ދެ ވަނަ ލެގުގައި އަލަބާ އަދި ރޫޑިގާ އަށް ކުޅެވޭނެ!

ޔުއެފާ ޗެމްޕިއަންސް ލީގުގެ ޕްލޭ އޮފްގެ ދެ ވަނަ ލެގުގައި މެންޗެސްޓަރ ސިޓީއާ ދެކޮޅަށް ކުޅޭ މެޗުގައި، ރެއާލް މެޑްރިޑުގެ މުހިންމު ދެ ކުޅުންތެރިން ކަމަށްވާ ޑޭވިޑް އަލަބާ އަދި އެންޓޯނިއޯ ރޫޑިގާ އަށް ކުޅެވޭނެ ކަމަށް ބުނެފި އެވެ.

ސިޓީގެ އަމިއްލަ ދަނޑުގައި މި ދެ ޓީމު ކުޅުނު ފުރަތަމަ ލެގު ރެއާލް އިން ކާމިޔާބު ކުރީ 3-2 އިންނެވެ. އެއީ މެޗުގެ ފަހު ވަގުތުގައި ލަނޑު ޖަހައިގެންނެވެ. އެ މެޗުގައި މި ދެ ކުޅުންތެރިން ކުޅެފައި ނުވަނީ އަނިޔާ އިން މުޅިން ރަނގަޅު ނުވާތީ އެވެ. ނަމަވެސް ރެއާލްގެ އަމިއްލަ ދަނޑުގައި ކުޅޭ ދެ ވަނަ ލެގުގައި އެ ދެ ކުޅުންތެރިން ބޭނުންވާ ކަމުގެ މުހިންމުކަން ރެއާލްގެ ކޯޗު ކާލޯ އަންޗެލޮޓީ ވަނީ ފާހަގަ ކޮށްފަ އެވެ.

ބުދަ ދުވަހުގެ ރޭ ސިޓީއާ ދެކޮޅަށް ރެއާލުން ކުޅޭ ދެ ވަނަ ލެގުގެ ކުރިން އެ ޓީމުން ކުރިއަށް ގެންދިޔަ ފަރިތަކުރުމުގައި އެ ދެ ކުޅުންތެރިން ވެސް ވަނީ ބައިވެރިވެފަ އެވެ. އެހެންކަމުން ސިޓީއާ ދެކޮޅަށް ކުޅޭ ދެ ވަނަ ލެގުގައި އެ ދެ ކުޅުންތެރިންނަށް ކުޅެވޭނެ ކަމަށް ރިޕޯޓުތަކުގައި ވަނީ ބުނެފަ އެވެ. އަދި އެއީ މިވަގުތު އަންޗެލޮޓީ އަށް އޮތް ވަރަށް ބޮޑު ހިތްހަމަ ޖެހުމެއް ކަމަށް ވެސް ބުނެފައިވެ އެވެ.

ރޫޑިގާ އަށް އަނިޔާވެފައި ވަނީ ސްޕެނިޝް ލީގުގައި ރެއާލް އިން އެސްޕަންޔޯލާ ދެކޮޅަށް ކުޅުނު މެޗުގަ އެވެ. އަލަބާ އަށް އަނިޔާވެފައި ވަނީ، ފަރިތަކުރުންތަކުގައި ބައިވެރިވަމުން ދަނިކޮށެވެ. އެއީ ކުރިން ލިބުނު އަނިޔާ އިން ރަނގަޅު ފަރިތަކުރުންތަކަށް ނިކުމެ، ފަރިތަކުރުންތަކުގައި ބައިވެރިވަމުން އަންނަނިކޮށެވެ.

ދެ ވަނަ ލެގުގައި ރެއާލްގެ އަމިއްލަ ދަނޑުގައި އެ ޓީމުން ސިޓީއާ ދެކޮޅަށް ނިކުންނާނީ ބުދަ ދުވަހުގެ ރޭ ދަންވަރު ރާއްޖެ ގަޑިން އެކެއް ޖަހާއިރު އެވެ.