ރައީސް ޑރ. މުހައްމަދު މުއިއްޒުގެ މި ސަރުކާރުން ޓެކްސީ ފްލީޓެއް ތައާރަފުކުރަން ނިންމުން ވެގެން ދިއައީ މާލެ ސަރަހައްދުގައި އެ ހިދުމަތް ދެމުން އަންނަ ޓެކްސީ ޑްރައިވަރުންނަަށް ލިބުނު ވަރަށް ބޮޑު ހިތާމައަކާއިކަންބޮޑުވުމެއް ކަމަށް ޑްރައިވާސް އެސޯސިއޭޝަން އޮފް މޯލްޑިވްސްގެ ރައީސް އިބުރާހީމް ނިޔާޒް ވިދާޅުވެއްޖެއެވެ.
ނިޔާޒް މިފަދައިން ވިދާޅުވީ ބުދަ ދުވަހު ސަރުކާރުން ޓެކްސީ ފްލީޓެއް ތައާރަފުކުރަން ނިންމި ނިންމުމާއި ގުޅިގެން އެކަމުގެ ކަންބޮޑުވުން ފާޅުކުރައްވައި "ރާއްޖެ ޓީވީ"އަށް ދިން ޚާއްޞަ ބަސްދީގަތުމެއްގައެވެ.
ނިޔާޒް ވިދާޅުވީ މި ސަރުކާރުން އީވީ ޓެކްސީގެ ނަމުގައި ޓެކްސީ ލައިނެއް އިފްތިތާހު ކުރުން ވެގެން ދިއައީ މުޅި ރާއްޖެއާއި، ޚާއްސަކޮށް މާލެ ސަރަހައްދުގެ ޓެކްސީ ޑްރައިވަރުންނަށް ވަރަށް ބޮޑު، ހިތާމައަކާއި ހިތްދަތިކަމެއް ލިބިގެން ދިއަ ކަމެއް ކަމަށެވެ. ސަބަބެއްކަމުގައި އޭނާ ވިދާޅުވީ ޒަމާނުއްސުރެ ޓެކްސީގެ ޚިދުމަތް ދެމުން އަންނަ ޓެކްސީ ތަކާއި ޓެކްސީ ސެންޓަރުތަކުން ދިގު މުއްދަތަކަށް ކުރި ބޮޑެތި އިންވެސްޓްމަންޓުތައް ހުއްޓިގެން ދިއުމެވެ.
ނިޔާޒް ވިދާޅުވީ ޓެކްސީ ޑްރައިވަރުންނާއި އަދި ޓެކްސީ ސެންޓަރުތަކަކީ ރާއްޖޭގައި އެންމެ ކުރިން ފެށިގެންވެސް މިއަދާ ޖެހެންދެންވެސް ފުޅާދާއިރާއެއްގައި ޓެކްސީގެ ޚިދުމަތް އާންމު ރައްޔިތުންނަށް ދެމުން އައި ފަރާތްތައް ކަމަށާއި، އޭރުންސުރެ، ޓެކްސީ ޑްރައިވަރުން އެކަން ކުރަމުން އައީ އެތަކެއް ބޮޑެތި ގުރުބާނީތަކެއް ވެސް ވެގެންކަމަށެވެ.
އެގޮތުން ގިނަ މީޙުން ޓެކްސީކުރަން ކާރުތައް ގަނެފައި ހުރީ ބޮޑެތި ލޯނުތައް ނަގައިގެން ކަމަށާއި އަނެއްބަޔަކު ޓެކްސީ ދަތުރުތައް ކުރަމުން ގެންދަނީ އެހެން މީޙުންގެ ޓެކްސީތައް ކުއްޔަށް ނަގައިގެން ކަމަށެވެ. އެހެން ކަމުން މިއީ ޓެކްސީ ޑްރައިވަރުންގެ ދިރުއުޅުމަށް ކުރަމުން އަންނަ މުހިންމު މަސައްކަތަކަށް ވާއިރު، ސަރުކާރުން މި މަސައްކަތް ހުއްޓުވާލަން މަސައްކަތް ކުރުމަކީ ބަލައިގަނެވޭނޭ ކަމެއް ނޫން ކަމަށް ނިޔާޒް ވިދާޅުވިއެވެ.
ނިޔާޒް ވިދާޅުވީ ޓެކްސީގެ ޚިދުމަތަކީ އެންމެ އާދައިގެ މީހާ ދިރިއުޅުމަށް އާމްދަނީ ހޯދުމަށް ވެސް ކުރަމުން އަންނަ މަސައްކަތެއް ކަމަށާއި އަދި މިއީ ވަރަށް ގިނަ އަމިއްލަ ފަރުދުންގެ ދިރިއުޅުމާއި ވެސް ގުޅިފައިވާ މުހިންމު ކަމެއް ކަމަށެވެ.
އޭނާ ވިދާޅުވީ ސަރުކާރުން ޓެކްސީގެ ޚިދުމަތް ދޭން ފެށުމުން އެކަމުގެ ދަތިތަކާއި ތަކުލީފުތައް ކުރިމަތިވަނީ ހަމައެކަނި އެންމެ ޓެކްސީ ޑްރައިވަރަކަށް ނޫން ކަމަށާއި އެކަމުގެ ތަކުލީފުތައް ހުރިހާ ޓެކްސީ ޑްރައިވަރުންނަށް ވެސް އުފުލަން ޖެހޭ ކަމަށެވެ.
