ރައްޔިތުންގެ ފައިސާ އިން ނަހަމަ ގޮތުގައި ބަދަލު ދިނުމަކީ އެއް ގޮތަކަށް ވެސް ކުރެވިގެންވާނެ ކަމެއް ނޫން ކަމަށް ވިދާޅުވެ، 21 މިލިއަން ޑޮލަރުގެ ބަދަލު ރައްޔިތުންގެ ފައިސާ އިން ދެނީ
'ރަސް މާލެ' ނަމުގައި ފުށި ދިއްގަރު ފަޅުން 1153 ހެކްޓަރުގެ ބިން ހިއްކުމުގެ މަސައްކަތް ރައީސް މުއިއްޒު ފެއްޓެވީ މަޖިލިހުގެ ރުހުން ވެސް ނެތި
ފުށިދިއްގަރު ފަޅުގެ މަޝްރޫއު: ހިތްކާފައިވާ ސަރަހައްދުގެ މަންޒަރެއް
ރައްޔިތުންގެ ފައިސާ އިން ނަހަމަ ގޮތުގައި ބަދަލު ދިނުމަކީ އެއް ގޮތަކަށް ވެސް ކުރެވިގެންވާނެ ކަމެއް ނޫން ކަމަށް ކުރިން ވިދާޅުވި ރައީސް މުއިއްޒު، ކެޕިޓެލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީ) އަށް ބަދަލުގެ ގޮތުގައި 21 މިލިއަން ޑޮލަރު ރައްޔިތުންގެ ފައިސާ އިން ދޭން ނިންމައިފި ކަމަށް ހާމަ ވެއްޖެއެވެ.
ބައެއް ކޮންޓްރެކްޓަރުންނާ އެކު ސަރުކާރުން ހަދާފައި ހުރި އެއްބަސްވުންތަކެއް ކުއްލި ގޮތަކަށް އުވާލުމާ ގުޅިގެން އުފެދުނު މައްސަލަތައް ހައްލު ކުރުމަށް ރައީސް ސޯލިހްގެ ސަރުކާރުން އެކުލަވާލި ސެޓްލްމަންޓް ކޮމިޓީގެ ނިންމުންތަކާ އެއްގޮތައް ހަދާފައި ހުރި ގިނަ ސެޓްލްމަންޓް އެއްބަސްވުންތައް ވެސް ރައީސް މުއިއްޒު ވަނީ އުވާލައްވާފައެވެ.
"އަދަދު" ނޫހުން ރިޕޯޓު ކޮށްފައިވާ ގޮތުގައި ސީއެމްސީ އާ އެކީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ސޮއިކުރި އެއްބަސްވުން އުވާލުމުން ސީއެމްސީ އަށް ލިބުނު ގެއްލުމުގެ ބަދަލު ހޯދުމަށް އެ ކުންފުނިން ކުރިން އޮތީ އާބިޓްރޭޝަނަށް ދާށެވެ. އެހެން ނަމަވެސް 21 މިލިއަން ޑޮލަރު (323 މިލިއަން ރުފިޔާ) ގެ ސެޓްލްމަންޓް އެއްބަސްވުމެއްގައި ސަރުކާރުން ސޮއި ކުރުމުން، އެ މައްސަލައިގައި އާބިޓްރޭޝަނަށް ނުދާން ސީއެމްސީއިން އެއްބަސްވެފައިވާ ކަން އެ ނޫހަށް އެނގިފައިވާ ކަމުގައެވެ.
'ރަސް މާލެ' ނަމުގައި ފުށި ދިއްގަރު ފަޅުން 1153 ހެކްޓަރުގެ ބިން ހިއްކުމުގެ މަސައްކަތް ރައީސް މުއިއްޒު ފެއްޓެވީ، 19 ވަނަ ރައްޔިތުންގެ މަޖިލީހުން އެ މަޝްރޫއު ރައްޔިތުންގެ ފައިސާ އިން ޚަރަދު ކޮށްގެން ކުރިއަށް ނުގެންދިއުމަށް ސަރުކާރަށް ލަފާ ދީފައި ވަނިކޮށްނެވެ.
