ކަލިނިޗް އޭސީ މިލާނަށް..!

ފިއޮރެންޓީނާއަށް ކުޅެމުން އައި ކްރޮއޭޝިއާގެ ތަޖުރިބާކާރު ފޯވާޑް ނިކޮލާ ކަލިނިޗް އޭސީ މިލާނަށް ބަދަލުވެއްޖެއެވެ.

ކަލިނިޗް އޭސީ މިލާނަށް ސޮއިކުރީ މިއަހަރުގެ ފުޓްބޯޅަ ސީޒަނުގެ ނިޔަލަށް ލޯނެއްގެ ދަށުން ފަސް މިލިއަން ޕައުންޑަށެވެ. ލޯނެއްްގެ ދަށުން ކަިލނިޗް މިލާނަށް ބަދަލުވި ނަމަވެސް މި ސީޒަން ނިމުމުން އޭނާ ގަތުމުގެ ފުރުސަތު މިލާނަށް އޮތް ކަމަށް ވެސް އެ ކުލަބުން ވަނީ ހާމަކޮށްފައެވެ.

އުމުރުން 29 އަހަރުގެ ކަލިނިޗް އިޓަލީގެ ފިއޮރެންޓީނާއަށް ބަދަލުވީ 2015 ވަނަ އަހަރު އެވެ. އޭނާ 2015 ވަނަ އަހަރު ފިއޮރެންޓީނާއަށް ބަދަލުވި ފަހުން އެޓީމުގައި މޮޅުކުޅުމެއް ދައްކާފައިވާއިރު ކަލިނިޗް ވަނީ އިޓާލިއަން ލީގުގައި ފިއޮރެންޓީނާއަށް 68 މެޗު ކުޅެދީ 27 ގޯލު ކާމިޔާބުކޮށްދީފައެވެ.

ކަލިނިޗްއަކީ ކްރޮއޭޝިއާގެ ގައުމީޓީމުގައި ވެސް މުހިންމު ދައުރެއް އަދާ ކުރާ ކުޅުންތެރިއެކެވެ. އެގޮތުން އޭނާ ވަނީ ކްރެއޭޝިއާގެ ގައުމީ ޓީމަށް ވެސް މިހާތަނަށް 35 މެޗު ކުޅެދީ 14 ގޯލް ކާމިޔާބުކޮށްދީފައެވެ.

ކަލިނިޗްގެ އިތުރުން މިފަހަރުގެ އާ ސީޒަނަށް މިލާނުން ވަނީ ގިނަ ކުޅުންތެރިންތަކެއް ގެނެސްފައެވެ. އެގޮތުން ޔުވެންޓަސްއަށް ކުޅެމުން އައި އިތުބާރު ޑިފެންޑަރު ލިއަނާޑޯ ބޮނޫޗީ ހިމެނެއެވެ.