ހަޒާޑް ދޫކޮށްލުމުން ރެއާލަށް ހަތް މިލިއަން ޔޫރޯގެ ފައިދާއެއް

ސްޕެއިންގެ ރެއާލް މެޑްރިޑަށް ކުޅެމުން އަންނަ ބެލްޖިއަމްގެ އެޑެން ހަޒާޑްގެ އެއްބަސްވުން އުވާލަން އެކުލަބުން ނިންމައިފި އެވެ.

ރެއާލުން މި ގޮތަށް ނިންމީ ހަޒާޑާއެކު ކުރިއަށްގެންދިޔަ މަޝްވަރާތަކަށް ފަހު، ދެ ފަރާތް އެއްބަސްވާ ގޮތުގެ މަތީންނެވެ. ޗެލްސީ ދޫކޮށް ހަޒާޑް ރެއާލަށް ބަދަލުވީ 2019 ވަނަ އަހަރު އެވެ. ފަސް އަހަރު ދުވަހަށް އެކުލަވާލި އެ އެއްބަސްވުމުގެ މުއްދަތު ހަމަވާން އޮތީ އަންނަ އަހަރުގެ ޖޫން މަހުގެ ނިޔަލަށެވެ. އެ އަހަރު އޭނާ ރެއާލަށް ބަދަލުވީ ސްޕެނިޝް ލީގުގެ ރެކޯޑު އަގަކަށެވެ. އެއްބަސްވުން އުވާލަން ރެއާލުން ނިންމީ ބާކީ އެއް އަހަރު އޮއްވަ އެވެ. އެއްބަސްވުމުގައި ވާ ގޮތުން އެ އެއް އަހަރަށް ހަޒާޑަށް ހަތް މިލިއަން ޕައުންޑުގެ އަދަދެއް ލިބޭނެ އެވެ. ނަމަވެސް މަޝްވަރާތަކަށް ފަހު ހަޒާޑް ނިންމީ އެ ބައި ދޫކޮށްލުމަށެވެ. އެހެންކަމުން ހަޒާޑްގެ އެއްބަސްވުން އުވާލި ނަމަވެސް، ރެއާލަށް ހަތް މިލިއަން ޔޫރޯ ސަލާމަތްވާނެ އެވެ.

ރެއާލްގައި ހޭދަ ކުރި ހަތަރު ސީޒަނުގައި އޭނާ ވަނީ އެ ޓީމަށް 76 މެޗު ކުޅެދީ ހަތް ލަނޑު ޖަހައިފަ އެވެ. ރެއާލަށް ބަދަލުވި ނަމަވެސް ހަޒާޑަށް އެ ޓީމުގައި އެންމެ އެދެވޭ ކުޅުމެއް ދެއްކިފައެއް ނުވެ އެވެ. ރެއާލަށް ބަދަލުވި ފަހުން އޭނާ އަށް ވަނީ ފިޓްނަސް އަދި އަނިޔާގެ މައްސަލަތައް ކުރިމަތި ވެސް ވެފަ އެވެ. މި ސީޒަނުގައި ހަޒާޑް ރެއާލަށް ކުޅެދީފައި ވަނީ 10 މެޗެވެ. އޭހެ ތެރެއިން ހަ މެޗަކީ ސްޕެނީޝް ލީގުގެ މެޗުތަކެވެ. މި ސީޒަނުގައި އޭނާ އަށް ޖެހިފައި ވަނީ އެންމެ ލަނޑެކެވެ. ހަޒާޑް ވަނީ ރެއާލާއެކު ހަ ތަށި ކާމިޔާބުކޮށްފަ އެވެ. އޭގެ ތެރޭގައި ސްޕެނިޝް ލީގު ދެ ފަހަރު، ކޮޕަ ޑެލް ރޭ، ސްޕެނިޝް ސުޕަ ކަޕް، ޔުއެފާ ޗެމްޕިއަންސް ލީގު އަދި ޔުއެފާ ސުޕަ ކަޕް ހިމެނެ އެވެ.