ތުޅާދޫގައި ތަރައްގީކުރާ 30 އެނދުގެ ހޮސްޕިޓަލުގެ މަސައްކަތްތައް ބާރުމިނުގައި ކުރިއަކަށް ނުދޭ: ކައުންސިލް

ބ. ތުޅާދޫގައި ތަރައްގީކުރާ 30 އެނދުގެ ހޮސްޕިޓަލުގެ މަސައްކަތްތައް އެކަށީގެންވާ ބާރު މިނުގައި ކުރިއަށް ނުދާ ކަމަށް ކައުންސިލުން ބުނެފިއެވެ.

ރާއްޖެއެމްވީއަށް ދެއްވި ޚާއްސަ އިންޓަވިޔުއެއްގައި އެރަށު ކައުންސިލްގެ ރައީސް އިބްރާހިމް އާދިލް ވިދާޅުވީ ރަށުގެ ތަރައްގީއަށް ތުޅާދޫ ހޮސްޕިޓަލްގެ ޕްރޮޖެކްޓް ވަރަށް މުހިންމު ކަމަށެވެ.

މަސައްކަތްތައް ކުރިއަށްދާ ގޮތަށް އަލިއަޅުއްވާލައްވާ އާދިލް ވިދާޅުވީ ހޮސްޕިޓަލް ތަރައްގީ ކުރުމުގެ މަސައްކަތްތައް މަޑުމަޑުން ކުރިއަށްދާ ކަމަށާއި، އެކަށީގެންވާ ބާރު މިނުގައި ކުރިއަށް ނުދާ ކަމަށެވެ. އަދި މަޝްރޫއު ކުރިއަށް ގެންދިއުމުގައި ގޮންޖެހުންތަކެއް ވެސް ހުރި ކަމަށް އޭނާ ވިދާޅުވިއެވެ.

ތުޅާދޫގައި ތަރައްގީކުރާ ހޮސްޕިޓަލުގެ މަސައްކަތްތައް އެކަށީގެންވާ ބާރު މިނުގައި ކުރިއަށް ނުދާކަމަށް ކައުންސިލުން ބުނެފައިވާއިރު، މިމަސައްކަތް ކުރަމުންދާ އެމްޓީސީސީން ބުނެފައިވަނީ ހޮސްޕިޓަލުގެ މަސައްކަތްތައް މިހާރު ބާރަށް ކުރިއަށްދާކަމަށާއި، މިވަގުތު ކުރަމުންދަނީ އިމާރާތުގެ ދެވަނަ ފަންގިފިލާގައި ޝީޓް އެޅުމުގެ މަސައްކަތްތައް ކަމަށެވެ.

މި ހޮސްޕިޓަލާއެކު ބ.އަތޮޅުގެ ރަށްތަކުގައި ދިރިއުޅޭ ރައްޔިތުންނަށް އެކަށީގެން ސިއްހީ ޚިދުމަތް ލިބޭނެ ކަމަށާއި، މާލެއަށް އަންނަން ނުޖެހޭނެ ކަމަށް ސަރުކާރުން ބުނެއެވެ. އެގޮތުން މި ހޮސްޕިޓަލުން އެންމެ ޒަމާނީ ފެންވަރުގެ ފަރުވާ ގާއިމްކުރާނެ ކަމަށާއި، ސްޕެޝަލިޓީ ފަރުވާގެ އިތުރު ޚިދުމަތްތައް ގާއިމްކުރުމަށް ވަނީ ހަމަޖެހިފައެވެ.

މި މަސައްކަތް އެމްޓީސީސީއާ ހަވާލުކޮށްފައިވަނީ ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި 123،667،047.03 (ސަތޭކަ ތޭވީސް މިލިއަން ހަލައްކަ ފަސްދޮޅަސްހަތްހާސް ސާޅީސް ހަތްރުފިޔާ ތިން ލާރި) އަށެވެ. ހެލްތު މިނިސްޓްރީން މި މަސައްކަތް އެމްޓީސީސީއާ ހަވާލުކޮށްފައިވަނީ 540 ދުވަހުގެ ތެރޭގައި ނިންމާގޮތަށެވެ.

ހޮސްޕިޓަލެއް އެޅުމުގެ އަމަލީ މަސައްކަތް ފަށާފަވަނީ 2023 ވަނަ އަހަރުގެ ޖުލައި މަހުގެ ތެރޭގައެވެ.