"އީރާނުގެ ނިއުކްލިއަރ ޕްރޮގްރާމް ދިފާޢުކޮށް، އެކަން ކުރިއަށް ގެންދިއުމުގައި ފަސްނުޖެހޭނެ" ކަމަށް އީރާނުގެ ޚާރިޖިއްޔާގެ ތަރުޖަމާނު އިސްމާޢީލް ބަޣާއީ ހޯމަ ދުވަހު ވިދާޅުވެއްޖެއެވެ.

ބަޣާއީ މިހެން ވިދާޅުވިއިރު، އޭގެ ކުރީ ދުވަހު އެމެރިކާ އާއި އިސްރާއީލުން ވަނީ އީރާނުގެ ނިއުކްލިއަރ ޕްރޮގްރާމާ ދެކޮޅަށް މަސައްކަތް ކުރާނެ ކަމަށް ބުނެފައެވެ.

"އީރާނުގެ ސުލްޙަވެރި ނިއުކްލިއަރ ޕްރޮގްރާމް ކުރިއަށް ދާނެ، އަދި ވޭތުވެދިޔަ 30 އަހަރު ވެސް ވަނީ ކުރިއަށް ގޮސްފައި. މިއީ ނިއުކްލިއަރ ހަތިޔާރާ ދެކޮޅަށް އެކުލަވާލާފައިވާ މުޢާހަދާގެ މެންބަރެއްގެ ހައިސިއްޔަތުން އީރާނަށް ލިބިގެންވާ ޙައްޤުތަކުގެ މައްޗަށް ބިނާކޮށް... މި ކަމުގައި އީރާނުން އެއްވެސް ހާސްކަމެއް ދައްކާކަށް ނުޖެހޭ،" އޭނާ ވިދާޅުވިއެވެ.

އިސްރާއީލާއި އެމެރިކާ އިން އީރާނުގެ ނިއުކްލިއަރ އުއްމީދުތައް ނާކާމިޔާބު ކޮށް މެދު އިރުމަތީ ގައި އެގައުމުގެ ނުފޫޒު ހުއްޓުވުމަށް މަސައްކަތްކުރުމަށް ނިންމާފައިވާ ކަމަށް ޖެރޫސަލަމްގައި އެމެރިކާގެ ސްޓޭޓް ސެކްރެޓަރީ މާކޯ ރޫބިއޯއާ ބައްދަލު ކުރެއްވުމަށް ފަހު އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އާދީއްތަ ދުވަހު ވަނީ ވިދާޅުވެފައެވެ.

ރޫބިއޯ ވިދާޅުވީ: "ކޮންމެ ޓެރަރިސްޓް ގްރޫޕެއްގެ ފަހަތުގައި، ކޮންމެ އަނިޔާވެރި ޢަމަލެއްގެ ފަހަތުގައި، ކޮންމެ ހަމަޖެހުން ނަގާލާ ޙަރަކާތެއްގެ ފަހަތުގައި، މި ސަރަޙައްދުގައި ދިރިއުޅޭ އެތައް މިލިއަން މީހުންގެ ސުލްޙައާއި ހަމަޖެހުމަށް ނުރައްކާވާ ކޮންމެ ކަމެއްގެ ފަހަތުއްގެ ފަހަތުގައި ވަނީ އީރާނެވެ."