ތުޅާދޫ އެއަރޕޯޓު ހެދުމަށް ބޭނުންވާ ބިން ހިއްކުމުގެ މަސައްކަތް ފަށައިފި
ތުޅާދޫ އެއަރޕޯޓަށް ބޭނުންވާ 44.70 ހެކްޓަރުގެ ބިން ހިއްކާނެ
ތުޅާދޫ ބިން ހިއްކުމުގެ މަސައްކަތް ފެށުން
ބ. ތުޅާދޫ އެއަރޕޯޓު ހެދުމަށް ބޭނުންވާ ބިން ހިއްކުމުގެ އަމަލީ މަސައްކަތް ފަށައިފިއެވެ.
މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއިން ބުނެފައިވާ ގޮތުގައި ތުޅާދޫ އެއަރޕޯޓަށް ބޭނުންވާ ބިން ހިއްކުމުގެ މަސައްކަތް ފަށާފައިވަނީ އަންގާރަ ދުވަހުއެވެ. މިކަމަށްޓަކައި ބޭއްވި ޚާއްސަ ރަސްމިއްޔާތެއްގައި އެ މަސައްކަތް ފައްޓަވައިދެއްވީ ރައްޔިތުންގެ މަޖިލީހުގެ ތުޅާދޫ ދާއިރާގެ މެމްބަރު، ހިސާން ހުސައިނެވެ.
ސަރުކާރުން މި މަސައްކަތް ހަވާލުކުރީ ކެޕިޓަލް މެރިން އެންޑް ސިވިލް ކޮންސްޓްރަކްޝަން ޕްރައިވެޓް ލިމިޓެޑާއެވެ. މި މަސައްކަތް މިދިޔަ ޖުލައި މަހު ހަވާލުކޮށްފައިވާއިރު މި މަޝްރޫއުގެ ދަށުން ތުޅާދޫ އެއަރޕޯޓަށް ބޭނުންވާ 44.70 ހެކްޓަރުގެ ބިން ހިއްކާނެއެވެ.
ތުޅާދޫ އެއަރޕޯޓަށް ބޭނުންވާ ބިން ހިއްކަން މިހާރު ފަށާފައިވާއިރު އެ މަސައްކަތް މިހަފުތާގައި ފެށޭނެކަމުގެ ޔަގީންކަން، މިދިޔަ ހަފުތާގައި ބ އަތޮޅަށް ކުރެއްވި ދަތުރުފުޅުގައި ރައީސުލްޖުމްހޫރިއްޔާ އިބްރާހީމް މުޙައްމަދު ސާލިހުވެސް ދެއްވިއެވެ. އެމަނިކުފާނު ވިދާޅުވީ ތުޅާދޫ ރައްޔިތުން އެންމެ ބޮޑަށް ބޭނުންވާ އަދި އެދެމުންދިޔަ ކަމަކީ އެއަރޕޯޓު ކަމަށާއި، އެ ރަށުގައި އެއަރޕޯޓެއް އަޅަން ސަރުކާރުން ނިންމީ 30 މިނެޓުން ދެވޭ ހިސާބުގައި އެއަރޕޯޓެއް އޮންނަންޖެހޭނެ ސިޔާސަތުގެ ދަށުން ކަމަށް އެމަނިކުފާނު ވިދާޅުވިއެވެ.
މީގެ އިތުރުން އެއަރޕޯޓުގެ މަސައްކަތް ނިމުމުން އެ ރަށުގެ ރައްޔިތުންނަށް އަދި ރަށާ ކައިރި ރަށްތަކަށްވެސް އޭގެ ސަބަބުން ގިނަ ފައިދާތަކެއްވާނެ ކަމަށް ރައީސް ވިދާޅުވިއެވެ.
މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއިން، ތުޅާދޫ ހިމެނޭހެން ތިން ރަށެއްގެ މަސައްކަތް ކެޕިޓަލް މެރިން އެންޑް ސިވިލް ކޮންސްޓްރަކްޝަނާ ހަވާލުކުރިއެވެ. މި މަޝްރޫއު ހަވާލުކުރީ 42،450،783 (ސާޅީސް ދެ މިލިއަން ހަތަރު ލައްކަ ފާންސާސް ހާސް ހަތްސަތޭކަ އައްޑިހަ ތިން ޑޮލަރު) ނުވަތަ 654.6 މިލިއަން ރުފިޔާއަށެވެ.
