ހަޒާޑް ބެލްޖިއަމްގެ ގައުމީ ޓީމަށް ކުޅުން ހުއްޓާލައިފި

ބެލްޖިއަމްގެ ކެޕްޓަން، އެޑެން ހަޒާޑް ގައުމީ ޓީމަށް ކުޅުން ހުއްޓާލަން ނިންމާފައިވާކަން އިއުލާންކޮށްފިއެވެ.

މިކަން ހަޒާޑް އިއުލާންކުރީ ބުދަ ދުވަހު އޭނޭގެ ސޯޝަލް މީޑިއާގައި ކުރި ޕޯސްޓެއްގައެވެ. ގައުމީ ޓީމަށް ކުޅުން ހަޒާޑް ހުއްޓާލާފައިވާއިރު، އޭނާގެ އުމުރަކީ 31 އަހަރެވެ.

އެ ޕޯސްޓުގައި ހަޒާޑް ބުނީ އޭނާއަށް ސަޕޯޓުކޮށް، ލޯބި ދިން އެންމެހާ ފަރާތްތަކަށް ޝުކުރު އަދާކުރާކަމަށެވެ. އަދި 2008 ވަނަ އަހަރުން ފެށިގެން އެހީތެރިވެދިން ފަރާތްތަކަށް ޝުކުރު އަދާކުރާކަމަށް ބުނަމުން އޭނާ ބުނީ، ބެލްޖިއަމްގެ ދެން އަރަން އޮތް ޖީލު އޮތީ ތައްޔާރަށް ކަމަށެވެ.

2008 ވަނަ އަހަރުގެ ބެލްޖިއަމްގެ ސީނިއަރ ގައުމީ ޓީމަށް ކުޅެންފެށުމުގެ ކުރިން ހަޒާޑް ވަނީ ޒުވާން އުމުރުފުރައިގެ ޓީމުތަކަށްވެސް ކުޅެފައެވެ. ގައުމީ ޓީމާއެކު އޭނާ ހޭދަކުރި 14 އަހަރު ތެރޭގައި ވަނީ 126 މެޗު ކުޅެ 33 ލަނޑު ޖަހާފައެވެ.

ގައުމީ ޓީމަށް ކުޅުން ހުއްޓާލަން އޭނާ ނިންމީ މިހާރު ގަތަރުގައި ކުރިއަށްދާ ފީފާ ވޯލްޑް ކަޕުން ބެލްޖިއަމް ކަޓާފައިވާ ދަނޑިވަޅެއްގައެވެ. 2018 ވަނަ އަހަރު އޮތް މުބާރާތުގެ ސެމީ ފައިނަލްގައި ބެލްޖިއަމް ކުޅުނުނަމަވެސް މިއަހަރުގެ މުބާރާތުން ކެޓީ ގްރޫޕް ސްޓޭޖުންނެވެ.