ނިޔާޒު ވިދާޅުވީ ކޮންމެ ޓެކްސީ ޑްރައިވަރެއް ވެސް އެ މަސައްކަތް ކުރަމުން ގެންދަނީ ކޮންމެވެސް މީހެއްގެ އަތުން ކާރެއް ކުއްޔަށް ނަގައިގެން ކަމަށާއި އެގޮތުން އެ ޓެކްސީ އަށް ލިބޭ ފައިސާއިން ބައެއް ވެރިމީހާ އަށާއި އެ ޓެކްސީ ރެޖިސްޓްރީވެފައި އޮންނަ ޓެކްސީ ސެންޓަރަށް ވެސް ބައެއް އަޅަން ޖެހޭކަމަށެވެ. ކަން މިހެން ހުރިއިރު، މިކަމުގެ އަސަރު އެ ހުރިހާ ފަރާތްތަކަށް ވެސް ފޯރާނެ ކަމަށް ނިޔާޒް ވިދާޅުވިއެވެ. އަދި ސަރުކާރުން މި ވަދެގަންނަނީ ރާއްޖޭގެ ނިސްބަތުން ވަރަށް ބޮޑު ކޮމިޔުނުޓީއެއްގެ ތެރެއަށް ކަމަށް ވެސް ނިޔާޒް ވިދާޅުވިއެވެ.
ފާހަގަކޮށްލަން ބޭނުންވަނީ މި ސަރުކާރުން މިވަރުގެ ކަމެއް ފަށައިގެން ކުރިއަށް ގެންދާއިރު، އަޅުގަނޑުމެންނާއި ބައްދަލުކޮށް ވާހަކަދެކެވުނު އިރު، މިކަން ފަށާނީ ވަރަށް ފުރިހަމަގޮތެއްގައި ކޮންސަލްޓޭޓިވް ޕްރޮސެސްއެއްގެ ތެރެއިން ކަމަށް ޓްރާންސްޕޯޓް މިނިސްޓަރ އަޅުގަނޑުމެންނާއި އެކު ބޭއްވި ބައްދަލުވުމުގައި ޚުދު އެބޭފުޅާ ވަނީ ވިދާޅުވެފަ. އެހެން ނަމަވެސް މިކަން މިހާހިސާބަށް ދިއައިރު، ބައްދަލުވެސް ކޮށްނުލާ، އަދި ލަފައެއްވެސް އަހާ ނުލައި މިފަދަ ނިންމުމެއް އެ ނިންމެވީ. މިއީ އަޅުގަނޑުމެން ޑްރައިވަރުން ވަރަށް ބޮޑަށް ކަންބޮޑުވާކަމެއް.ޑްރައިވާސް އެސޯސިއޭޝަން އޮފް މޯލްޑިވްސްގެ ރައީސް އިބުރާހީމް ނިޔާޒް
މީގެ އިތުރުން ނިޔާޒް ވިދާޅުވީ ސަރުކާރުގެ މި ޚިދުމަތް ތައާރަފުވެގެން ދިއުމުން ޓެކްސީ ޑްރައިވަރުންނަށް އެއްވެސް ވަރެއްގެ ބިރުވެރިކަމެއް ނުވަތަ ކަންބޮޑުވުމެއް ނެތްކަމަށް ސަރުކާރުން ބުނާއިރު، އެއްތަނެއްގައި ޚިދުމަތްދޭ ދެތަނެއް ހުރުމަކީ ޑިމާންޑް ކުޑަވެ، ބޮޑެތި ބަދަލަުތަކެއް އަންނާނޭ ކަމެއް ކަމަށެވެ. އެގޮތުން ވަރަށް ބޮޑެތި ގެއްލުންތަކެއް ކުރިމަތިވެގެން ދާނެ ކަމަށް އޭނާ ވިދާޅުވިއެވެ.
ނިޔާޒް ވިދާޅުވީ ކުރިމަތިވެގެން މިއުޅޭ އަސްލު މައްސަލައަކީ، ޓެކްސީ ބޭނުންވެގެން އުޅޭ ކަސްޓަމަރަށް ޓެކްސީ ނުލިބުން ކަމަށާއި އަދި ކަސްޓަމަރުން ބޭނުންވެގެން އުޅޭ ޓެކްސީ ތަކަށް ކަސްޓަމަރުން ނުލިބުމުގެ މައްސަލަކަމަށެވެ.
އޭގެ އެންމެ ބޮޑު އެއްސަބަކަކަށް ވެފައިވަނީ މި މާލޭގައި ޓެކްސީގެ ރަނގަޅު ޚިދުމަތެއް އާންމު ރައްޔިތުންނަށް ފޯރުކޮށްދޭނެ ރަނގަޅު މާހައުލެއް ތަނަވަސްވެފައި ނެތުން ކަމަށް ނިޔާޒް ވިދާޅުވިއެވެ. އަދި ސަރުކާރުން މިކަން ހައްލުކޮށްދިނުމުގެ ބަދަލުގައި މަސައްކަތް އެ ކުރަނީ މިކަން އިތުރަށް ގޯސްކުރަން ކަމަށް ވެސް ނިޔާޒް ވިދާޅުވިއެވެ.
