އިނގިރޭސި ޕްރިމިއާ ލީގުގައި ސައުތެމްޓަނާ ދެކޮޅަށް ކުޅުނު މެޗުން މޮޅުވެ، ޗެލްސީން ލީގު ތާވަލްގެ ހަތަރު ވަނަ އަށް ޖެހިލައިފި އެވެ.

ޗެލްސީގެ އަމިއްލަ ދަނޑުގައި، އަންގާރަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 4-0 އިންނެވެ. މެޗުގެ ފުރަތަމަ ހާފުގައި ޗެލްސީން ތިން ލަނޑު ޖެހިއިރު، ދެ ވަނަ ހާފުގައި ވަނީ ހަތަރު ވަނަ ލަނޑެއް ވެސް ޖަހައިފަ އެވެ.

މެޗުގެ ފުރަތަމަ ހާފުގެ 24 ވަނަ މިނެޓުގައި ޗެލްސީ އަށް ލީޑު ނަގައިދިނީ ކްރިސްޓޮފާ އެންކުންކޫ އެވެ. އޭގެ ފަހުން ފުރަތަމަ ހާފުގެ 36 ވަނަ މިނެޓުގައި ޕެޑްރޯ ނެޓޯ ވަނީ ޗެލްސީގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ.

މެޗުގެ ފުރަތަމަ ހާފުގެ ފުރިހަމަ ވަގުތު ހަމަވާން އެއް މިނެޓަށް ވެފައި ވަނިކޮށް، ޗެލްސީގެ ތިން ވަނަ ލަނޑު ޖެހީ ލެވީ ކޮލްވިލް އެވެ. އޭގެ ފަހުން މެޗުގެ ދެ ވަނަ ހާފުގައި ޗެލްސީގެ ހަތަރު ވަނަ ލަނޑު ޖެހީ މާކް ކުކުރެއްލާ އެވެ.

މޮޅާއެކު ޗެލްސީން ލީގު ތާވަލްގެ ހަތަރު ވަނަ އަށް ޖެހިލާފައިވާއިރު، މިއީ ދެ މެޗުން ބަލިވުމަށްފަހު ޗެލްސީ މޮޅުވި ފުރަތަމަ މެޗެވެ. ލީގު ތާވަލްގެ ހަތަރު ވަނައިގައި ޗެލްސީ އޮތީ މިހާތަަނަށް ކުޅެފައިވާ 27 މެޗުން 46 ޕޮއިންޓާ އެކު އެވެ.

މި ސީޒަނާ ދިމާކޮށް ޗެލްސީގެ ކޯޗުކަމާ ހަވާލުވި އެންޒޯ މަރެސްކާގެ އިރުޝާދުގެ ދަށުން ސީޒަންގެ ކުރީ ކޮޅު ޗެލްސީން ވަނީ ރަނގަޅު ނަތީޖާތަކެއް ވެސް ނެރެފަ އެވެ. ނަމަވެސް ވަކި ހިސާބަކުން އެ ޓީމުގެ ނަތީޖާތައް ދަށްވެފައިވާއިރު، ދޭތެރެއިން މަރެސްކާ އަށް އަންނަނީ ފާޑު ކިޔުން އަމާޒުވަމުންނެވެ.