ފަހަތުން އަރައި އާސެނަލް އިން ޖިރޯނާ ބަލިކޮށްފި

ޔުއެފާ ޗެމްޕިއަންސް ލީގުގައި ޖިރޯނާއާ ދެކޮޅަށް ކުޅުނު މެޗުން އާސެނަލް މޮޅުވެއްޖެ އެވެ.

ޖިރޯނާގެ އަމިއްލަ ދަނޑުގައި ބުދަ ދުވަހުގެ ރޭ ކުޅުނު މެޗު އާސެނަލް އިން ކާމިޔާބު ކުރީ 2-1 އިންނެވެ. އެއީ މެޗުގައި ޖިރޯނާ އިން ލަނޑު ޖަހައި ކުރި ހޯދާފައި ވަނިކޮށް، ފަހަތުން އަރައި ދެ ލަނޑު ޖަހައިގެންނެވެ. މެޗުގައި ދެ ޓީމުގެ ލަނޑުތައް ވެސް ފެނުނީ ފުރަތަމަ ހާފުގަ އެވެ.

މެޗުގެ ފުރަތަމަ ހާފުގެ 28 ވަނަ މިނެޓުގައި ޖިރޯނާ އަށް ލީޑު ނަގައިދިނީ އާނައުޓް ޑަންޖުމާ އެވެ. އޭގެ ދިހަ މިނެޓު ފަހުން، އާސެނަލަށް ލިބުނު ޕެނަލްޓީ ކާމިޔާބުކޮށް އެ ޓީމަށް ނަތީޖާ ހަމަހަމަ ކޮށްދިނީ ޖޯޖީނިއޯ އެވެ. އޭގެ ހަތަރު މިނެޓު ފަހުން އީތަން އެންވަނޭރީ ވަނީ ލަނޑު ޖަހައި އާސެނަލަށް ލީޑު ހޯދައިދީފަ އެވެ. އެ ލަނޑު އޭނާ ޖެހީ ލިއާންދްރޯ ޓްރޮސާޑް ތަނަވަސްކޮށްދިން ފުރުސަތެއްގަ އެވެ. މެޗުގެ ދެ ވަނަ ހާފުގައި ޖިރޯނާ އަށް ނަތީޖާ ހަމަހަމަ ކޮށްދޭން ކްރިސްޓިއަން ސްޓުނާއި ލަނޑެއް ޖެހި ނަމަވެސް، ވީޑިއޯ އެސިސްޓެންޓް ރެފްރީ (ވީއޭއާރު) އިން ވަނީ އެ ލަނޑު ބަލައި ނުގަންނަން ނިންމައިފަ އެވެ. އޭގެ ފަހުން އާސެނަލްގެ ރަހީމް ސްޓާލިން ޖެހި ލަނޑު ވެސް ވީއޭއާރުން ވަނީ ބަލައި ނުގަންނަން ނިންމައިފަ އެވެ.

މޮޅާއެކު އާސެނަލް އޮތީ ލީގު ތާވަލްގެ ތިން ވަނަ މަގާމުގަ އެވެ. އެއީ އެ ޓީމު ކުޅުނު އަށް މެޗުން 19 ޕޮއިންޓާ އެކު އެވެ. މުބާރާތުގެ ގަދަ 16 ވަނަ ބުރުގައި އާސެނަލް ނިކުންނަން ޖެހޭނީ ޕީއެސްވީ އެއިންދޮވަން، އޭސީ މިލާން، ފެޔެނޫޑް ނުވަތަ ޔުވެންޓަސްއާ ދެކޮޅަށެވެ.