އަނިޔާގެ ސަބަބުން ކުޅުމާއި ދުރުގައި ހުރުމަށްފަހު ރެއާލްމެޑްރިޑްގެ އެޑެން ހަޒާޑް ޓީމުގެ ފަރިތަކުރުންތަކުގައި ބައިވެރިވާން ފަށައިފިއެވެ.
ހަޒާޑް ވަނީ ލަލީގާގައި އެތުލެޓިކޯ މެޑްރިޑް އަތުން ރެއާލް ބަލިވި މެޗަށްފަހު އެންމެ ފުރަތަމަ ބޭއްވި ޓީމުގެ ފަރިތަކުރުންތަކުގައި ބައިވެރިވެފައެވެ. އަނިޔާގެ ސަބަބުން ހަޒާޑުގެ ކުޑަހުޅަށް ވަނީ 2019 ވަނަ އަހަރުގެ ޑިސެމްބަރު މަހު ޕްލޭޓެއް ލައްވާފައެވެ. އެޕްލޭޓް ނެގުނަށް އިތުރު ސާޖަރީއެއް ހެދީ މިއަހަރުގެ މާޗް މަހުގެ 29 ވަނަ ދުވަހުއެވެ.
މި ސާޖަރީއަށްފަހު އަލުން ފަރިތަކުރުންތަކުގައި ބައިވެރިވާން ފެށިއިރު މި ސީޒަން ނިމުމުގެ ކުރިން ކޮންމެވެސް ވަރަކަށް އޭނާއަށް މެޗުތައް ކުޅެވޭނެ ކަމަށް ރިޕޯޓުތައް ބުނެއެވެ. ނަމަވެސް ލަލީގާގައި ބުރާސްފަތި ދުވަހުގެރޭ ލެވާންޓޭ އާއި ދެކޮޅަށް ކުޅޭ މެޗަށް އޭނާ ފިޓް ނުވާނެއެވެ. އަދި ޗެމްޕިއަންސް ލީގު ފައިނަލުގައި ލިވަޕޫލްއާއި ރެއާލް ކުޅޭ މެޗުގައިވެސް ހަޒާޑް ފެނުން ދުރެވެ. އެކަމަކު ލަލީގާގައި ކަޑީޒް އަދި ރެއާލް ބެޓިސްއާއި ދެކޮޅަށް ރެއާލް ކުޅޭ މެޗުތަކުގައި އޭނާ ފެނުން އެކަށީގެންވެއެވެ.
