ޕާކިންގެ މައްސަލައަށް ހައްލެއް ގެނައުމަށް 5 އަހަރާއި 10 އަހަރުގެ މުއްދަތެއް ނަގާނެ، މިހާރު ވެސް ޕާކިން ބިލްޑިންގތައް އެޅުމުގެ މަސައްކަތްތައް ދަނީ ކުރަމުން: މޭޔަރު އާޒިމް
23 ފެބުރުއަރީ 2025 | އާދީއްތަ 05:13ޕާކިން ބިލްޑިންގތަކުގެ ޑިޒައިން މަސައްކަތްތައް ވަނީ ނިމިފައި
ފަސްކާފު ޕްރޮގްރާމްގައި މޭޔަރު އާޒިމް ވާހަކަދައްކަވަނީ
މާލެސިޓީއަށް ދިމާވެފައިވާ ޕާކިންގެ މައްސަލައަށް ރަނގަޅު ހައްލެއް ގެނައުމަށް ގާތްގަނޑަކަށް 5 އަހަރާއި 10 އަހަރުގެ މުއްދަތެއް ނަގާނެ ކަމަށާއި، މިހާރު ވެސް ޕާކިން ބިލްޑިންގތައް އެޅުމުގެ މަސައްކަތްތައް ކުރަމުންދާ ކަމަށް މާލޭ ސިޓީގެ މޭޔަރު އާދަމް އާޒިމް ވިދާޅުވެއްޖެއެވެ.
ރާއްޖެޓީވީގެ ފަސްކާފު ޕްރޮގްރާމްގައި ވާހަކަދައްކަވަމުން މޭޔަރު އާޒިމް ވިދާޅުވީ މާލެސިޓީގައި މިހާރު ހުރި ވެހިކަލްތައް ޕާކު ކުރުމަށް ގޮތްތަކެއް ހޯދަންޖެހޭ ކަމަށާއި، ޕާކިން ބިލްޑިންގތައް އަޅަންޖެހޭ ކަމަށެވެ. ސައިކަލު ޕާކިންއަށް ވެސް ރަނގަޅު އަދަދެއް ކަނޑައަޅައި، 2000 ކާރު ޕާކިން ސްލޮޓް ކަނޑައަޅަންޖެހޭ ކަމަށެވެ. މިގޮތަށް މިކަން ކުރެވުމުން މާލޭގެ މަގުތަކުގައި ވެހިކަލް ޕާކު ކުރުން ވަރަށް ބޮޑަށް މަދުވެގެންދާނެ ކަމަށް އޭނާ ވިދާޅުވިއެވެ.
ޕާކިންގެ މައްސަލަ ހައްލު ކުރުމަށް ސިޓީ ކައުންސިލުން ކުރަމުންދާ މަސައްކަތްތަކަށް އިޝާރާތް ކުރައްވައި އާޒިމް ވިދާޅުވީ ބޭނުންނުކޮށް ގިނަ ދުވަސްވެފައިވާ ސަހަރާތައް ހުސްކުރުމުގެ މަސައްކަތާއި، މިހާރު ކައުންސިލްގެ ބެލުމުގެ ދަށުގައި ހުރި ބިންތައް ޕާކިންއަށް ޚާއްސަ ކުރުމުގެ މަސައްކަތްތައް ކުރަމުންދާ ކަމަށެވެ. އަދި މިސަރަހައްދުތައް ތަރައްގީ ކުރެވިގެންދާނީ ކުޅިވަރު ކުޅޭވޭނެ ފެސިލިޓީތަކާއެކު، ހިތްފަސޭހަ މާހައުލެއްގައި މީހުންނަށް މަޑުކޮށްލައިގެން ތިބެވޭ ގޮތަށް ކަމަށެވެ.
