"އެމެރިކާގެ އެހީތެރި ކަމާއެކު، އަހަރުމެންނަށް އީރާނުގެ ކަންތައް ނިންމާލެވޭނެ": ނަތަންޔާހޫ

އިސްރާލާއި އެމެރިކާ ވަނީ އީރާނުގެ ނިއުކްލިއަރ އުއްމީދުތަކާއި މެދުއިރުމަތީގައި އެ ޤައުމުން ހިންގަމުންދާ "އަނިޔާވެރިކަން" ހުއްޓުވުމަށް އެއްބަސްވެފައިވާ ކަމަށް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އާދީއްތަ ދުވަހު ވިދާޅުވެއްޖެއެވެ.

މި މޭރުމުން އޭނާ ވާހަކަ ދެއްކެވީ މަގާމުގެ ހައިސިއްޔަތުން ކުރެއްވި ފުރަތަމަ ދަތުރުފުޅު އިސްރާއީލަށް ވަޑައިގެންނެވި އެމެރިކާގެ ސްޓޭޓް ސެކްރެޓަރީ މާކޯ ރޫބިއޯއާ ބައްދަލު ކުރެއްވުމަށް ފަހުގައެވެ.

ޖެރޫސަލަމްގައި ރޫބިއޯ އާ ބައްދަލު ކުރެއްވުމަށް ފަހު ވާހަކަފުޅު ދައްކަވަމުން ނަތަންޔާހޫ ވިދާޅުވީ އެ ދެ ބޭފުޅުން ވަނީ ގިނަ ކަންތައްތަކަކާ ބެހޭގޮތުން "ވަރަށް ފައިދާހުރި މަޝްވަރާއެއް" ކުރައްވާފައި ކަމަށެވެ. އަދި "އޭގެ ތެރެއިން އެންމެ މުހިންމު ކަމަކީ އީރާނުގެ މައްސަލަ" ކަމުގައި ވިދާޅުވިއެވެ.

"އިސްރާއީލާއި އެމެރިކާ ވަނީ އީރާނުގެ ނުރައްކާ ހުއްޓުވުމަށް ކޮނޑާ ކޮނޑު ޖައްސައިގެން" ކަމަށް އޭނާ ވިދާޅުވިއެވެ. "އާޔަތުﷲ ތައް ނިއުކްލިއަރ ހަތިޔާރު އުފެއްދުމަށް ދޫކޮށްގެން ނުވާނެ ކަމަށާއި އަދި އީރާނުން ސަރަޙައްދުގައި ހިންގަމުންދާ އަނިޔާވެރިކަން ހުއްޓުވަން ޖެހޭނެ ކަމަށް އަހަރުމެން ވަނީ އެއްބަސްވެފައެވެ."

ރޫބިއޯ ވިދާޅުވީ: "ކޮންމެ ޓެރަރިސްޓް ގްރޫޕެއްގެ ފަހަތުގައި، ކޮންމެ އަނިޔާވެރި ޢަމަލެއްގެ ފަހަތުގައި، ކޮންމެ ހަމަޖެހުން ނަގާލުމުގެ ޙަރަކާތެއްގެ ފަހަތުގައި، މި ސަރަޙައްދުގައި ދިރިއުޅޭ އެތައް މިލިއަން މީހުންގެ ސުލްޙަވެރިކަމާއި ހަމަޖެހުމަށް ނުރައްކާވާ ކޮންމެ ކަމެއްގެ ފަހަތުގައި ވަނީ އީރާނެވެ."

ނަތަންޔާހޫ ވިދާޅުވީ ޣައްޒާގައި ހިނގަމުންދާ ހަނގުރާމައިގައި އިސްރާއީލުން ވަނީ އީރާނަށް "ވަރުގަދަ ހަމަލާއެއް" ދީފައި ކަމަށެވެ. އަދި އެމެރިކާގެ ރައީސް ޑޮނަލްޑް ޓްރަމްޕްގެ އެހީތެރިކަމާއެކު "އަހަރެމެންނަށް މި މަސައްކަތް ނިންމާލެވޭނެ ކަމާމެދު އެއްވެސް ޝައްކެއް ނެތް" ކަމަށް ވިދާޅުވިއެވެ.

ޣައްޒާގައި އިސްރާއީލުން ގެންގުޅޭ ސިޔާސަތަށް "ސާފުކޮށް ތާއީދުކުރައްވާތީ" ރޫބިއޯ އަށް ޝުކުރު އަދާކުރައްވަމުން، ނަތަންޔާހޫ ވިދާޅުވީ ޓްރަމްޕްގެ ލީޑަރޝިޕް ގެ ދަށުން އިސްރާއީލާއި އެމެރިކާ އިން ފަލަސްތީނު މައްސަލައިގައި އެއް ސިޔާސަތެއް ގެންގުޅޭ ކަމަށެވެ.