ގޭންގު ކުށް ހުއްޓުވުމުގެ ބިލަކީ ކަމާއި ބެހޭ ފަރާތްތަކާއި ވާހަކަ ނުދައްކާ ދިރާސާނުކޮށް ހުށަހަޅާފައިވާ ބިލެއް - މެންބަރު މުހައްމަދު އިބްރާހިމް
މިއީ މިކަމާއި ގުޅުން ހުރި 3 ވަނަ ބިލު
މެންބަރު މުހައްމަދު އިބްރާހިމް (ކުޑޫ) އާސަންދައާއި ގުޅޭގޮތުން ހުށަހެޅި ކުއްލި މައްސަލަ ވަނީ ބޭރުކޮށްލާފައި
ގޭންގުތަކުން ހިންގާ ކުއްތަކާއި އެނޫންވެސް ނުރައްކާތެރި ކުށްތައް ހުއްޓުވުމަށް ސަރުކާރުން ހުށަހެޅި ބިލަކީ ކަމާއި ބެހޭ ފަރާތްތަކާއި ވާހަކަ ނުދައްކާ ދިރާސާނުކޮށް ހުށަހަޅާފައިވާ ބިލެއް ކަމަށް ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް ވިދާޅުވެއްޖެއެވެ.
މައްޗަންގޮޅި މެދު ދާއިރާގެ މެންބަރު މުސްތަފާ ހުސައިން މަޖިލީހަށް ހުށަހެޅުއްވި މި ބިލަށް ބަހުސްކުރައްވަމުން ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް ވިދާޅުވީ ގޭންގުތަކުން ހިންގާ ކުއްތަކާއި އެނޫންވެސް ނުރައްކާތެރި ކުށްތައް ހުއްޓުވުމުގެ ބިލު ހުށަހެޅުއްވިކަމަށްޓަކައި މައްޗަންގޮޅި މެދު ދާއިރާގެ މެންބަރު މުސްތަފާ ހުސައިން އަށް ވަރަށް ހާއްސަ ޝުކުރެއް ދަންނަވާ ކަމަށެވެ. މެންބަރު އިބްރާހިމް ވިދާޅުވީ މެންބަރު މުސްތަފާ އަކީ މިފަދަ ބިލެއް ހުށަހެޅުއްވުމަށް ވަރަށް މުނާސަބު ބޭފުޅެއް ކަމަށެވެ.
މެންބަރު އިބްރާހިމް ވިދާޅުވީ މިފަދަ ދެ ބިލެއް އެބައޮތް ކަމަށާއި، އެއީ 2010 ވަނަ އަހަރުން ފެށިގެން އަމަލުކުރަމުންދާ ގޭންގު ކުއްތަކާއި ބެހޭ ގާނޫނާއި، 2011 ވަނަ އަހަރު އަމަލުކުރަން ފެށި ބިރުދެއްކުމާއި، ނުރައްކާތެރި ހަތިޔާރާއި، ތޫނު އެއްޗެހި ގެންގުޅުން މަނާކުރުމުގެ ގާނޫނުކަމަށެވެ. އަނެއްކާވެސް މިއަދު މި ބަހުސްކުރަނީ މިކަމާއި ގުޅުން ހުރި 3 ވަނަ ބިލަށް ކަމަށާއި، މިއީ ހިތާމަހުރި ކަންކަން ކަމަށް މެންބަރު ވިދާޅުވިއެވެ.
މެންބަރު އިބްރާހިމް ވިދާޅުވީ މި ބިލު ފަރުމާކުރެވިފައިވަނީ ކުރިން ހުރި ބިލުތައް ނުވަތަ ގާނޫނުތައް ތަންފީޒުނުކުރެވިގެންތޯ، އަދި މި ބިލަކީ އެ ސަބަބުތަކަށް ވިސްނައިގެން ހަދާފައިވާ ބިލެއްތޯ ސުވާލުކުރައްވަން ބޭނުންވާ ކަމަށެވެ. އެގޮތުން ބިލުގައި ކަންބޮޑުވާ މާއްދާތަކެއް އެބަހުރި ކަމަށާއި، އޭގެ ތެރޭގައި ޖިނާއީ ކުށްކުރާކަމަށް ބެލެވޭ ދެމީހަކު ފުޓުބޯޅަ ކުލަބެއްގައި ހިމެނިއްޖެނަމަ އެ ކުލަބަކީ އިންތިޒާމްވެގެން ކުށްކުރާ ގްރޫޕެއްގެ ގޮތުގައި ލޭބަލްވުމުގެ ފުރުސަތު އެބައޮތް ކަމަށެވެ.
މީގެ އިތުރުން 6 ވަނަ މާއްދާގެ (ށ) ގައި ވަނީ ޖިނާއީ ކުށެއް ކުރުމުގައި ބައިވެރިވި ދެ ގްރޫޕުގެ ތެރެއިން ދެތިންމީހުން ކަމުގައިވިޔަސް، ކުށްކުރުމުގައި ބައިވެރިނުވާ މީހުންވެސް ހިމަނައިގެން އިންތިޒާމްވެގެން ކުށްކުރާ ގްރޫޕެއްގެ ގޮތުގައި ބެލެވިދާނެކަމަށް ހިމަނާފައިވާ ކަމަށް މެންބަރު ވިދާޅުވިއެވެ.
މެންބަރު އިބްރާހިމް ވިދާޅުވީ ކުށް ސާބިތުނުވިޔަސް، މީހެއްގެ މުދަލެއް ދައުލަތަށް ނެގުމަކީ އެއްވެސް ހަމައަކުން ހަމަޖެހޭކަމެއް ނޫން ކަމަށެވެ. އަދި މިފަދަ މާއްދާއެއް ގާނޫނުގައި ހިމެނުމަކީ ކަނޑައެޅިގެން ކޯޓުތަކުގެ ބާރުކަނޑުވާލާ ކަމެއް ކަމަށް މެންބަރު ވިދާޅުވިއެވެ.
މެންބަރު ވިދާޅުވީ ކުރަންވީ ކަންކަން ވަރަށް ބައިވަރު ކަމަށެވެ. ނަމަވެސް ސުވާލަކީ އެކަންކަން ކުރާނެތޯއާއި، މަޖިލީހުން ގާނޫނުތައް ހަދަންވާނީ އޭގައި އޮންނަ އެއްޗެއް ރައްޔިތުންނާއި ގާނޫނޫ ތަންފީޒުކުރަން ތިބޭ ފަރާތްތަކަށް ވެސް ފަސޭހައިން ފަހުމްވާގޮތަށް ކަމަށެވެ. މެންބަރު ވިދާޅުވީ ގާނޫނުތައް ފުރިހަމައަށް ތަންފީޒު ނުވަނީ މި ސަބަބާއި ހުރެ ކަމަށާއި، އެއް ވާހަކައެއް އެކި އިބާރާތުން ގާނޫނުތަކުގައި ލިޔެ ބަލަންޖެހޭ ގާނޫނެއް ސާފުނުވާ ކަމަށެވެ.
