ވިޕް ލައިންއާ ޚިލާފު ނުވުމަށް ދެއްވި މެސެޖު ލީކު ކޮށްލުމުން ރައީސް މުއިއްޒު ކޯފާ ވެއްޖެ

ޕީއެންސީގެ މެމްބަރުންނަށް ވޯޓަށް ނުފޫޒު ފޯރުއްވައި، ވިޕްލައިން އާ އެއް ގޮތައް ވޯޓު ދެއްވަން ޖެހޭނެ ކަމަށް ވިދާޅުވެ ރައީސް މުއިއްޒު ދެއްވި މެސެޖު ލީކު ކޮށްލުމުން އެ މަނިކުފާނު ވަރަށް ބޮޑަށް ކޯފާ ވެއްޖެއެވެ.

އިތުބާރު ހުރި ގޮތަކަށް މައުލޫމާތު ލިބިފައިވާ ގޮތުގައި، މުއިއްޒު އެކަމާ ކޯފާވެ، ވިދާޅުވި ކަމަށް ވަނީ، "އެ މެސެޖު އާއިދު އަށް ދީ، އަދަދު ނޫހުގައި ޚަބަރު ޖެހި ބޭފުޅަކު އެ ކުރެއްވީ ވަރަށް ގޯސް ކަމެއް" ކަމަށެވެ.

ރައީސް މުއިއްޒު ވިދާޅުވި ކަމަށް ވަނީ އެ މެސެޖު އެމަނިކުފާނު ދެއްވީ ޕީއެންސީ ގެ ރައީސްގެ ހައިސިއްޔަތުން ކަމުގައެވެ.

އަންގާރަ ދުވަހުގެ މަޖިލިސް ޖަލްސާގައި ވޯޓުގެ ކަންތައް ހިނގި ގޮތުން ޕީއެންސީ ގެ ތެރޭގައި ވަނީ ވަރަށް ބޮޑު ނުތަނަވަސް ކަމެއް އުފެދިފައި ކަމަށް ނަން ނުޖެހުމަށް ޝަރުތު ކޮށް ވާހަކަ ދެއްކެވި ޕީއެންސީގެ ޕީޖީ މެމްބަރަކު ވިދާޅުވިއެވެ.

އަންގާރަ ދުވަހު މަޖިލީހުގައި ނެގި ވޯޓުގައި ޕީއެންސީ ގެ ބައެއް މެމްބަރުން ވަނީ ވިޕްލައިން އާ ޚިލާފުވެ ވޯޓު ގައި ބައިވެރި ނުވެފައެވެ.

ވިޕް ލައިން އާ ޚިލާފުވި މެމްބަރުންނާ މެދު ފިޔަވަޅު އަޅާނެ ކަމަށް ޕީއެންސީގެ ޕީޖީ ލީޑަރު އިބްރާހިމް ފާލާހް އަންގަވާފައިވާ ކަމަށް އިތުބާރު ހުރި ގޮތެއްގައި މައުލޫމާތު ލިބިފައިވެއެވެ.

ތ. އަތޮޅަށް ކުރައްވަމުން ގެންދަވާ ދަތުރުފުޅެއްގައި އުޅުއްވަމުން ރައްޔިތުންގެ މަޖިލީހުގައި މެމްބަރުން ވޯޓު ލާންވީ ގޮތަށް ރައީސް މުއިއްޒު ގެންދަވަނީ ވިދާޅުވަމުންނެވެ.