މިލާންގެ ޓެކްސީތަކުގެ ބޭރަށް ރާއްޖޭގެ ހިތްގައިމުކަން

ރާއްޖެ އަށް އަބަދުވެސް އެންމެ ގިނައިން ފަތުރުވެރިން ޒިޔާރަތްކުރާ އެއް ގައުމުގެ ތެރޭގައި ހިމެނޭ އިޓަލީގެ ދެވަނަ އަށްއެންމެ ބޮޑު ސިޓީ މިލާންގައި ރާއްޖެ އިޝްތިހާރުކުރަން ހަރަކާތެއް ފަށައިފި އެވެ.

އިޓާލީގައި ރާއްޖެ އިޝްތިހާރުކުރުމުގެގޮތުން، މަސް ދުވަހުގެ މުއްދަތަށް ކުރިއަށްދާ މި ކެމްޕޭންގައި މިލާންގައި ދަތުރުކުރާ 80 ޓެކްސީގައި ރާއްޖޭގެ ހިތްގައިމުކަމާއި ފަތުރުވެރިންނަށް ތަޖުރިބާ ކުރެވެން ހުރި ތަފާތު ކަންކަން ދައްކުވައިދޭ ފޮޓޯތައް ހިމެނޭ އިޝްތިހާރުތައް ޖަހާނެއެވެ.

އެގޮތުން އިޓަލީގެ ފަތުރުވެރިން އެންމެ ގަޔާވާ ރާއްޖޭގެ ގުދުރަތީ ރީތި މަންޒަރުތަކާއި ކަނޑުއަޑީގައި ތަޖުރިބާ ކުރެވެންހުންނަ ހިތްގައިމު ކަންތައްތަކުގެ ފޮޓޯ ޓެކްސީތަކުގައި ވަނީ ޖެހިފަ އެވެ. މީގެއިތުރުން މި ފެބުރުއަރީ މަހުގެ 9-11 އަށްމިލާންގައި އޮންނަ ބީއައިޓީ މިލާން ފެއާގައި ރާއްޖޭގެ ސްޓޭންޑާ ބެހޭ މައުލޫމާތުތައް ވެސް މި ޓެކްސީތަކުގެ ބޭރުގައި ވަނީ ޖަހާފައެވެ.

އިޓަލީ މާކެޓްގައި ރާއްޖެ އިތުރަށް އިޝްތިހާރުކުރުމަށް މި އަހަރުގެ ތެރޭގައި ގިނަ ހަރަކާތްތަކެއް ކުރިއަށް ގެންދިއުމަށްއެމްއެމްޕީއާރްސީއިން ވަނީ ރާވާފަ އެވެ. އެގޮތުން ދެ ފެއާއެއްގައި ބައިވެރިވުމުގެ އިތުރުން މީޑިއާ، އިންފްލުއެންސަރ އަދި ސެލެބްރިޓީ ފެމިލިއަރައިޒޭޝަން ޓްރިޕްތަކާއި ބޮޑެތި ޓްރެވެލް އެޖެންސީތަކާ އެކީ ޖޮއިންޓް ކެމްޕޭން އޮންލައިން ކެމްޕެއިން އަދި އައުޓްޑޯ އެޑްވަޓައިޒިން ކެމްޕެއިންތައް ކުރިއަށް ގެންދިއުން ހިމެނެ އެވެ.

މިދިޔަ މަހު އެމްއެމްޕީއާރްސީއިން ވަނީ މުޅި އިޓަލީ އަށް އަމާޒުކޮށް އައުޓްޑޯ ކެމްޕޭނެއް ލޯންޗްކޮށްފަ އެވެ. އެ ކެމްޕެއިންދަށުން އިޓަލީގެ އެންމެ ބޮޑު 10 އެއާޕޯޓުގައި ބެހެއްޓިފައިވާ 350 ސްކްރީނެއްގައި ވަނީ ރާއްޖޭގެ ހިތްގައިމު މަންޒަރުތައްދައްކާލާފަ އެވެ. އަދި އިޓަލީއިން ރާއްޖެއަށް އެންމެ ގިނަ ފަތުރުވެރިން އަންނަ ޓްރެވަލް އެޖެންސީ އަލްޕިޓުއާގެ ދަށުންހިންގަމުން އަންނަ ދެހާސް އޮފީހެއްގެ ބޭރުގައި ރާއްޖޭގެ ހިތްގައިމު މަންޒަރުތަކުގެ އިޝްތިހާރު ވަނީ ޖަހާފަ އެވެ.

މީގެއިތުރުން މިލާންގައި ދަތުރުކުރާ ޓްރޭމްއެއް ވެސް ވަނީ ރެޕްކުރެވިފަ އެވެ. މިދިޔަ އަހަރު އިޓަލީއިން 343613 ފަތުރުވެރިން ޒިޔާރަތްކޮށް އެ ގައުމު ހިމެނިފައިވަނީ ތިން ވަނަ އަށް އެންމެ ގިނަފަތުރުވެރިން ރާއްޖެ ޒިޔާރަތްކުރި ގައުމުގެ ގޮތުގަ އެވެ. މިއީ 2018 ވަނަ އަހަރާ އަޅާބަލާއިރު، 9.5 އިންސައްތައިގެ ކުރިއެރުމެކެވެ.