ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު، ރައްޔިތުންގެ މަޖިލީހުގެ ރައީސް ޢަބްދުއްރަހީމް ޢަބްދުﷲއާ ބައްދަލު ކުރައްވަަމުން އެބަ ގެންދަވަ އެވެ.

ރައީސް މުޢިއްޒުއާ ބައްދަލު ކުރެއްވުމަށް، ޢަބްދުއްރަހީމް ވަނީ ބުރާސްފަތި ދުވަހު ރައީސުލްޖުމްހޫރިއްޔާގެ އޮފީހަށް ވަޑައިގެންފަ އެވެ. އަދި ރައީސް އޮފީހުގެ ދޮރުން ޢަބްދުއްރަހީމްގެ ކާރުކޮޅު ވަންނަ މަންޒަރު ފެންނަ ފޮޓޯ ވަނީ ސޯޝަލް މީޑިއާގައި ވެސް ދައުރުވާން ފަށައިފަ އެވެ.

ރައީސް މުޢިއްޒުއާ ބައްދަލު ކުރައްވަން ޢަބްދުއްރަހީމް ވަޑައިގެންނެވިއިރު، ދެ ބޭފުޅުންގެ ގުޅުން ގޯސްވެފައިވާ ކަމަށް ޢަބްދުއްރަހީމް ވަނީ މީގެ ކުރިން ވިދާޅުވެފަ އެވެ. އެއީ ފަތުރުވެރިކަމާ ބެހޭ ވަޒީރުކަމުގައި ހުންނެވި ޢަބްދުއްރަހީމްގެ ދަރިކަލުން އިބްރާހީމް ފައިސަލް އެ މަގާމުން ވަކި ކުރި ދުވަހު އެވެ.

އެ ދުވަހު މެލޭޝިޔާގައި ހުންނަވާ ރާއްޖޭގެ މީޑިއާ އަކަށް ދެއްވި އިންޓަވިޔުއެއްގައި ޢަބްދުއްރަހީމް ވިދާޅުވެފައި ވަނީ، މި ވެރިކަން ފެށުނުއިރު ރައީސް މުޢިއްޒުއާ އޮތް ގާތް ގުޅުން އޮތް ނަމަ، އޭނާގެ ދަރިކަލުން ފައިސަލް މަގާމުން ވަކި ނުކުރައްވާނެ ކަމަށެވެ.

އަދި ފައިސަލް ގެންދެވީ އޭނާއާ ހަވާލު ކުރި މަސައްކަތާއި، ޒިންމާ ވަރަށް ފުރިހަމަ އަށް އަދާ ކުރައްވަމުން ކަމަށާއި، އޭނާގެ މަގާމުން ވަކި ކުރަން ރައީސް މުޢިއްޒު ނިންމެވި ސަބަބެއް އެއްގޮތަކަށް ވެސް ނޭނގޭ ކަމަށް ޢަބްދުއްރަހީމް އެ ދުވަހު ވަނީ ވިދާޅުވެފަ އެވެ.

އޭގެ ފަހުން އެ ދަތުރުފުޅު ކުރުކޮށްލެއްވުމަށް ފަހު ޢަބްދުއްރަހީމް މާލެ ވަޑައިގެންނެވިއިރު، އޭނާއާ ރައީސް މުޢިއްޒުގެ ގުޅުން ވަރަށް ބޮޑަށް ގޯސްވެފައިވާ ކަމުގެ އަޑުތައް އޮތީ ފެތުރިފަ އެވެ. އަދި ރައްޔިތުންގެ މަޖިލީހުގެ ރައީސްކަމުގެ މަގާމުން ޢަބްދުއްރަހީމް ދުރުކުރުމުގެ މަޝްވަރާތައް ކުރެވުނު ކަމަށް ވެސް ޕީއެންސީގެ ބައެއް މަޖިލިސް މެމްބަރުން އޭރު ވަނީ ވިދާޅުވެފަ އެވެ.

ދެ ރައީސުންގެ ގުޅުން ވަރަށް ބޮޑަށް ގޯސްވެފައިވާ ކަމުގެ އަޑުތައް ފެތުރިފައިވާއިރު، ސަރުކާރުގައި ތިބި ޢަބްދުއްރަހީމާ ގުޅުން އޮތް ބޭފުޅުން މަގާމުތަކުން ވަކި ކޮށްފައިވެ އެވެ. އޭގެ ތެރޭގައި ސަރުކާރުގެ ކުންފުނިތަކުގެ އިސްވެރިން ވެސް ހިމެނެ އެވެ.

އެކަމާ ގުޅިގެން، ރާއްޖެ ވަޑައިގެންނެވި ފަހުން މީޑިއާތަކާ ޢަބްދުއްރަހީމް ވާހަކަ ދައްކަވާފައި ނުވެ އެވެ. އެެކަން އެެހެން އޮއްވާ، ބުރާސްފަތި ދުވަހު، ރައީސް މުޢިއްޒުއާ ބައްދަލު ކުރެއްވުމަށް ޢަބްދުއްރަހީމް ވަނީ ރައީސް އޮފީހަށް ވަޑަައިގެންފަ އެވެ.