ސްރީލަންކަން އެއަރލައިންސް އިން 5 އަހަރުގެ ތެރޭގައި އެ ކުންފުނީގެ މަތިންދާބޯޓުގެ އަދަދު 2 ގުނައަށް މަތިކޮށް 50 ށް އިތުރު ކުރުމަށް ރާވައިފިއެވެ. މިކަން ހާމަ ކުރީ ސްރީ ލަންކާ އިން މި ހިނގަމުންދާ 10 އަހަރު ނިމުމާ ހަމަ އަށް ފަތުރުވެރިކަމުން އަހަރަކު 10 ބިލިއަން އެމެރިކާ ޑޮލަރު ހޯދުމަށް އަމާޒު ހިފާފައިވާ ދަނޑިވަޅެއްގައެވެ.

ކޮވިޑް-19 ބަލިމަޑުކަމުގެ ކުރިން ސްރީ ލަންކާގެ ޤައުމީ އެއަރލައިން ގައި 27 މަތިންދާބޯޓު އޮތް އިރު، މިހާރު އެ ކުންފުނީގައި ވަނީ 22 މަތިންދާބޯޓެވެ.

"މަޤްޞަދަކީ 5 އަހަރުގެ ތެރޭގައި އެއަރލައިންގެ ޤާބިލުކަން 2 ގުނަ އަށް އިތުރުކުރުން،" ސްރީލަންކަން އެއަރލައިންސް ގެ ޗީފް އެގްޒެކެޓިވް އޮފިސަރ ރިޗަރޑް ނަޓޯލް، މިރަރ ބިޒްނަސް އަށް ވާހަކަދައްކަވަމުން ހާމަ ކުރައްވާފައިވާ ކަމަށް އެ ނޫހުން ރިޕޯޓުކޮށްފައި ވެއެވެ.

2025 ވަނަ އަހަރުގެ ނިޔަލަށް، ސްރީލަންކަން އެއަރލައިންސް އިން ވަނީ މިދިޔަ އަހަރުގެ ނިޔަލާ އަޅާބަލާއިރު އެ ކުންފުނީގެ ޤާބިލުކަން 25-30 އިންސައްތަ އަށް އިތުރުކުރުމަށް ރާވާފައެވެ. މިގޮތުން ބޮޑެތި 3 މަތިންދާ ބޯޓު އިތުރު ކުރުމަށް ވަނީ ރޭވިފައެވެ. ނަޓޯލް ވިދާޅުވީ 3 މަތިންދާބޯޓު ކުއްޔަށް ހޯދުމުގެ އިންތިޒާމުތައް ވަނީ ހަމަޖެހިފައެވެ.

މިދިޔަ އަހަރުގެ ފަހުކޮޅު ވެރިކަމަށް އައި އެންޕީޕީ ސަރުކާރުން ވަނީ ކުރީގެ ސަރުކާރުން ދަރަނި ބޮޑުވެފައިވާ ޤައުމީ އެއަރލައިން ވިއްކާލުމަށް ރާވާފައިވާ ރޭވުން ދޫކޮށްލައި، އޭގެ ބަދަލުގައި އެއަރލައިން އަލުން ދިރުވުމަށް 5 އަހަރުގެ ކޯޕަރޭޓް ޕްލޭނެއް އިޢުލާނު ކޮށްފައެވެ.