ލާޒިއޯ ބަލިކޮށް، އިންޓަ ތިން ވަނައިގައި

އިޓާލިއަން ލީގުގައި ލާޒިއޯއާ ދެކޮޅަށް ކުޅުނު މެޗުން މޮޅުވެ، އިންޓަ މިލާން އިން ތާވަލްގެ ތިން ވަނަ އަށް ޖެހިލައިފި އެވެ.

ލާޒިއޯގެ އަމިއްލަ ދަނޑުގައި ހޯމަ ދުވަހުގެ ރޭ ކުޅުނު މެޗު އިންޓަ އިން ކާމިޔާބު ކުރީ 6-0 އިންނެވެ. މެޗުގެ ފުރަތަމަ ހާފުގައި އިންޓަ އިން ވަނީ ދެ ލަނޑު ޖަހައިގެން ލީޑު ހޯދައިފަ އެވެ. އެ ޓީމުގެ އަނެއް ހަތަރު ލަނޑު ޖެހީ ދެ ވަނަ ހާާފުގަ އެވެ.

މެޗުގެ ފުރަތަމަ ހާފުގެ 41 ވަނަ މިނެޓުގައި އިންޓަ އަށް ލިބުނު ޕެނަލްޓީ ކާމިޔާބުކޮށް، ލީޑު ނަގައިދިނީ ހަކަން ޗްނޮގްލޫ އެވެ. އޭގެ ހަތަރު މިނެޓު ފަހުން ފެޑެރިކޯ ޑިމާކޯ ވަނީ އިންޓަގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އެ ލަނޑު އޭނާ ޖެހީ ޑެންޒެލް ޑަމްފްރީސް ތަނަވަސްކޮށްދިން ފުރުސަތެއްގަ އެވެ.

މެޗުގެ ދެ ވަނަ ހާފު ފަށައިގެން ހަ ވަނަ މިނެޓުގައި އިންޓަގެ ތިން ވަނަ ލަނޑު ޖެހީ ނިކޮލޯ ބަރެއްލާ އެވެ. އޭގެ ދެ މިނެޓު ފަހުން އެ ޓީމުގެ ހަތަރު ވަނަ ލަނޑު ޖެހީ ޑަމްފްރީސް އެވެ. މެޗުގައި އިންޓަގެ ފަސް ވަނަ ލަނޑު 77 ވަނަ މިނެޓުގައި ޖެހީ ކާލޮސް އަގުސްޓޯ އެވެ. މެޗުގައި އޭނާ ކުޅެން ނިކުތީ ވެސް ބަދަލު ކުޅުންތެރިޔެއްގެ ގޮތުގަ އެވެ. މެޗުގެ 90 ވަނަ މިނެޓުގައި އިންޓަގެ ހަ ވަނަ ލަނޑު ޖެހީ މާކަސް ތުރަމް އެވެ.

މޮޅާއެކު އިންޓަ ތިން ވަަނައިގައި އޮތީ މިހާތަނަށް ކުޅުނު 15 މެޗުން 34 ޕޮއިންޓާ އެކު އެވެ. ދެ ވަނައިގައި ނަޕޯލީ އަށް 35 ޕޮއިންޓު ލިބެނީ 16 މެޗު ކުޅެގެންނެވެ. އެއް ވަނައިގައި އޮތް އެޓަލަންޓާ އަށް 37 ޕޮއިންޓު ލިބެނީ ވެސް 16 މެޗުންނެވެ.