ރާއްޖެގެ ތަކެތީގެ އަގު 4.1 އިންސައްތަ އުފުލިއްޖެ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނެފިއެވެ.

އެމްއެމްއޭ އިން އެންމެ ފަހުން ނެރުނު ކުއަރޓާލީ ރިޕޯޓުގައި ބުނެފައިވަނީ، އިންފްލޭޝަން ނުވަތަ ތަކެތީގެ އަގު އުފުލުނު މިންވަރު ހުސްވި އަހަރުގެ އޮކްޓޯބަރު މަހު ހުރީ 1.1 އިންސައްތައިގައި ކަމަށެވެ.

އެމްއެމްއޭ ގެ ރިޕޯޓުގައި ފާހަގަ ކޮށްފައިވާ ގޮތުގައި 2024  ވަނަ އަހަރުގެ ނޮވެމްބަރު މަހު އިންފްލޭޝަން ރޭޓަށް އެންމެ ބޮޑު ހިއްސާއެއް ކޮށްފައިވަނީ ދުންފަތުން (1.57 ޕަސެންޓޭޖް ޕޮއިންޓް) ކަމަށެވެ.

ތަކެތީގެ އަގު މައިގަނޑު ގޮތެއްގައި ހުރިހާ އާންމު ޚިދުމަތްތަކާއި ތަކެތިންވެސް އުފުލިފައިވާކަން އެމްއެމްއޭ އިން ފާހަގަ ކޮށްފައިވެއެވެ. ތަކެތީގެ އަގު މައްޗަށް ދިއުމުގައި އެންމެ ބޮޑަށް ހިއްސާ ކޮށްފައިވަނީ ދުންފަތުގެ ސަބަބުން ކަމަށް ފާހަގަ ވެފައިވާއިރު، ރެސްޓޯރަންޓްތަކާއި ކެފޭތަކުގެ އަގުތަކާއި، މަހުގެ ބާވަތްތަކާއި މޭވާ އާއި ތަރުކާރީ އަދި ކަރަންޓުގެ އަގުތައް މައްޗަށް ދިއުން ޖުމްލަ ކޮށް ތަކެތީގެ އަގު މައްޗަށް ދިއުމަށް ހިއްސާ ކޮށްފައިވެއެވެ.

އަގު ދަށަށް ދިޔަ ބާވަތްތަކުގެ ތެރޭގައި ފާހަގަ ކޮށްފައިވަނީ ވައިގެ މަގުން ދަތުރުކުރުމާއި، މޯބައިލް ފޯނުގެ އާލާތްތަކާއި، މައިގަނޑު ގޭތެރޭގެ ބޭނުންތަކުގެ ސާމާނާއި؛ އަދި މޯބައިލް މުވާސަލާތީ ޚިދުމަތްތަކެވެ. މަހުން މަހަށް ތަކެތީގެ އަގަށް އަންނަ ބަދަލަށް ބަލާއިރު 2024 ވަނަ އަހަރުގެ ނޮވެމްބަރު މަހު 2.5 އިން ސައްތަ އަށް އަގުތައް މައްޗަށް ގޮސްފައިވެއެވެ. މިއީ 2024 ވަނަ އަހަރުގެ އޮކްޓޯބަރު މަހު 0.2 އިންސައްތަ އަށް އަގުތައް ދަށްވުމަށްފަހު އައި ބޮޑު ބަދަލެއްކަން ވެސް އެމްއެމްއޭ އިން ވަނީ ފާހަގަ ކޮށްފައެވެ.  މަހުން މަހަށް ތަކެތީގެ އަގަށް އައި އެންމެ ބޮޑު ބަދަލުވެސް އައިސްފައިވަނީ ދުންފަތުގެ އަގަށް އައި ބަދަލުގެ ސަބަބުން ކަން އެމްއެމްއޭ އިން ވަނީ ފާހަގަ ކޮށްފައެވެ.