ސޫރިއާގެ ރައީސް އަޙްމަދު އައް-ޝަރާ، ސައުދީ އަރަބިއްޔާގައި މުޙައްމަދު ބިން ސަލްމާން އާ ބައްދަލުކުރައްވައިފި

ސައުދީ އަރަބިއްޔާގެ ވަލީ އަހުދު މުޙައްމަދު ބިން ސަލްމާން، އާދީއްތަ ދުވަހު ސޫރިޔާގެ އައު ރައީސް، އަޙްމަދު އައް-ޝަރާ އާ ބައްދަލުކުރައްވައިފިއެވެ.

އައް-ޝަރާ ސައުދީ އަރަބިއްޔާ އަށް ވަޑައިގަތީ އާދިއްތަ ދުވަހުއެވެ. މިއީ، އޭނާ ރައީސް ކަމަށް އައްޔަންކުރެވުނު ފަހުން ބޭރު ޤައުމަކަށް ކުރެއްވި ފުރަތަމަ ރަސްމީ ދަތުރުފުޅެވެ.

ސައުދީ ޕްރެސް އެޖެންސީ (އެސްޕީއޭ) އިން އާންމު ކޮށްފައިވާ ފޮޓޯތަކުގައި މުޙައްމަދު ބިން ސަލްމާން، އައް-ޝަރާ އާއި އޭނާގެ އަރިހުގައި ވަޑައިގެންނެވި ވަފުދަށް ރިޔާޟްގައި މަރުޙަބާ ދަންނަވާ މަންޒަރު ވަނީ ހާމަކޮށްފައެވެ.

ސޫރިޔާގެ ނިއުސް އެޖެންސީ ސަނާ އިން އެކްސް (ކުރީގެ ޓްވިޓަރ) ގައި ޕޯސްޓްކޮށްފައިވާ ފޮޓޯއެއްގައި އަލް-ޝަރާ ގެ އަރިހުގައި އެ ގައުމުގެ ޚާރިޖީ ވަޒީރު އަސަދު އަލް-ޝައިބާނީ ސައުދީ އަށް ދަތުރު ކުރައްވާ މަންޒަރު ވަނީ ހާމަ ކޮށްފައެވެ.

ސައުދީ އަރަބިއްޔާގެ ރަސްގެފާނު ސަލްމާނާއި މުޙައްމަދު ބިން ސަލްމާން، ބުރާސްފަތި ދުވަހު ވަނީ ސޫރިއާ ގެ އިންތިޤާލީ ރައީސް ކަމަށް އައްޔަންކުރުމާއެކު އައް-ޝަރާއަށް މަރުޙަބާ ދަންނަވާފައެވެ.

ސައުދީ އަރަބިއްޔާގެ ޚާރިޖީ ވަޒީރު ޕްރިންސް ފައިޞަލް ބިން ފަރުޙާން ވަނީ ފާއިތުވި މަހު ދިމިޝްގަށް ޒިޔާރަތްކުރައްވާ، އައް-ޝަރާ އާ ބައްދަލުކުރައްވާފައެވެ. ޕްރިންސް ފައިޞަލް ވިދާޅުވީ ސޫރިއާ އަށް އަޅާފައިވާ ދަތިކުރުމުގެ ފިޔަވަޅުތައް ނައްތާލުމަށް ސައުދީ އަރަބިއްޔާ އިން މަސައްކަތް ކުރާނެ ކަމުގައެވެ.

ފާއިތުވި މަހު، ސޫރިއާ ގެ އައު ޚާރިޖީ ވަޒީރު އަލް-ޝައިބާނީ ވަނީ އޭނާގެ ފުރަތަމަ ރަސްމީ ބޭރު ދަތުރުގައި ސައުދީ އަރަބިއްޔާއަށް ޒިޔާރަތްކުރައްވާފައެވެ. ސައުދީ އަރަބިއްޔާ އިން މިހާރުވެސް ގެންދަނީ ސޫރިއާ އަށް އިންސާނީ އެހީ ފޯރުކޮށްދެމުންނެވެ.

ޑިސެންބަރު މަހު އަލް އަރަބިއްޔާއަށް ދެއްވި އިންޓަވިއުއެއްގައި، އައް-ޝަރާ ވިދާޅުވީ "ސޫރިއާގެ ކުރިމަގަށް ސައުދީ އަރަބިއްޔާއިން ހަމަގައިމުވެސް ބޮޑު ދައުރެއް އަދާކުރާނެ" ކަމަށާއި، "އަވަށްޓެރި ހުރިހާ ޤައުމުތަކަށްވެސް ބޮޑެތި އިންވެސްޓްމަންޓްތައް ކުރުމުގެ ފުރުޞަތު" އޮތް ކަމަށެވެ.