އަމާނަ ތަކަފުލްގެ މި އަހަރުގެ ފުރަތަމަ ހަތް މަސް ދުވަހުގެ ވިޔަފާރީގެ ފައިދާ ކުންފުނީގެ ހިއްސާދާރުންގެ މެދުގައި ބެހުމަށް އެ ކުންފުނިން ނިންމައިފި އެވެ.
އަމާނަތަކަފުލް އިން އާންމު ކުރި ނޫސް ބަޔާނެއްގައި ބުނީ، މި އަހަރުގެ ޖުލައި 31 ވަނަ ދުވަހާ ހަމައަށް ކުންފުނީގެ ސާފު ފައިދާގެ ގޮތުގައި 4.8 މިލިއަން ރުފިޔާ އެ ކުންފުންޏަށް ލިބިފައިވާ ކަމަށެވެ. މިއީ ވޭތުވެ ދިޔަ އަހަރުގެ ފުރަތަމަ ހަތް މަސް ދުވަހާ އަޅާ ބަލާ އިރު 21 ޕަސެންޓް އިތުރު އަދަދެއް ކަން އަމާނަތަކަފުލް އިން ފާހަގަކުރެއެވެ.
މި އަހަރުގެ މިހާތަނަށް ބަދަލުގެ ގޮތުގައި، އިންޝުއާ ކޮށްފައިވާ ފަރާތްތަކަށް 24.3 މިލިއަން ރުފިޔާ ދީފައިވާ ކަމަށާއި ރިސްކް ފަންޑަށް 27 ޕަސެންޓް ކުރިއެރުމެއް ލިބިފައިވާ ކަމަށް ވެސް އެ ކުންފުނިން ބުނެއެވެ.
ހިއްސާދާރުންގެ ފަންޑު ވޭތުވެ ދިޔަ އަހަރުގެ މި މުއްދަތާ އަލާބަލާ އިރު 19 ޕަސެންޓް އިތުރުވެފައިވާ ކަމަށާއި މައިގަނޑު ތަކަފުލް ކުލާސްތަކުން ލިބުނު ކުރިއެރުމާ އެކު ކުންފުނީގެ ޖުމްލަ އާމްދަނީ ފާހަގަ ކުރެވޭ އަދަދަކަށް އިތުރުވެފައިވާ ކަމަށް ވެސް އަމާނަތަކަފުލް އިން ބުނެއެވެ.
އެ ކުންފުނީން ބުނީ ކުރިއެރުން ލިބިފައި ވަނީ އިންވެސްޓްމަންޓްތަކާއި އެހެނިހެން އާމްދަނީ އިތުރުވެގެން ދިއުމުގެ ސަބަބަބުން ކަމަށެވެ. އަދި ކުންފުނިން ހިފަހައްޓަމުން ގެންދާ އުސޫލީ މިންގަނޑުތަކަކީ ކުންފުނީގެ ކުރިއެރުމުގެ އެންމެ ބޮޑު ސިއްރުކަމުގައި އެކުންފުނިން ބުނެއެވެ.
އެ ކުންފުނީގެ މި އަހަރުގެ ފުރަތަމަ ހަތް މަސް ދުވަހުގެ ވިޔަފާރީގެ ފައިދާގެ ގޮތުގައި ހިއްސާދާރުންނަށް ހިއްސާއެއްގެ މޫނުމަތީ އަގުގެ ފަސް ޕަސެންޓް ދިނުމަށް އެކުންފުނިން ނިންމާފައިވާއިރު، މިމަހުގެ 30 ވަނަ ދުވަހާ ހަމައަށް އެ ކުންފުނީގެ ހިއްސާ ބައްލަވައިގެންފައިވާ ފަރާތްތަކަށް ވެސް ހިއްސާގެ ފައިދާ ބެހުމަށް ވަނީ ނިންމާފައެވެ.
