"ހަނިމާދޫ އަދި އައްޑޫ އެއަރޕޯޓްގެ މަސައްކަތުގެ ޝެޑިއުލް ބެލެހެއްޓުން ފިޔަވާ މި ސަރުކާރުން އެ މަޝްރޫޢުތައް ނިންމަން ކުރި ކަމެއް ނެތް"
ދަތުރުފަތުގެ ދާއިރާ އާއި ގުޅުން ހުރި ބައެއް ސަބްސިޑީޒް ތައް ކަނޑާލާތީ އެކަމާއި މެދު ނާޒިލް ކަންބޮޑުވުން ފާޅުކުރެއްވި
ހިތަދޫ ދެކުނު ދާއިރާގެ މެމްބަރު އިބްރާހީމް ނާޒިލް މަޖިލީހުގައި ވާހަކަދައްކަވަނީ
ހަނިމާދޫ އިންޓަރނޭޝަނަލް އެއަރޕޯޓާއި، އައްޑޫ އިންޓަރނޭޝަނަލް އެއަރޕޯޓްގެ މަސައްކަތުގެ ޝެޑިއުލް ބެލެހެއްޓުން ފިޔަވާ މި ސަރުކާރުން އެ މަޝްރޫޢުތައް ފުރިހަމަ ކުރި ކަމެއް ނެތް ކަމަށް އެމްޑީޕީ ޕާލިމެންޓްރީ ގްރޫޕްގެ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ވިދާޅުވެއްޖެއެވެ.
ނާޒިލް އެފަދައިން ވިދާޅުވީ މި އަހަރުގެ ރިޔާސީ ބަޔާނަށް ރައްދު ދެއްވަމުންނެވެ.
ނާޒިލް ވަނީ ތަފާތު އެކި ދާއިރާތަކުން ރައީސް ވެވަޑައިގަންނަވާފައިވާ ވައުދުތަކާއި ނުވެ ހުރި ކަންކަން އަދި ކަންބޮޑުވާ ގޮތަށް ސަރުކާރުން ކުރަމުންދާ ކަންކަމަށް އަލިއަޅުވާލައްވާފައެވެ.
އެގޮތުން ދަތުރުފަތުރުގެ ދާއިރާ އާއި ގުޅޭ ގޮތުން ވާހަކަދައްކަވަމުން، ނާޒިލް ވިދާޅުވީ ވެލާނާ އިންޓަރނޭޝަނަލް އެއަރޕޯޓް ނިމިދިޔަ އަހަރު ހުޅުވާނެ ކަމަށް ރައީސް ޑރ.މުހައްމަދު މުއިއްޒު ވައުދުވެވަޑައިގެންނެވި ނަމަވެސް އެކަން ވެސް ކުރެވިފައި ނުވާ ކަމަށެވެ. އަދި ހަނިމާދޫ އެއަރޕޯޓާއި އައްޑޫ އެއާޕޯޓުގެ މަސައްކަތަކީ ނިމިދިޔަ ސަރުކާރުގައި ކޮންޓްރެކްޓަރާއި މަސައްކަތް ހަވާލުކޮށް، މަސައްކަތް ނިމެން ކައިރިވެފައިވާ މަޝްރޫޢުތައް ކަމަށް ނާޒިލް ފާހަގަކުރެއްވިއެވެ. އެހެންނަމަވެސް ރައީސް މުއިއްޒު އެ ވާހަކަ ދައްކަވާ ގޮތުން އެއީ މި ސަރުކާރުގެ މަޝްރޫޢު އެއް ކަމަށް ސިފަކުރައްވާ ކަމަށް ނާޒިލް ވަނީ ވިދާޅުވެފައެވެ.
ވެލާނާ އިންޓަރނޭޝަނަލް އެއަރޕޯޓުގެ މަސައްކަތް މިދިޔަ އަހަރު ނިންމާނެ ކަމަށް ވިދާޅުވި. ހަނިމާދޫ އެއަރޕޯޓާއި އައްޑޫ އެއަރޕޯޓަކީ ނިމިދިޔަ ސަރުކާރުން ފަށާ، ފައިސާ ހަމަޖައްސާ، ހަވާލުކުރި މަސައްކަތެއް. މި އަހަރު އެ މަސައްކަތް ނިންމާނެ ކަމަށް ބުނި އިރު ހީވަނީ މިއީ މި ސަރުކާރުގެ ޕްރޮޖެކްޓްތައް ހެން.އެމްޑީޕީ ޕާލިމެންޓްރީ ގްރޫޕްގެ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް
ދަތުރުފަތުރުގެ ދާއިރާގައި ރައީސް މުއިއްޒުގެ ސިޔާސަތެއް ނެތް ކަމަށް ނާޒިލް ވަނީ ސިފަކުރައްވާފައެވެ. އެއާއި ޚިލާފަށް އެމްޑީޕީ ސަރުކާރުގައި ދަތުރުފަތުރުގެ ކަންކަން ކުރިއަށް ގެންދިޔައީ ވަރަށް ބޮޑަށް ރޭވުންތެރިކަމާއި އެކުގައި ކަމަށް ނާޒިލް ވަނީ ވިދާޅުވެފައެވެ.
މީގެ އިތުރުން އާރްޓީއެލް ނިޒާމަށް އަލިއަޅުވާލައްވަމުން ނާޒިލް ވިދާޅުވީ މި އަހަރު ތެރޭގައި އެ ނިޒާމް ފުރިހަމަކުރައްވާނެ ކަމަށް ރައީސް މުއިއްޒު ވެވަޑައިގެންފައިވާ ވައުދު ފުއްދަވާނެ ކަމަށް އުއްމީދުކުރައްވާ ކަަމަށެވެ. އެ މަޝްރޫޢު އަކީ ނިމިދިޔަ ސަރުކާރުން ބަޖެޓުން ހޭދަކޮށްގެން ކުރިއަށް ގެންދިޔަ މަޝްރޫޢު އެއްކަން ނާޒިލް ވަނީ ފާހަގަކުރައްވާފައެވެ.
އިތުރަށް ވާހަކަދައްކަވަމުން ނާޒިލް ވަނީ ދަތުރުފަތުރުގެ ދާއިރާ އާއި ގުޅުން ހުރި ބައެއް ސަބްސިޑީޒް ތައް ކަނޑާލާތީ އެކަމާއި މެދު ކަންބޮޑުވުން ފާޅުކުރައްވާފައެވެ.
