ޕްރައިވެޓް އިންޝިއުރަންސް އޮންނަ ފަރާތްތަކަށް ހުކުރު ދުވަހުން ފެށިގެން އާސަންދަ ލިބޭނީ އެ އިންޝިއުރެންސްގެ ލިމިޓް ހަމަވުމުން ކަމަށް ނެޝަނަލް ސޯޝަލް ޕްރޮޓެކްޝަން އެޖެންސީން ބުނެފިއެވެ.
ނެޝަނަލް ސޯޝަލް ޕްރޮޓެކްޝަން އެޖެންސީން ބުނީ ދިވެހި ރައްޔިތުންނަށް ރަނގަޅު ފެންވަރުގެ އަސާސީ ޞިއްޙީ ޚިދުމަތް ފޯރުކޮށްދިނުމަށްޓަކައި ހިންގާ އިޖްތިމާޢީ ޞިއްޙީ އިންޝުއަރަންސްގެ ޤައުމީ ނިޒާމް، "އާސަންދަ ސްކީމް" އަކީ ދެމެހެއްޓެނިވި ގޮތެއްގައި ފެންވަރު ރަނގަޅު ޚިދުމަތްތަކެއް ފޯރުކޮށްދެވޭ ނިޒާމަކަށް ހެދުމަށްޓަކައި މަސައްކަތްތަކެއް ދަނީ ކުރެވެމުން ކަމަށެވެ.
އަދި މި މަޤްސަދުތައް ހާސިލްކުރުމަށްޓަކައި ގެނައުމަށް ހަމަޖެހިފައިވާ ބަދަލުތަކުގެ ތެރެއިން ޞިއްޙީ ޚިދުމަތްދޭ މަރުކަޒުތަކުން ޚިދުމަތް ހޯދާ ފަރާތްތަކުގެ ތެރެއިން ޕްރައިވެޓް އިންޝުއަރަންސް އޮންނަ ފަރާތްތަކުން ހޯދި ޚިދުމަތްތަކަށް ބިލްކުރުމުގައި ޕްރައިވެޓް އިންޝުއަރަންސަށް އިސްކަންދިނުމަށް ވަނީ ހަމަޖެހިފައެވެ. މިކަންކަން ކުރިއަށްދަނީ ދިވެހި ރައްޔިތުންނަށް ލުއިފަސޭހަ އަދި ދެފުށްފެންނަ ފަދަ އުސޫލަކުންކަން ކަށަވަރުކުރުމަށްޓަކައި މިފިޔަވަޅު ތަންފީޛު ކުރުމަށް ހަމަޖެހިފައިވަނީ އެކި ފިޔަވަހިތަކަށް ބަހާލައިގެން، "އައުޓް-ޕޭޝަންޓް" އަދި "އިން-ޕޭޝަންޓް" ގެ ޚިދުމަތްތައް ވަކިންނެވެ.
އެގޮތުން 1 ނޮވެންބަރު 2024 އިން ފެށިގެން ސަރުކާރުގެ އަދި އަމިއްލަ ޞިއްޙީ ޚިދުމަތްދޭ މަރުކަޒުތަކުން "އައުޓް-ޕޭޝަންޓް" ގެ ޚިދުމަތްތައް ހޯއްދަވާ ފަރާތްތަކުގެ ތެރެއިން ޕްރައިވެޓް އިންޝުއަރަންސް އޮންނަ ފަރާތެއްނަމަ، ޕްރައިވެޓް އިންޝުއަރަންސަށް ފުރަތަމަ ބިލް ކުރާގޮތަށް ވަނީ ހަމަޖެހިފައެވެ. އަދި ޕްރައިވެޓް އިންޝުއަރަންސް ނަގާފައިވާ ފަރާތްތަކުން އެފަރާތްތަކުގެ ޕެކޭޖްތަކުގެ ލިމިޓް ހަމަވުމުން ނުވަތަ ޕްރައިވެޓް އިންޝުއަރަންސް އިން އެ ޚިދުމަތެއް ކަވަރު ނުކުރާނަމަ، އެ ފަރާތަކަށް މިހާރެކޭވެސް އެއް ގޮތަށް އާސަންދައިން އެ ޚިދުމަތަކަށް ކަވަރޭޖެ ލިބިގެންދާނެއެވެ.
އެންސްޕާއިން ވަނީ އާސަންދަ ސްކީމް މެދުވެރިކޮށް ޚިދުމަތް ލިބިގަތުމަށްފަހު އެކަމުގެ ރަސީދު ހޯއްދެވުމަށް އެދިފައެވެ. އަދި ކަނޑައެޅިފައިވާ އުސޫލާއި ހިލާފަށް ޚިދުމަތްދޭ މަރުކަޒުތަކުން އަމަލުކުރާކަން ފާހަގަ ކުރެއްވިއްޖެނަމަ އެކަން އާސަންދަ ކޮމްޕެނީ ލިމިޓެޑްގެ "ޝިކާވަތި" ޗެޓްލައިން 7951400 އަށް ރިޕޯޓް ކުރުމަށް ވަނީ އެދިފައެވެ. އަދި މިކަމާ ގުޅޭ އިތުރު މަޢުލޫމާތު ސާފުކުރުމަށް އާސަންދަ ކޮމްޕެނީ ލިމިޓެޑްގެ ހޮޓްލައިން 1400 އަށް ގުޅޭނެކަމަށް އެންސްޕާއިން ބުނެއެވެ.
