ހޯމަ ދުވަހުގެ މަޖިލީހުގެ ޖަލްސާ ބަލަން އިން އިރު ފާހަގަވީ މަޖިލީހުގަ ފުރަތަމަ ފަހަރަށް ރިޔާސީ ބަޔާނަށް ޖަވާބު ދޭ އިރު ދެން ތިބި މެމްބަރުން ހަޅޭއް ލަވާ އަޑު ގަދަކުރާ މަންޒަރެވެ. ދެން ފާހަގަވީ މަޖިލީހުގެ ރައީސް އަބްދުއްރަހީމް އަބްދުﷲ އަށް ފިއްތުމެއް ނެތް ކަން ދައްކަވަން އެ މަނިކުފާނަށް ކޮންމެހެން ވެސް މަޖުބޫރުވެވަޑައިގެންފައިވާ ކަމެވެ.

"ތިމަންނާ މަޖިލީހުގެ ރައީސްގެ ގޮނޑީގައި އިންނަނީ ނިކަން މިނިވަންކަމާ އެކު" ކަމަށް މަޖިލިސް ރައީސް ވިދާޅުވާތީ އަޑު އެހީމެވެ. އަދި ނިކަން އަޑަށް ބާރު ލައްވާފައި " އެއްވެސް ކަމަކަށް ހުރަހެއް ނެތް ކަމަށް" ވެސް ވިދާޅުވި އަޑު އިވުނެވެ.

މަޖިލީހުގަ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވަނީ އަބްދުއްރަހީމަކީ މިއަދު "ބަޑި ބައިންދާފައި އިން ރައްޔިތުންގެ މަޖިލީހުގެ ރައީސެއް" ކަމަށް ސިފަކުރައްވާފައެވެ. އެ ވާހަކަ އަށް ވަރަށް ބާރު އަޑުން އަބްދުއްރަހީމް އިންކާރުކުރެއްވިއެވެ.

އެކަމަކު ހޯމަ ދުވަހަށް އެކަނި ބެލިއަސް ފެނުނީ އަޑުގަދަ ކުރަމުން ދިޔަ މެމްބަރުންނާއި، ރިޔާސީ ބަޔާން އިއްވި ދުވަހު މެމްބަރުންނާއި ދެމެދު ތަފާތު މޭރުމަކުން އަމަލުކުރަން މަޖުބޫރުވެވަޑައިގަތް މަންޒަރެވެ. އެ ދުވަހު ބެހެއްޓެވި ހަރުކަށި ކަމެއް މިއަދަކު ނުފެނުނެވެ. ދެން ރިޔާސީ ބަޔާން އިއްވި ދުވަހު ރިޔާސަތުން އަމަލުކުރި މަންޒަރު ފެނުނީ އެހެން މެމްބަރެއްގެ އިޝާރާތަށެވެ. ބައެއް ފަހަރު މަޖިލީހުގެ ނައިބު ރައީސެވެ. އަނެއްބައި ފަހަރު ޕާޓީގެ ޕީޖީ ލީޑަރެވެ. މިނިވަން ވާނީ މިހާވަރަށް ނޫންތޯއެވެ.

އެއްތަށިން ނޫނީ ނުކައި ނޫޅެވުނު ދެ ވެރިން ކަމަށް ވާ މަޖިލީހުގެ ރައީސާއި ގައުމުގެ ރައީސުލްޖުމްހޫރިއްޔާގެ މެދުގައި މިއަދުވެސް އެ ގާތްކަން އޮތް ކަމަށް ދައްކަން ސަރުކާރުން ދަނީ މަސައްކަތްކުރަމުންނެވެ. އެހެނަސް ހަގީގަތަކީ އެންމެ ލޯބިވާ ދަރިފުޅުވެސް ވަޒީރުކަމުން ބޭރުކުރެއްވީއެވެ. އަދި ނު ގޮތަކަށް މަޖިލީހުގައި ބަހެއް ބުނެލައިފި ނަމަ މިއަދު މަޖިލީހުގެ ރައީސް ވެސް ހުންނެވީ މަޖިލިސް ރައީސްކަމުގެ އިތުރުން މެމްބަރުކަމުގެ ގޮނޑިވެސް ގެއްލިދާނެ ކަމުގެ ބިރުވެރިކަމުގައެވެ. އެހެންވީމަ ދެން މިނިވަން ވާނީ މިހާ ވަރަކަށް ނޫންތޯއެވެ؟