ކުރިއަށް އޮތް 2022/23 ސީޒަންގައި ރެއާލްގެ އެޑެން ހަޒާޑް ޓީމުގައި މަޑުކުރާނެކަމަށް އެޓީމުގެ ކޯޗު ކާލޯ އަންޗެލޯޓީ ބުނެފިއެވެ.
މީގެ ކުރިން އަޑުތައް ފެތުރިފައިވާ ގޮތުން ރެއާލްއިން މަސައްކަތް ކުރާނީ ކުރިއަށް އޮތް ސަމަރ ޓްރާންސްފަރ މާކެޓުގައި ހަޒާޑް ވިއްކާލުމަށެވެ. އެއީ އަނިޔާގެ ސަބަބުން ގިނަ ދުވަހު ކުޅުމާއި ދުރުގައި އޭނާ މަޑުކުރަންޖެހުމުންނެވެ. އަދި އަނިޔާގެ ސަބަބުން އޭނާއަށް ޓީމުގައި ރަނގަޅު ކުޅުމެއް ފާއިތުވި ދުވަސްތަކުގައި ދެއްކިފައި ނުވާތީއެވެ.
ނަމަވެސް އަންޗެލޯޓީ ބުނީ މިއަންނަ ސީޒަނަށް ހަޒާޑް ކްލަބުގައި މަޑުކުރާނެ ކަމަށެވެ. އަދި ހަޒާޑްގެ ޕްލޭން ވަރަށް ސާފު ކަމަށާއި، އޭނާ ބޭނުންވަނީ މިއަންނަ ސީޒަންގައި އޭނާގެ ކޮލިޓީ ދައްކާލަން ކަމަށްވެސް އަންޗެލޯޓީ ބުންޏެވެ.
އަނިޔާގެ ސަބަބުން ގިނަ ދުވަސްތަކެއް ކުޅުމާއި ދުރުގައި ހުރުމަށްފަހު ހަޒާޑް މިހާރު ވަނީ އަނެއްކާވެސް ޓީމާއި ގުޅިފައެވެ. ހަޒާޑް ވަނީ ލަލީގާގައި އެތުލެޓިކޯ މެޑްރިޑް އަތުން ރެއާލް ބަލިވި މެޗަށްފަހު އެންމެ ފުރަތަމަ ބޭއްވި ޓީމުގެ ފަރިތަކުރުންތަކުގައި ބައިވެރިވެފައެވެ. އަނިޔާގެ ސަބަބުން ހަޒާޑުގެ ކުޑަހުޅަށް ވަނީ 2019 ވަނަ އަހަރުގެ ޑިސެމްބަރު މަހު ޕްލޭޓެއް ލައްވާފައެވެ. އެޕްލޭޓް ނެގުނަށް އިތުރު ސާޖަރީއެއް ހެދީ މިއަހަރުގެ މާޗް މަހުގެ 29 ވަނަ ދުވަހުއެވެ.
