އިޓާލިއަން ލީގުގައި މޮންޒާއާ ދެކޮޅަށް ކުޅުނު މެޗުން ރޯމާ މޮޅުވެއްޖެ އެވެ.

ރޯމާގެ އަމިއްލަ ދަނޑުގައި ހޯމަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 4-0 އިންނެވެ. މެޗުގެ ފުރަތަމަ ހާފުގައި ރޯމާ އިން ވަނީ ދެ ލަނޑު ޖަހައިފަ އެވެ. އޭގެ ފަހުން މެޗުގެ ދެ ވަނަ ހާފުގައި ރޯމާ އިން ވަނީ އިތުރު ދެ ލަނޑު ޖަހައިފަ އެވެ.

މެޗު ފަށައިގެން ދިހަ ވަނަ މިނެޓުގައި ރޯމާ އަށް ލީޑު ނަގައިދިނީ އެލެކްސިސް ސައެލެމައެކާސް އެވެ. އެއީ އެލްޑޯ ޝޮމޮރޮޑޯ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ ފަހުން މެޗުގެ ފުރަތަމަ ހާފު ނިމުމުގެ ކުރިން ޝޮމޮރޮޑޯ ވަނީ ރޯމާގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ.

މެޗުގެ ދެ ވަނަ ހާފުގައި، މެޗުގެ 73 ވަނަ މިނެޓުގައި ރޯމާގެ ތިން ވަނަ ލަނޑު ޖަހައި އިތުރަް ލީޑު ފުޅާ ކޮށްދިނީ އަންގެލީނޯ އެވެ. އޭގެ ފަހުން މެޗުގެ ފުރިހަމަ ވަގުތު ހަމަވާން ދެ މިނެޓަށް ވެފައި ވަނިކޮށް، ރޯމާގެ ހަތަރު ވަނަ ލަނޑު ޖެހީ ބްރިޔާން ކްރިސްޓިއަންޓޭ އެވެ.

މޮޅާއެކު ރޯމާ އޮތީ ލީގު ތާވަލްގެ ނުވަ ވަނަ މަގާމުގަ އެވެ. އެއީ މިހާތަނަށް އެ ޓީމު ކުޅެފައިވާ 26 މެޗުން 40 ޕޮއިންޓު ހޯދައިގެންނެވެ. 11 މެޗުން ރޯމާ މޮޅުވެފައިވާއިރު، ހަތް މެޗަކުން ވަނީ އެއްވަރުވެފަ އެވެ. މި ސީޒަންގެ ލީގުގައި ރޯމާ ވަނީ އަށް މެޗަކުން ބަލިވެފަ އެވެ.