވުމުގެ މަތިން އައްޑޫ ސިޓީ ހިތަދޫ-ހުޅުމީދޫ ލިންކް ޕްރޮޖެކްޓްގެ ސާރވޭ، ޑިޒައިން އަދި ޓެންޑަރ ޑޮކިއުމަންޓް، ޓެކްނިކަލް ސްޕެސިފިކޭޝަން ހިމެނޭ ގޮތަށް ތައްޔާރުކުރުމުގެ މަސައްކަތުގެ ކޮންސަލްޓަންސީ ސާރވިސް ދޭނެ ފާރމެއް ހޯދުމަށް ބޭނުންވާ ކަމަށެވެ. އަދި މި މަސައްކަތަށް "އެކްސްޕްރެޝަން އޮފް އިންޓްރެސްޓް" (އީ.އޯ.އައި) ހުށަހެޅުމުގެ ފުރުސަތު މިކަމަށް ޝަރުތުހަމަވާ ހުރިހާ ފަރާތްތަކަށް ހުޅުވާލާފައިވާ ކަމަށެވެ.

މިނިސްޓްރީން ބުނީ މަސައްކަތައް ޝައުގުވެރިވާ ފަރާތްތަކުން މަސައްކަތް ކުރުމުގެ ގާބިލްކަން ސާބިތުކޮށްދޭ ލިޔެކިޔުން (ކުންފުނީގެ ފަންނީ ގާބިލު ކަން، ދާއިރާއިން ކޮށްފައިވާ މަސައްކަތްތަކުގެ ތަފްސީލް މަސައްކަތްތަކުގެ އަގު އެނގޭނޭހެން، ކުންފުނީގެ މުވައްޒަފުންގެ މިފަދަ މަސައްކަތްތަކުގެ ހުނަރާއި ގާބިލުކަން އަދި ކުންފުނީގެ މިފަދަ މަސައްކަތުގެ މައުލޫމާތު) ހުށަހަޅަންޖެހޭ ކަމަށެވެ. މި މަސައްކަތްތަކަށް ޝައުގުވެރިކަން ފާޅުކުރާ ފަރާތްތަކުގެ ތެރެއިން ޝޯޓް ލިސްޓް ކުރެވޭ ފަރާތްތަކަށް ޕްރޮޕޯސަލް ހުށަހެޅުމުގެ ދައުވަތު ދެވޭނެ ކަމަށް ފިނޭންސް މިނިސްޓްރީން ބުނެއެވެ.

މީގެ އިތުރުން ފިނޭންސް މިނިސްޓްރީން ބުނީ މި މަސައްކަތަށް ޝައުގުވެރިވާ ފަރާތްތަކުން 24 މާރިޗު 2025 ވާ ހޯމަ ދުވަހުގެ މެންދުރު 1:00 ގެ ކުރިން، "އެކްސްޕްރެޝަން އޮފް އިންޓަރެސްޓް" މެއިލް ނުވަތަ އީމެއިލް މެދުވެރިކޮށް ފޮނުވަންޖެހޭ ކަމަށެވެ.

އައްޑޫ ސިޓީ ހިތަދޫ-ހުޅުމީދޫ ބްރިޖުގެ ސާވޭ ކުރާނެ ބަޔަކު ހޯދުމަށް އަލުން އިއުލާންކޮށްފައިވާއިރު، މިމަޝްރޫއުގެ މަސައްކަތް ކުރުމަށް ބޭނުންވާ ސާވޭތައް ކުރުމަށް މިސްރުގެ އަރަބް ކޮންޓްރެކްޓާސް ގްރޫޕާ، 19 ފެބްރުއަރީ 2024 ގައި ވަނީ ހަވާލުކޮށްފައެވެ. އަދި ސާވޭ މަސައްކަތްތަށް މިދިޔަ އަހަރުގެ މާރިޗު މަހުގެ ތެރޭގައި ނިންމި ކަމަށް މިނިސްޓްރީ އޮފް ކޮންސްޓްރަކްޝަން ހައުސިން އެންޑް އިންފްރާސްޓްރަކްޗަރއިން ބުނެފައިވެއެވެ. ނަމަވެސް ފަހުން މިމަޝްރޫއާ ގުޅޭ އެއްވެސް މައުލޫމާތެއް މިނިސްޓްރީން ހާމަކޮށްފައިނުވެއެވެ.

މިމަޝްރޫއާ ގުޅޭގޮތުން މީގެ ކުރިން އެމްޑީޕީގެ ޕާލަމަންޓްރީ ގްރޫޕް (ޕީޖީ) ލީޑަރު ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވެސް ކަންބޮޑުވުންފާޅު ކުރައްވައި ވިދާޅުވީ އައްޑޫ ބްރިޖު މަޝްރޫއުގެ ސަރވޭއަށް 38 މިލިއަން ރުފިޔާ ހޭދަކޮށްފައިވާ ކަމަށާއި، ހެދި ސަރވޭގެ ރިޕޯޓު ފެންނަން ނެތް ކަމަށެވެ.