ޝިމާންގެ ސިއްހަތައް އިސްކަން ދިނުމުގެ ބަދަލުގައި ފުލުހުން އިސްކަން ދިނީ އޭނާގެ ވެހިކަލް ޓޯ ކުރަން: ޑްރައިވަރުންގެ ޖަމްއިއްޔާ
ޝިމާން އާ މެދު އަމަލު ކުރި ގޮތް އެ ޖަމްއިއްޔާ އިން ވަނީ ހަރުކަށި އިބާރާތުން ކުށްވެރިކޮށްފައި
ހުޅުމާލޭގައި ދުއްވާފައި އަންނަ ޓެކްސީ ތަކެއް
ކާރުގައި ދަތުރު ކުރަމުން ދަނިކޮށް ސިއްހީ މައްސަލަ އެއް ޖެހުނު ޓެކްސީ ޑްރައިވަރެއް ކަމަށްވާ އަލީ ޝިމާން ހައްޔަރު ކުރުމުގައި މޯލްޑިވްސް ޕޮލިސް ސާވިސް އިން ޢަމަލު ކޮށްފައިވާ ގޮތާއި ބޭސްފަރުވާގެ އަވަސް ޚިދުމަތް ފޯރުކޮށްދިނުމުގައި އިހުމާލު ވެފައިވާތީ އެކަން ޑްރައިވަރުންގެ އެސޯސިއޭޝަނުން ހަރުކަށި އިބާރާތުން ކުށްވެރިކޮށްފިއެވެ.
އެ ޖަމްއިއްޔާ އިން އާދިއްތަ ދުވަހު ނެރުނު ބަޔާނުގައި ބުނެފައިވަނީ ފެބްރުއަރީ 8 ވަނަ ދުވަހުގެ ހެނދުނު އަލީ ޝިމާން ވަނީ ޞިއްޙީ މައްސަލައެއް ދިމާވުމުގެ ސަބަބުން އެކްސިޑެންޓެއް ހިނގައިފައިވާ ކަމަށާއި، ސިއްޙީ ގޮތުން ސީރިއަސް މައްސަލަ އެއް ހުރިކަމުގެ ސާފު ނިޝާންތައް ފެންނަން ހުރި ނަމަވެސް ފުލުހުން ވަނީ މަސްތުގެ ހާލަތުގައި އޭނާ ދުއްވި ކަމަށް ތުހުމަތުކޮށްފައި ކަމަށެވެ.
އޭނާގެ އާއިލާއިން ތަކުރާރުކޮށް މަސްތުވާތަކެތި ބޭނުން ނުކުރާކަން ކަށަވަރުކޮށްދޭން މަސައްކަތްކުރުމުގެ އިތުރުން ޞިއްޙީ މައްސަލަ އެއް ހުންނަ ކަމަށް ބުނެ މެޑިކަލް ރިޕޯޓެއް ދިން ނަމަވެސް އޭނާ ބަންދުގައި ހަ ގަޑިއިރަށް ވުރެ ގިނަ އިރު ހޭދަވެގެން ދިޔައިރުވެސް ފުލުހުން ވަނީ އޭނާއަށް އަވަސް ފަރުވާ ދިނުމަށް ދެކޮޅު ހަދާފައި ކަމަށް ޑްރައިވަރުންގެ ޖަމްއިއްޔާ އިން ވަނީ ބުނެފައެވެ.
ބަޔާނުގައި އިތުރަށް ބުނެފައިވަނީ އެތައް ގަޑިއިރެއްގެ އިހުމާލަށްފަހު އެންމެ ފަހުން އައިޖީއެމްއެޗަށް ގެންދިއުމުން ޑޮކްޓަރުން ވަނީ އޭނާ އަށް ސްޓްރޯކެއް ޖެހިފައިވާ ކަން ކަށަވަރު ކޮށްދީފައި ކަމަށާއި، އޭނާގެ ސިއްހަތަށް އިސްކަން ދިނުމުގެ ބަދަލުގައި ފުލުހުން ވަނީ އެއްވެސް ޖަސްޓިފިކޭޝަނެއް ނެތި އޭނާ ދުއްވި ވެހިކަލް ވެސް ޓޯކޮށްފައި ކަމަށެވެ.
"މިކަމަކީ އިންސާނީ ހައްގުތަކަށް ވަރަށް ބޮޑަށް އަރައިގަނެ، ބޭއިންސާފުން އަމަލު ކޮށްފައިވާ ކަން ހާމަކޮށްދޭ ކަމެކެވެ. އަދި މިކަމުގައި އެކަށީގެންވާ ފިޔަވަޅު އެޅުމަށް ކަމާބެހޭ ފަރާތްތަކަށް އިލްތިމާސް ކުރަމެވެ." ބަޔާން ނިންމާލަމުން ބުނެފައިވެއެވެ.
