އެމެރިކާ އިން އިސްރާއީލަށް އެމްކޭ-84 ބޮމުގެ ޝިޕްމަންޓެއް ފޮނުވާފައިވާ ކަމަށް އާދީއްތަ ދުވަހު އިސްރާއީލުގެ ދިފާއީ ވުޒާރާ އިން ބުނެފިއެވެ.

އެމެރިކާގެ ކުރީގެ ރައީސް ޖޯ ބައިޑެންގެ ސަރުކާރުން އިސްރާއީލަށް ބާރުގަދަ އެމްކޭ-84 ބޮން އެކްސްޕޯޓް ކުރުމަށް އަޅާފައިވާ ހުރަސް، މިހާރުގެ ރައީސް ޑޮނަލްޑް ޓްރަމްޕް ވެރިކަމަށް ވަޑައިގަތުމާއެކު ވަނީ ނައްތާލައްވާފައެވެ.

އެމްކޭ-84 އަކީ ގައިޑް ނުކުރެވޭ 2،000 ޕައުންޑުގެ ބޮމެކެވެ. މިއީ ބޯ ކޮންކްރީޓާއި މައުދަން ފަދަ ތަކެތި ފޫ އަޅުވާލާ ބޮޑު ސަރަހައްދަކަށް ގެއްލުން ދިނުމުގެ ބާރު ހުރި ބާވަތުގެ ބޮމެއް ކަމަށް ރިޕޯޓުތައް ބުނެއެވެ.

ބައިޑެންގެ އިދާރާއިން މި ބާވަތުގެ ބޮން އިސްރާއީލަށް އެކްސްޕޯޓް ކުރުމަށް ހުއްދަ ނުދިނީ، މީހުން ތޮއްޖެހިފައިވާ ޣައްޒާ އަށް މިފަދަ ބޮމެއް އަޅައިފިނަމަ އޭގެ ގެއްލުން ވަރަށް ބޮޑުވާނެ ކަމުގެ ކަންބޮޑުވުން އޮތުމުން ކަމަށް ރިޕޯޓުތައް ބުނެފައިވެއެވެ.

2023 ވަނަ އަހަރުގެ އޮކްޓޯބަރު 7 ވަނަ ދުވަހު ހަމާސް އިން އިސްރާއީލަށް ދިން ކުއްލި ހަމަލާއަށްފަހު، ބައިޑެން ސަރުކާރުން އިސްރާއީލަށް އެތައް ހާސް 2،000 ޕައުންޑުގެ ބޮން ފޮނުވިއެވެ. ނަމަވެސް ފަހުން އޭގެ އެއް ޝިޕްމަންޓް ހިފެހެއްޓިއެވެ.

"މިރޭ އިސްރާއީލަށް ލިބުނު ހަތިޔާރުގެ ޝިޕްމަންޓަކީ، ޓްރަމްޕްގެ ސަރުކާރުން ކޮށް ދިން ކަމެކެވެ. މިއީ އެއަރ ފޯސްއަށާއި އައިޑީއެފް އަށް ލިބުނު ވަރަށް މުހިންމު އެސެޓެކެވެ. އަދި މިއީ އިސްރާއީލާއި އެމެރިކާއާ ދެމެދު އޮތް ވަރުގަދަ އެކުވެރިކަމުގެ އިތުރު ހެއްކެކެވެ،" އިސްރާއީލުގެ ދިފާއީ ވަޒީރު އިސްރާއީލް ކަޓްޒް ހޮނިހިރު ދުވަހުގެ ރޭ ވިދާޅުވިއެވެ.

މި ޝިޕްމަންޓް އައީ، ފާއިތުވި މަހު ޣައްޒާގެ ހަނގުރާމަ ހުއްޓުމަކަށް ގެނައުމުގެ އެކުލަވާލި އެއްބަސްވުން އުވާލަފާނެ ކަމުގެ ކަންބޮޑުވުން އިތުރުވެފައިވާ ދަނޑިވަޅެއްގައެވެ. އެ އެއްބަސްވުމާ ޚިލާފުވެއްޖެ ކަމަށް ބުނެ އިސްރާއީލާއި ހަމާސް އިން އެއްބަޔަކު އަނެއް ބަޔަކަށް އަންނަނީ ތުހުމަތުތައް ކުރަމުންނެވެ.

ހަނގުރާމަ ފެށުނީއްސުރެ އެމެރިކާއިން އިސްރާއީލަށް އެތައް ބިލިއަން ޑޮލަރުގެ އެހީ ވަނީ ފޯރުކޮށްދީފައެވެ.