ޔުކްރެއިން ހަނގުރާމަ އާ ބެހޭ ގޮތުން ރަޝިޔާ، އެމެރިކާ އޮފިޝަލުން ސައުދީގައި ބައްދަލު ކުރައްވަނީ

ޔުކްރެއިންގެ ހަނގުރާމައާ ބެހޭގޮތުން މަޝްވަރާ ކުރުމަށް އެމެރިކާ އަދި ރަޝިޔާގެ އޮފިޝަލުން ސައުދީ އަރަބިއްޔާގެ ރިޔާޟު ގައި ބައްދަލުކޮށްފިއެވެ.

އެމެރިކާ އަދި ރަޝިޔާގެ އޮފިޝަލުން އަންގާރަ ދުވަހު ރިޔާޟް ގައި ބައްދަލުކުރީ، ކުރީގެ ފިނިހަނގުރާމައިގެ ދެ ހަތުރުން، މި ފަހުގެ ތާރީޚެއްގައި ކުރާ އެންމެ މުހިންމު މަޝްވަރާތަކަށް ކަމަށް ރިޕޯޓުތައް ބުނެއެވެ.

ރޫސީ ވަފުދުގެ އިސްވެރިޔާގެ ގޮތުގައި ހުންނެވީ ޚާރިޖީ ވަޒީރު ސަރގޭ ލަވްރޮވް ހުންނެވި އިރު އެމެރިކާގެ ވަފުދު ގައި އެ ގައުމުގެ ސެކްރެޓަރީ އޮފް ސްޓޭޓް މާރކޯ ރޫބިއޯ ހިމެނިވަޑައިގަންނަވައެވެ.

މިއީ މޮސްކޯ އިން ޔުކްރެއިން ގައި ފަށާފައިވާ ހަނގުރާމަ ނިންމުމާ ބެހޭގޮތުން މިހާތަނަށް ބޭއްވޭ އެންމެ މުހިންމު މަޝްވަރާ ތައް ކަމަށް ވެސް ޚަބަރުތަކުގައި ވެއެވެ.

މި ދެފަރާތުން މަޝްވަރާ ތަކުގައި ޔުކްރެއިންގެ ހަނގުރާމަ ނިންމުމުގެ އިތުރުން އެމެރިކާ-ރަޝިޔާގެ ގުޅުން އަލުން ރަނގަޅުކުރުމާ ބެހޭގޮތުން ވާހަކަތައް ދެއްކުމަށް ވަނީ ހަމަ ޖެހިފައެވެ.

މި މަޝްވަރާތަކުން އެމެރިކާގެ ރައީސް ޑޮނަލްޑް ޓްރަމްޕް އަދި ރަޝިޔާގެ ރައީސް ވްލަޑިމިއަރ ޕުޓިން އާ ދެމެދު ބޭއްވޭ ސަމިޓަކަށް މަގުފަހިވެދާނެއެވެ.

މި މަޝްވަރާތަކުގައި ޔުކްރެއިން އަށް ދައުވަތު ދީފައެއް ނުވެއެވެ. ޔުކްރެއިން އިން ބުނެފައިވަނީ ރިޔާޟް ގައި އެ ޤައުމުގެ ނަމުގައި ސުލްހައެއްގެ އެއްވެސް އެއްބަސްވުމެއް ނުހެދޭނެ ކަމަށެވެ.

ރަޝިޔާ އިން ބުނެފައި ވަނީ އެ ޤައުމުގެ ފޮރިން މިނިސްޓަރު ސަރގޭ ލަވްރޯވް، އެމެރިކާގެ އިސް އޮފިޝަލުންނާ ބައްދަލު ކުރައްވާނެ ކަމަށެވެ. މީގެ ތެރޭގައި ސެކްރެޓަރީ އޮފް ސްޓޭޓް މާކޯ ރޫބިއޯ ހިމެނެއެވެ.

ސައުދީ އަރަބިޔާގައި ބޭއްވޭ މަޝްވަރާތަކުގެ ކުރިން، އަންގާރަ ދުވަހު ރަޝިޔާގެ ސޮވްރިން ވެލްތު ފަންޑުގެ އިސްވެރިޔާ ޓްރަމްޕް ސިފަކޮށްފައިވަނީ މައްސަލަތައް ހައްލުކުރައްވާ ބޭފުޅެއްގެ ގޮތުގައެވެ.

"އަޅުގަނޑުމެންނަށް ފެންނަނީ ރައީސް ޓްރަމްޕް އަދި އޭނާގެ ޓީމަކީ މައްސަލަތައް ހައްލުކުރާ ބައެއްގެ ގޮތުގައި، ވަރަށް އަވަހަށް، ވަރަށް ހަރުދަނާ ކަމާއެކު އަދި ވަރަށް ކާމިޔާބު ކަމާއެކު ގިނަ ބޮޑެތި ގޮންޖެހުންތަކާ ކުރިމަތިލައްވާފައިވާ ބައެއް،" ކިރިލް ޑްމިޓްރިއެވް ރިޔާޟު ގައި ނޫސްވެރިންނަށް ވިދާޅުވިއެވެ.

ހަނގުރާމަ ހުއްޓާލުމުގެ ވާހަކަތައް ކުރިއަށް ދާ އިރު، ޔުކްރެއިންގެ ސިފައިން ބުނާ ގޮތުގައި އަންގާރަ ވިލޭރޭގެ ވަގުތެއްގައި ރަޝިޔާއިން 147 ހަމަލާދޭ ޑްރޯން ޔޫކްރެއިން އަށް އަމާޒުކޮށް ފޮނުވާލާފައިވެއެވެ. މީގެ ތެރެއިން 83 ޑްރޯން ވަނީ ވައްޓާލެވިފައެވެ.

އެނެއްކޮޅުން ހޯމަ ދުވަހު ޕެރިހުގައި ޔޫރަޕުގެ ލީޑަރުން ގެންދަވަނީ ޔުކްރެއިންގެ ހަނގުރާމަ އާ ޔޫރަޕް ގެ ސަލާމަތާ ބެހޭ މަޝްވަރާ ކުރުމަށް ވަނީ ބައްދަލު ކުރައްވާފައެވެ.

ޔުކްރެއިން ހަނގުރާމައިގައި މުހިންމު ދައުރެއް އަދާ ކުރަމުން އައި ވިލާތުގެ އިއްތިހާދަށް، އެމެރިކާގެ ރައީސް އިސް ނަންގަވައިގެން ފައްޓަވާފައިވާ މަސައްކަތުގެ ސަބަބުން ކުއްލި ސިހުމެއް ލިބިފައިވާ ކަމަށް ރިޕޯޓުތައް ބުނެއެވެ.

ޔޫރަޕުގެ ލީޑަރުން ބުނެފައިވަނީ ވިލާތުގެ ދިފާޢީ ކަންކަމަށް އިތުރަށް އިންވެސްޓްކޮށް، ޔުކްރެއިނަށް ސަލާމަތީ ގެރެންޓީތައް ދިނުމުގައި އިސްދައުރެއް އެ އިއްތިހާދުން އަދާކުރާނެ ކަމަށެވެ.