ހަޒާޑް، ޗުއްޓީ ހޭދަ ކުރުމަށް ރާއްޖޭގައި

ބެލްޖިއަމްގެ ޤައުމީ ޓީމުގެ ކުރީގެ ކެޕްޓަން އެޑެން ހަޒާޑް، ޗުއްޓީ ހޭދަކުރުމަށް ރާއްޖެ އަތުވެއްޖެ އެވެ.

އުމުރުން 34 އަހަރުގެ ހަޒާޑް ޗުއްޓީ ހޭދަކުރަމުން އަންނަނީ ރާއްޖޭގެ ރިސޯޓެއް ކަމަށްވާ، ޖޯލި މޯލްޑިވްސްގަ އެވެ. އެ ރިސޯޓުގައި ޗުއްޓީ ހޭދަކުރަމުން އަންނަ މަންޒަރު ފެންނަ ފޮޓޯތައް، ހަޒާޑް ވަނީ ސޯޝަލް މީޑިއާގައި ވެސް ހިއްސާކޮށްފަ އެވެ.

ލީލް އިން ސީނިއާ ކެރިއަރު ފަށި ހަޒާޑް އެންމެ ބޮޑަށް ވިދާލީ ޗެލްސީގަ އެވެ. 2007 ވަނަ އަހަރު ލީލް އިން ސީނިއާ ކެރިއަރު ފަށި ހަޒާޑް ޗެލްސީ އަށް ބަދަލުވީ 2012 ވަނަ އަހަރު އެވެ. ހަޒާޑް ވަނީ ޗެލްސީ އަށް ކުޅެދިން 352 މެޗުގައި 110 ލަނޑު ޖަހައިފަ އެވެ.

ޗެލްސީގައި ހަޒާޑް ދައްކަމުން އައި މޮޅު ކުޅުމުގެ ސަބަބުން، ސްޕެއިންގެ ރެއާލް މެޑްރިޑުން ވަނީ 2019 ވަނަ އަހަރު އޭނާގެ ސޮއި ހޯދަައިފަ އެވެ. ނަމަވެސް ރެއާލަށް ބަދަލުވީ ފަހުން ހަޒާޑަށް އެންމެ އެކަށީގެންވާ ކުޅުމެއް ނުދެއްކެ އެވެ. ރެއާލަށް ކުޅެދިން 76 މެޗުގައި ހަޒާޑް ވަނީ ހަތް ލަނޑު ޖަހައިފަ އެވެ.

ބެލްޖިއަމްގެ ޤައުމީ ޓީމުގައި ވެސް މުހިންމު ދައުރެއް އަދާ ކުރި ހަޒާޑް މިހާރު ހުރީ ޕްރޮފެޝަނަލް ފުޓުބޯޅަ ކުޅުން ހުއްޓާލައިފަ އެވެ. 2022 ވަނަ އަހަރު ޤަތަރުގައި ކުރިއަށް ދިޔަ ފީފާ ވޯލްޑް ކަޕަށްފަހު އޭނާ ވަނީ ޤައުމީ ޓީމަށް ކުޅުން ހުއްޓާލަން ނިންމައިފަ އެވެ.

ރެއާލްގައި ހަޒާޑަށް އޭނާގެ އެކަށީގެންވާ ކުޅުމެއް ނުދެއްކުނީ އަނިޔާ އަދި ފިޓްނަސްގެ މައްސަލަތަކާ ހެދި އެވެ. އޭގެ ފަހުން 2023 ވަނަ އަހަރުގެ އޮކްޓޫބަރު މަހުގެ ތެރޭގައި ހަޒާޑް ވަނީ ރަސްމީ ފުޓުބޯޅަ ކުޅުން ހުއްޓާލަން ނިންމާފައިވާކަން ކުއްލި އަކަށް އިއުލާން ކޮށްފަ އެވެ.