ކެފޭއަކުން ޚިދުމަތް ހޯދުމަށްފަހު ފައިސާ ނުދައްކައި ދާން އުޅުނު ކަމަށް ތުހުމަތުގައި ހައްޔަރުކުރި ޒުވާނެއްގެ ބަންދަށް 10 ދުވަސް
23 ފެބުރުއަރީ 2025 | އާދީއްތަ 05:17ހައްޔަރުކޮށްފައިވަނީ އދ.މާމިގިލި، 23 އަހަރުގެ ޔާޝިން ރަޝީދު
މާލޭގެ މަގެއް ބަންދުކޮށްެގެން ފުލުހުން ހަރަކާތްތެރިވަނީ - ފައިލް ފޮޓޯ
ކެފޭއަކުން ޚިދުމަތް ހޯދުމަށްފަހު ފައިސާ ނުދައްކައި ދާން އުޅުނު ކަމަށް ތުހުމަތު ކުރެވޭ މައްސަލައެއްގައި ހައްޔަރުކުރި ޒުވާނެއްގެ ބަންދަށް 10 ދުވަސް ޖަހައިފިއެވެ.
ފުލުހުން ބުނީ 20 ފެބްރުއަރީ 2025 ވަނަ ދުވަހުގެ ވަގުތެއްގައި ބުރުޒު މަގުގައި ހުންނަ ކެފޭއަކުން ޚިދުމަތް ހޯދުމަށްފަހު ފައިސާ ނުދައްކައި ދާން އުޅުނު ކަމަށް ތުހުމަތު ކުރެވޭ މައްސަލައެއްގައި ހަނދުވަރުދޭގެ، އދ.މާމިގިލި، 23 އަހަރުގެ ޔާޝިން ރަޝީދު ފުލުހުންގެ ބެލުމުގެ ދަށަށް ގެނެސްފައިވާ ކަމަށެވެ.
ޔާޝިން ރަޝީދުގެ ބަންދާ މެދު ގޮތެއް ނިންމުމަށް ކޯޓަށް ހާޒިރު ކުރުމުން 10 ދުވަހަށް ބަންދު ކުރުމަށް ކޯޓުން އަމުރުކޮށްފައިވާ ކަމަށް ފުލުހުން ބުނެއެވެ.
މި މައްސަލަ ފުލުހުން ގެންދަނީ އިތުރަށް ތަހުގީގު ކުރަމުންނެވެ.