2024 ވަނަ އަހަރުގެ ބަޖެޓުގައި 400 މިލިއަން ރުފިޔާ ފުށި ދިއްގަރު ފަޅު ހިއްކަން ހިމަނާފައި އޮތް ނަމަވެސް އެ ފައިސާ ހޯދާނެ ގޮތެއް ބަޖެޓުގައި ހިމަނާފައި ނުވުމާއި، ރާއްޖޭގެ ރަށްރަށުގެ ތަރައްގީ އަށް ފަށާފައި ހުރި ގިނަ މަޝްރޫއުތަކެއް ހުރުމާއެކު އެ މަޝްރޫއުތައް ނިންމުން މާ ރަނގަޅުވާނެ ކަމަށް ބުނެ އެމްޑީޕީ ގެ މެޖޯރިޓީ އޮތް 19 ވަނަ މަޖިލީހުން އެ މަޝްރޫއު ވަނީ ބަޖެޓުން މުޅިން އުނިކޮށްފައެވެ.
އެހެން ނަމަވެސް ރައްޔިތުންގެ މަޖިލީހުގެ ރެކޮމެންޑޭޝަން އަށް އެއްވެސް ބެލުމެއް ނެތި ރައީސް މުއިއްޒުގެ ސަރުކާރުން ސީއެމްސީ އާ ހަވާލު ކޮށް މަޝްރޫއު ވަނީ ކުރިއަށް ގެންދިޔައިރު، ރަށްރަށުގެ ތަރައްގީގެ މަޝްރޫއުތައް ކުރިއަށް ނުގެންދަވަނީ ކުރީގެ މަޖިލިހުން ބަޖެޓް ހަދާފައިވާ ގޮތުން ކަމަށް ތަކުރާރުކޮށް ރައީސް މުއިއްޒު ވިދާޅުވެފައިވެއެވެ.
އޭރު މުއިއްޒުގެ ސަރުކާރުން ރައްޔިތުންނަށް ދެއްކި މަންޒަރަކީ ފުށިދިއްގަރު ފަޅު ހިއްކަނީ ދައުލަތުން އެއްވެސް ފައިސާ އެއް ޚަރަދުކޮށްގެން ނޫން ކަމުގައެވެ.
އަޑިނޭނގޭ ގޮތައް ސީއެމްސީ އަށް މުއިއްޒުގެ ސަރުކާރުން 1153 ހެކްޓަރުގެ ބިން ހިއްކަން ހަވާލު ކުރިއިރު، ހުޅުމާލޭން 10 ހެކްޓަރުގެ ބިން ދިނުމުގެ އިތުރުން ހިއްކާ ފުށި ދިއްގަރު ފަޅުގެ ބިމުން 60 ހެކްޓަރުގެ ބިމުގެ ލީސް ރައިޓްސް 99 އަހަރަށް ދޭ ގޮތައް އޮތީ ސަރުކާރުން އެއް ބަސްވެފައެވެ. އޭރުގެ އަންދާޒާ ތަކަށް ބަލާއިރު މަޝްރޫއު ހިންގަން ސަރުކާރުން ސީއެމްސީ އަށް ދޫކޮށްލާ ބިމުގެ އަގަށް އެންމެ ކުޑަވެގެންވެސް 34 ބިލިއަން ރުފިޔާ އަރާނެ ކަމަށް ވަނީ ބެލެވިފައެވެ.
ސީއެމްސީ އަށް ހަވާލު ކުރި މަޝްރޫއުގެ ބައެއް ފުރިހަމަ ކޮށްފައިވަނިކޮށް އަދި އޭގެ ފަހުން މަޝްރޫއު ބޮޑުތަނުން މަޑުޖެހިފައިވަނިކޮށް ހުސްވި އަހަރުގެ ތެރޭގައި އެޗްޑީސީ އިން ވަނީ އެއެއްބަސްވުން ބާތިލު ކޮށްފައެވެ. ސީއެމްސީ އިން އާބިޓްރޭޝަނަށް މައްސަލަ ހުށަހަޅަން ނިންމީ އެހެން ވެގެން ކަމަށް ރިޕޯޓުކޮށްފައިވެއެވެ.