އެކަހަލަ ބޮޑެތި ހަރަދު މިކުރެވެނީ ދައުލަތަށް. ދައުލަތުގެ އެހީތެރިކަން ލިބުނީމަ. އެހެންވީމަ އަޅުގަނޑުމެން ސަރުކާރުގައި އެބަ އެދެން އަޅުގަނޑުމެންގެ އަތުގައި ހުރި ހުސްބިންތަކުގައި މިކަހަލަ ކަންތައްތައް ކުރުމުގެ ބަޖެޓު ވެސް ހަމަޖައްސަވައިދެއްވާށޭ. އަޅުގަނޑުމެންނަށް ފަސޭހަވާނެ މިކަންތައްތައް ކުރަން. އަޅުގަނޑުމެން އަމިއްލައަށް ވެސް މަސައްކަތްތަކެއް އެބަކުރަން. މިކަމަށް ހައްލެއް ހޯދުމަށް. ހަމަ ފެނިވަޑައިގަންނަވާނެ އަޅުގަނޑުމެން މާލޭގައި ބޭނުންނުކޮށް ހުރި ޒަމާންވެފައި ހުރި 20، 30 އަހަރު ވަންދެން މީހުން ވަޅުނުލާ ހުރި ތަންތަން ހުސްކުރުމުގެ މަސައްކަތް އެބަ ކުރެވޭ. އެއީ ވެސް ކޮންމެވެސް ވަރެއްގެ ޕާކިންގެ ހައްލުތަކެއް ހޯދާ ރައްޔިތުންނަށް ހިތްފަސޭހަ ތަންތަން ދިނުމަށްޓަކައި އަޅުގަނޑުމެންކުރާ ވަރަށް ބުރަ ބޮޑު މަސައްކަތެއް. ކުޑަކުޑަ ބަޖެޓުން މިކަން މިކުރަނީ.މާލެސިޓީގެ މޭޔަރު އާދަމް އާޒިމް
ޕާކިން ބިލްޑިންގތަކުގެ ޑިޒައިން މަސައްކަތްތައް ނިމިފައިވާކަން ފާހަގަކުރައްވައި އާޒިމް ވިދާޅުވީ އެ ބިލްޑިންގގައި ގާތްގަނޑަކަށް 300 އެއްހާ ކާރު ޕާކު ކުރެވޭނެ ކަމަށެވެ. އަދި ކައުންސިލްއާއި މި ބިލްޑިންތަކުގެ މަސައްކަތް ސަރުކާރުން ހަވާލުކުރި ހުރީ ވަރަށް ބޮޑަށް ސައިކަލު ޕާކިންއަށް ޚާއްސަކޮށްފައި ކަމަށާއި، މިމަސައްކަތް ކުރިއަށް ގެންދިއުމުގައި ރައްޔިތުންނާއި، ކައުންސިލް މެންބަރުންގެ ލަފާ ހޯދާނެ ކަމަށް އޭނާ ވިދާޅުވިއެވެ.
މީގެ އިތުރުން އާޒިމް ވިދާޅުވީ، މޭޔަރުކަން ލިބި، ކައުންސިލް މަސައްކަތްތަކާއި ހަވާލުވި ފަހުން މި މަޝްރޫއުތައް ކުރިއަށް ގެންދިއުމަށް އިންފްރާސްޓްރަކްޗަރ މިނިސްޓްރީއަށް ގެންދިޔަ ކަމަށެވެ. އޭގެ ގާތްގަނޑަކަށް 8 މަސް ފަހުން އަނެއްކާ ވެސް ކައުންސިލުން މިމަޝްރޫއުތައް ކުރިއަށް ގެންދިއުމަށް ހަވާލުކޮށްފައިވާ ކަމަށާއި، އެކަމުގެ ސަބަބުން މަސައްކަތްތަކަށް ވަރަށް ބޮޑަށް ލަސްކަމެއް އައިސްފައިވާ ކަމަށް އާޒިމް ވިދާޅުވިއެވެ. އާޒިމް ވިދާޅުވީ މިނިސްޓްރީން މިމަޝްރޫއުތައް ކުރިއަށް ގެންދިއުމަށް ހަވާލުކުރިއިރު އެއްވެސް މަސައްކަތެއް ކޮށްފައިނުވާ ކަމަށެވެ. އަދި ވިދާޅުވީ މިހާރު ކޮންޓްރެކްޓަރުންނާއި މަޝްވަރާ ކުރެވި މަސައްކަތްތައް ފަށާފައިވާ ކަމަށެވެ.
އާޒިމް ވިދާޅުވީ މާލެސިޓީއަށް ދިމާވެފައިވާ ޕާކިންގެ މައްސަލަ ހައްލު ކުރުމަށް ވެހިކަލް އެތެރެ ކުރުމުގައި ވެސް ހަރުދަނާ އުސޫލެއްގެ ދަށުން ލިމިޓެއް ގެންނަންޖެހޭ ކަމަށެވެ. އަދި ގާއިމް ކުރެވޭ ޕާކިން ބިލްޑިންތަކާއެކު، ހަރުދަނާ މަސައްކަތްތަކެއް ކުރެވޭނަމަ ގާތްގަނޑަކަށް 5 އަހަރާއި، 10 އަހަރުގެ ދުވަހުގެ ތެރޭގައި މާލެސިޓީގެ ޓްރާންސްޕޯޓުގެ މައްސަލާއާއި، ޕާކިންގެ މައްސަލައަށް އެދެވިގެންވާ ހައްލެއް އަންނާނެ ކަމަށް އާޒިމް ވިދާޅުވިއެވެ.
