ރައީސް ޞާލިހުގެ ސަރުކާރުން ފެނަކައާއި ހަވާލުކޮށްފައި ހުރި 14 އައިސްޕްލާންޓް މިފްކޯއާ ހަވާލުކޮށްފި
ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ފެނަކައާ ހަވާލުކޮށްފައި ހުރި 14 އައިސްޕްލާންޓު ސަރުކާރުގެ މަސް ކުންފުނި މިފްކޯއާ ހަވާލުކުރީ ހޮނިހިރު ދުވަހު
ފެނަކަ ދަށުގައި ހުރި އައިސް ޕްލާންޓުތައް މިފްކޯއާ ހަވާލުކުރުމުގެ ތެރެއިން. ފޮޓޯ: މިފްކޯ
ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ފެނަކައާ ހަވާލުކޮށްފައި ހުރި 14 އައިސްޕްލާންޓު ސަރުކާރުގެ މަސް ކުންފުނި މިފްކޯއާ ހޮނިހިރު ދުވަހު ހަވާލުކޮށްފި އެވެ.
ފެނަކައިގެ ދަށުގައި ހުރި އައިސްޕްލާންޓް ތައް މިފްކޯގެ ދަށަށް ގެންނަން ނިންމީ ހޮނިހިރު ދުވަހު އެކަމަށް ބޭއްވި ޚާއްސަ ރަސްމިއްޔާތެއްގައެވެ.
ފެނަކަ އާއި މިފްކޯއާ ދެމެދު ވެވުނު މި އެއްބަސްވުމުގެ ރަސްމިއްޔާތުގައި ފެނަކައިގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު މުހައްމަދު ނަޖާހު އެވެ. އަދި މިފްކޯގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ ސީއީއޯ ޑރ. ވިޓާލީ ލުބިމޯވް އެވެ.
މިފްކޯއިން ބުނީ އެ ކުންފުނީގެ ޓެކްނިކަލް އަދި އިންޖީނިއަރިން ޓީމްތައް ހުރިހާ އައިސްޕްލާންޓް ތަކެއް އޮޕަރޭޝަނަލް ކެޕޭސިޓީ އަށް ގެނައުމަށް އަލުން އާރާސްތުކުރުމުގެ މަސައްކަތުގައި މިހާރުވެސް ހަރަކާތްތެރި ވަމުންދާ ކަމަށެވެ.
އަދި މި ބަދަލަކީ މިފްކޯއިން ދޭ ހިދުމަތުގެ ގާބިލުކަން ހަރުދަނާކުރުމަށް އެޅުނު ވަރަށް މުހިންމު ފިޔަވަޅެއްކަމަށާއި، މި ބަދަލުގެ ސަބަބުން މިހާރަށްވުރެ ހަރުދަނާ ގޮތެއްގައި ކުރިއަށް ގެންދިއުމަށް އެންމެންގެ އެއްބާރުލުން ފާހަގަކުރާ ކަމަށް ވެސް މިފްކޯގެ ސީއީއޯ ވިދާޅުވިއެވެ.
ބަދަލުކުރި 14 އައިސްޕްލާންޓް:
ހއ. އިހަވަންދޫ
ނ. ޅޮހީ
ރ. އަލިފުށި
ބ. ތުޅާދޫ
ފ. ފީއަލި
ފ. ނިލަންދޫ
ގއ. ދާންދޫ
ގއ. ދެއްވަދޫ
ގއ. ގެމަނަފުށި
ގއ. ކޮލަމާފުށި
ގދ. ފަރެސްމާތޮޑާ
ގދ. ފިޔޯރީ
ސ. ހިތަދޫ
14 އައިސްޕްލާންޓެއް މިފްކޯގެ ދަށަށް ބަދަލުކުރުމަށް ނިންމި އިރު، އެ ކުންފުނިން މީޑިއާތަކަށް ފޮނުވި މެސެޖެއްގައި ބުނީ އެ އައިސްޕްލާންޓުތައް މިފްކޯގެ ބެލުމުގެ ދަށަށް ގެންގޮސް އަލުން ހިދުމަތް ދޭން ފެށުމަށް ޓެކްނިކަލް އަދި އިންޖިނޭރުންގެ ޓީމުން މަސައްކަތް ކުރަމުން އަންނަ ކަމަށެވެ.
މިފްކޯގެ ބެލުމުގެ ދަށަށް ހުރިހާ އައިސްޕްލާންޓްތައް ބަދަލުކުރާނެ ކަމަށް ފިޝަރީޒް މިނިސްޓަރު އަހުމަދު ޝިޔާމް ވަނީ މިދިޔަ އަންގާރަ ދުވަހު ރައްޔިތުންގެ މަޖިލީހުގައި ވިދާޅުވެފަ އެވެ.
14 އައިސްޕްލާންޓެއް މިފްކޯގެ ދަށަށް ބަދަލުކުރަން ނިންމިއިރު، ފެނަކައިން ބުނީ އެކަމުގެ ސަބަބުން މިފްކޯއިން ފޯރުކޮށްދޭ ހިދުމަތްތަކުގެ ފެންވަރު ބޮޑުތަނުން ރަނގަޅުވެގެންދާނެ ކަމަށެވެ.
