ޕްރައިވެޓް އިންޝުއަރެންސުން ކެނޑުމަށްފަހުން އާސަންދަ ދޭ ގޮތައް ހަމަ ޖައްސައިފި އެވެ.
އެންސްޕާ އިން ބުރާސްފަތި ދުވަހު ނެރުނު ބަޔާނެއްގައި ބުނީ، ސިއްހީ ޚިދުމަތްދޭ މަރުކަޒުތަކުން ޚިދުމަތް ހޯދާ ފަރާތްތަކުގެ ތެރެއިން ޕްރައިވެޓް އިންޝުއަރެންސް އޮންނަ ފަރާތްތަކުން ހޯދާ ޚިދުމަތްތަކަށް ބިލްކުރުމުގައި ޕްރައިވެޓް އިންޝުއަރެންސަށް އިސްކަންދިނުމަށް ހަމަޖައްސާފައި ވާކަމަށެވެ.
އެންސްޕާ އިން ބުނާ ގޮތުގައި މިބަދަލާ ގުޅިގެން "އައުޓް ޕޭޝަންޓް" ގެ ޚިދުމަތްތައް ހޯދާ ފަރާތްތަކުގެ ތެރެއިން ޕްރައިވެޓް އިންޝުއަރަންސް އޮންނަ ފަރާތެއްނަމަ، ފުރަތަމަ ބިލްކުރާނީ ޕްރައިވެޓް އިންޝުއަރަންސަށެވެ. އާސަންދަ ސްކީމުން އެޚިދުމަތުގެ އަގު ކަވަރުކުރާނީ، ޕްރައިވެޓް އިންޝުއަރެންސް ގެ ލިމިޓު ހަމަވުމުން ކަމަށްވެސް އެންސްޕާއިން ބުނެފައިވެއެވެ.
މިކަން ތަންފީޒު ކުރާނީ ފިޔަވަހިތަކަށް ބަހާލައިގެން ކަމަށާއި، ޝަކުވާއެއް ވާނަމަ "ޝިކާވަތި ޗެޓްލައިން" 7951400 އަށް ރިޕޯޓު ކުރެވޭނެ ކަމަށް ވެސް އެންސްޕާއިން ބުނެއެވެ.
އެންސްޕާ އިން ވަނީ އާސަންދަ ސްކީމް މެދުވެރިކޮށް ހިދުމަތް ލިބިގަތުމަށް ފަހު، އެކަމުގެ ރަސީދު ހޯދުމަށާއި އަދި ކަނޑައަޅާފައިވާ އުސޫލާ ހިލާފަށް ހިދުމަތްދޭ މަރުކަޒުތަކުން އަމަލުކުރާކަން ފާހަގަވެއްޖެ ނަމަ، އެކަން ޗެޓްލައިން އަށް ރިޕޯޓުކުރުމަށް އެދިފައެވެ.
