މަޖިލިސް ހިންގަނީ ރައީސް އޮފީހުން ފޮނުވާ ވަޒީރަކު ބުނާ ގޮތަށް، ކޮންޓްރޯލް ކުރަނީ މަޖިލީހުގެ ނައިބުރައީސް - އާދިލް
11 ފެބުރުއަރީ 2025 | އަންގާރަ 19:16މަޖިލީހުގެ ރައީސް އަބްދުއްރަހީމް އަބްދުﷲ ހުންނެވީ ވަރަށް ބޮޑަށް ފިތިފައި
އެމްޑީޕީގެ ހަވަރު ބެރުގައި އާދިލް (މ) އަދި ސަބާ (ވ)
މަޖިލިސް ހިންގަނީ ރައީސް އޮފީހުން ފޮނުވާ ވަޒީރަކު ބުނާ ގޮތަށް ކަމަށާއި، ކޮންޓްރޯލް ކުރަނީ މަޖިލީހުގެ ނައިބުރައީސް އަހްމަދު ނާޒިމް ކަމަށް ހެލްތު މިނިސްޓްރީގެ ކުރީގެ ސްޓޭޓް މިނިސްޓަރު އަދި އެމްޑީޕީގެ ހެލްތް ކޮމެޓީގެ ޗެއަރ އަހުމަދު އާދިލް ވިދާޅުވެއްޖެއެވެ.
އެމްޑީޕީގހެ ހަބަރުބެރު ޕެނަލްގައި ވާހަކަ ދައްކަވަމުން ހެލްތު މިނިސްޓްރީގެ ކުރީގެ ސްޓޭޓް މިނިސްޓަރު އަދި އެމްޑީޕީގެ ހެލްތް ކޮމެޓީގެ ޗެއަރ އަހުމަދު އާދިލް ވިދާޅުވީ ހަގީގީ މާނަައިގައި ރައްޔިތުންގެ މަޖިލިސްގެ ދައުރު އަދާކުރުމުގައި އިންސައްތައިން ބަލާކަމުގައިވަނަމަ މަޖިލީހުގެ ދައުރު އަދާކުރަނީ ދެތިން އިންސައްތައިގައި ކަމަށެވެ. ތިން ބާރު ވަކިވެފައިވާ ކަމަށް ގާނޫނުއަސާސީގައި ބުނެފައިވީނަމަވެސް ފެނިގެންދަނީ ރައްޔިތުން މަޖިލީހުން ކުރަންޖެހޭ ކަންކަންވެސް ރައީސް އޮފީހުން ބުނެގެން ކުރާތަން ކަމަށާއި، ރައީސްގެ އެންގެވުމަށް ވަޒީރުންގެ މަޖިލީހުގެ މެންބަރަކު މަޖިލީހަށް ވަޑައިގެން ކަންކަންކުރަންޖެހޭ ގޮތުގެ އިރުޝާދު ދެމުންދާތަކަށް މިހާރު ފެންނަމުންދާ ކަމަށް އާދިލް ވިދާޅުވިއެވެ.
އާދިލް ވިދާޅުވީ ރިޔާސީ ބަޔާން އިއްވި ދުވަހުވެސް، ރައްޔިތުންގެ މަޖިލީހުގެ ރައީސް އެތަނުގައި އިންނެވި ކަމަށާއި، މަޖިލިސް ކުރިއަށްދިޔައީ މަޖިލީހުގެ ރައީސްގެ ކޮންޓްރޯލުގެ ދަށުންކަމަށް ޓީވީ ބަލަންތިބި ރައްޔިތުންނަށް ފެނިވަޑައިގަތަސް އެކަން ހިނގައިދިޔައީ އެގޮތަށް ނޫންކަމަށެވެ. އާދިލް ވިދާޅުވީ މަޖިލީހުގެ ރައީސް އަބްދުއްރަހީމް އަބްދުﷲ ހުންނެވީ ވަރަށް ބޮޑަށް ފިތިފައި ކަމަށާއި، މުޅި މަޖިލީހުގެ ކޮންޓްރޯލް އައީ ނައިބްރައީސް ނާޒިމްގެ ފަރާތުން ކަމަށެވެ.
ޕެނަލްގައި ވާހަކަ ދައްކަވަމުން އެމްޑީޕީގެ މަސްތުވާތަކެއްޗާއި ދެކޮޅަށް މަސައްކަތް ކުރާ ކޮމިޓީގެ މުގައްރިރު މުހައްމަދު ސޮބްރީ (ސަބާ) ވިދާޅުވީ މަޖިލީހަށް އިންތިހާބުވާ ހިސާބުން މެންބަރުންނަކީ ރައްޔިތުންގެ މަންދޫބުން ކަމަށެވެ. ރައްޔިތުންގެ ކަންބޮޑުވުންތަކާއި ހާސްކަން މަޖިލިހުގައި އިއްވަން މައިކެއްދީފައި ފަލަ މުސާރައެއް ދީފައި ތިބޭ އިރު، ޕީއެންސީއަށް ނިސްބަތްވާ މެންބަރުންގެ ތެރެއިން 6 މެންބަރުން ފިޔަވައި ދެން ތިބީ ރަބަރު ސްޓޭމްޕް ޖަހާފައި ތިބި މެންބަރުން ކަމަށެވެ.
ސަބާ ވިދާޅުވީ މިހާރު ފެނިގެންދަނީ ހުދުމުހުތާރު މަޖިލީހެއް ކަމަށާއި، ގާނޫނުއަސާސީއަށް ގެނައި ބަދަލާއެކު އެކަމުގައި މެންބަރުން ބެދިފައި ތިބޭއިރު މިނިވަންކަމާއެކު މެންބަރުންނަށް ވާހަކަ ނުދެއްކޭނެ ކަމަށެވެ.
ސަބާ ވިދާޅުވީ ތަންތަނުގެ އިސްވެރިންގެ ގޮތުގައިވެސް އައްޔަންކުރަނީ ރިޓަޔަރޑް ބޭފުޅުން ކަމަށާއި، އެއީ ތަންތަނުގެ ކޮންޓްރޯލް ނެގުމަށް ކަމަށެވެ. އަދި އޮފީސްތަކުގެ މުވައްޒަފުންނަށްވެސް އަމިއްލަ ހިޔާލެއް ފާޅުކުރުމުގެ މިނިވަންކަމެއް ނެތް އިރު، މިއަދު މަޖިލިސް ވެސް ފެނިގެންދަނީ ރައްޔިތުންގެ މަޖިލީހުގެ ބަދަލުގައި ޕީއެންސީގެ މަޖިލީހެއްގެ ގޮތުގައި ކަމަށެވެ.
