ޓެކްސީ ޑްރައިވަރުންގެ މުޒާހަރާގެތެރެއިން ފުލުހުންގެ ދައުރަށް ހުރަސްއެޅިކަމަށް ބުނެ ތިން މީހަކަށް ދައުވާކުރަން ފޮނުވައިފި
ފުލުހުންގެ ދައުރަށް ހުރަސް އެޅިކަމަށް ބުނެ 3 މީހެއްގެ މައްޗަށް ދައުވާކުރަން ވަނީ ފޮނުވާފަ
''ބޯކަނޑާލެވިދާނެ ކަމަށާއި، ބޯގުދު ނުކުރާނެ'' ކަމަށް ބުނެ، ގިނަ އަދަދެއްގެ ޓެކްސީ ޑްރައިވަރުން ސަރުކާރާ ދެކޮޅަށް ކުރި އިހުތިޖާޖުގެ ތެރެއިން (ފައިލް ފޮޓޯ)
މިދިއަ އަހަރުގެ ޑިސެމްބަރު މަހުގައި ގިނަ އަދަދެއްގެ ޓެކްސީ ޑްރައިވަރުން ބައިވެރިވެގެން ''ބޯކަނޑާލެވިދާނެ ކަމަށާއި، ބޯގުދު ނުކުރާނެ'' ކަމަށް ބުނެ، ސަރުކާރާ ދެކޮޅަށް ހުޅުމާލެ ރުއްގަނޑު ޕާކު 1 ގައި ކުރިއަށް ގެންދިޔަ މި މުޒާހަރާގެ ތެރެއިން ފުލުހުންގެ ދައުރަށް ހުރަސް އެޅިކަމުގެ ތުހުމަތުގައި ތިން މީހަކަށް ދައުވާކުރުމަށް ބުރާސްފަތި ދުވަހު، ޕްރޮސިކިއުޓަރ ޖެނެރަލްގެ އޮފީހަށް ފޮނުވައިފިއެވެ.
ފުލުހުންގެ ދައުރަށް ހުރަސްއެޅިކަމުގެ ތުހުމަތުގައި ޕީޖީ އޮފީހަށް ދައުވާކުރަން ފޮނުވާފައިވަނީ މއ. ވިރާޙު، އުމުރުން 39 އަހަރުގެ މުޙައްމަދު ޝާމިންއާއި، މއ. ނަހީދީ މަންޒިލް 31 އަހަރުގެ މިސްބާހު ޝަރީފްގެ އިތުރުން ހދ، ކުމުންދޫ ހޮލިޑޭވިލެޖް އުމުރުން 36 އަހަރުގެ ނުޢުމާން އަޙުމަދުގެ މައްޗަށެވެ. މި ތިން މީހުންގެ މައްޗަށް ވެސް ކުރަނީ އެއްދައުވާއެކެވެ.
މި ތިން މީހުންގެ މައްޗަށް ވެސް އުފުލާފައިވަނީ ޤާނޫނު ނަމްބަރ 9/2024 (ދިވެހިރާއްޖޭގެ ޤާނޫނު އުޤޫބާތު) ގެ 533 ވަނަ މާއްދާގެ (ހ) ގެ 1 ވަނަ ނަމްބަރާއި 2 ވަނަ ނަމްބަރުގެ (11) އާއި ހަވާލާދީ، އެ މާއްދާގެ (ނ) ގެ ދަށުން ދައުލަތުގެ އެހެނިހެން މަސައްކަތްތަކަށް ހުރަސްއެޅުމުގެ ދައުވާއެވެ.
ޓެކްސީ ޑްރައިވަރުންގެ މުޒާހަރާއާއި ގުޅިގެން ތިން މީހެއްގެ މައްޗަށް ދައުވާކުރުމަށް ފޮނުވިއިރު، ޑްރައިވާސް އެސޯސިއޭޝަނުގެ ރައީސް އިބްރާހީމް ނިޔާޒް ވިދާޅުވީ، އެ ދައުވާ އަކީ އެއްވެސް ގޮތަކަށް ބަލައިގަނެވޭނޭ ދައުވާއެއް ނޫންކަމަށާއި އެއީ މި ސަރުކާރުން ޓެކްސީ ޑްރައިވަރުންނަށާ އެ ފަރާތްތަކުގެ އާއިލާއަށް ދޭ ބޮޑު އަނިޔާއެއް ކަމަށެވެ.
ނިޔާޒް ވިދާޅުވީ ޓެކްސީ ޑްރައިވަރުންގެ އިހުތިޖާޖު ކުރިވަގުތު އެއްވެސް މިންވަރަކަށް ފުލުހުންގެ ދައުރަށް ހުރަސް އަޅާފައި ނުވާނެ ކަމަށެވެ. އަދި އެރޭގެ މުޒަހަރާ ނިންމާލުމަށް ފަހު ހިނގައިދިޔަ އެއްވެސް ކަމެއްގައި ފުލުހުންގެ އަމުރަށް ނުކިޔަމަންތެރި ކަމެއް ނުދައްކާ ކަމުގެ އެންމެ އަލިގަދަ ހެއްކަކީ ފުލުހުންނާއި ޑްރައިވަރުންނާއި ދެމެދު އެއްވެސް ކުރިމަތިލުމެއް ހިނގާފައި ނުވުން ކަމުގައި ނިޔާޒް ވިދާޅުވިއެވެ. އަދި ޓޯކުރި ކާރުތައް ވެސް ޓޯ ކޮށްފައި ވަނީ ފުލުހުންގެ އަމުރަށް ދުއްވާފައިގޮސް ފުލުހުން ބުނި ތަނަކަށް ދިޔުމަށް ފަހުގައި ކަމަށް ވެސް އޭނާ ވިދާޅުވިއެވެ.
ޑްރައިވަރުންގެ ޖަމިއްޔާގެ ބަޔާނުގައި ބުނެފައިވަނީ މިކަމުގައި ޑްރައިވަރުންނާއި ޑްރައިވަރުންގެ އާއިލާތަކަށް އަދުގެ ސަރުކާރުން ދީފައި ވަނީ ވަރަށް ބޮޑު ގެއްލުމެއް ކަމީ ކަށަވަރު ކަމެއް ކަމަށެވެ.
