ރާއްޖޭގައި އާސަންދައިގެ ނަމުގައި ހިލޭ ބޭސްފަރުވާ ރައްޔިތުންނަށް ލިބޭ ގޮތް ހަމަޖައްސާދީފައިވަނީ ބޭހަށް ސަލާން ޖެހުން ހުއްޓުވުމަށެވެ. ރައްޔިތުންނަށް ފަސޭހަ އުފާވެރި ދިރިއުޅުމެއް ހޯދައިދިނުމަށެވެ. އާސަންދަ ތައާރަފްވެ ބޭނުންކުރަން ފެށިފަހުން ރައްޔިތުންގެ އަތުން ބޭސްފަރުވާއަށް މާ ބޮޑު ހަރަދެއް ކުރާކަށް ނުޖެހެއެވެ. ސިޔާސީ ވެރިންގެ ގާތަށް ސަލާން ޖަހަން ދާކަށް ނުޖެއެވެ. އެހެންކަމުން މި ސްކީމަކީ ރައްޔިތުން ހެއްވާލި ސްކީމެކެވެ. މީގެ ކުރިން އާސަންދައާއެކު ރައްޔިތުންނަށް އުފާވެރިކަން ލިބިގެންދިޔަ ނަމަވެސް ރައީސް ޑރ.މުހައްމަދު މުއިއްޒުގެ ވެރިކަމުގައި މިސްކީމުން ރައްޔިތުންގެ ހިތްތައް މިވަނީ މާޔޫސްކޮށްލާފައެވެ.

ރައީސް މުއިއްޒު ވެރިކަމަށް ވަޑައިގެންނެވީ ސިއްހީ ދާއިރާ ކުރިއަރުވައި، އާސަންދަ ފުޅާކުރާނެ ކަމުގެ ވައުދުފުޅާއެކުއެވެ. ރާއްޖޭގެ ބޭރުގެ ގިނަ ގައުމުތަކުން އާސަންދަ ލިބޭގޮތް ހަމަޖައްސަދޭނެ ކަމަށް އެމަނިކުފާނު ވިދާޅުވިއެވެ. އެގޮތުން ޔޫއޭއީ އަދި ތައިލެންޑުން އާސަންދައިގެ ޚިދުމަތް ލިބޭނެ ކަމަށް ރައީސް މުއިއްޒު ވިދާޅުވެފައިވެއެވެ.

އެއާއެކު އާސަންދައިން ވަނީ 17 ޖެނުއަރީ 2024 ގައި ވެސް ތައިލެންޑާއި ޔޫއޭއީއަށް ބޭސްފަރުވާއަށް މީހުން ފޮނުވުމަށް ކުރަން ޖެހޭ މަސައްކަތްތައް ފަށާފައިވާ ކަމަށް ބުނެފައެވެ. ނަމަވެސް މިހާތަނަށް ލަންކާ އަދި އިންޑިއާ ފިޔަވައި އެހެން ގައުމަކުން އާސަންދައިގެ ދަށުން ބޭސް ކުރެވޭނެ އިންތިޒާމު ހަމަނުޖެހެއެވެ. މިމަސައްކަތް ކުރިއަށް ގޮސްފައިވާ ހިސާބާ ގުޅޭގޮތުން ސަރުކާރުގެ ބަހެއް ވެސް ނުލިބެއެވެ.

އާސަންދަ ފުޅާކުރުމަށް އައި މިސަރުކާރުގައި މިހާރު ފެނިގެން ދަނީ މުޅިން ތަފާތު މަންޒަރެކެވެ. ރާއްޖެއިން ވެސް އާސަންދައިގެ ޚިދުމަތް ނުލިބިގެން ރައްޔިތުން މިއަދު ޝަކުވާ ކުރަން ވަނީ ފަށާފައެވެ. ސޯޝަލް މީޑީއާއަށް ބައެއް މައްސަލަތައް ފެންމަތިވަމުންދާއިރު، ދާދިފަހުން އޭޑީކޭ ހޮސްޕިޓަލުގައި ފަރުވާ ހޯދި މީހަކަށް އާސަންދަ ހަމަނުޖެހި، ބިލް ނުދެއްކިގެން ޕޭޝަންޓު ހޮސްޕިޓަލުން ދޫކޮށްލުމަށް ދެކޮޅު ހެދި މައްސަލައެއް ފެންމަތިވެފައިވެއެވެ. އާއިލާގެ ފަރާތުން މައުލޫމާތު ދެމުން ބުނެފައިވަނީ ޕޭޝަންޓުގެ ބިލަށް ދެއްކޭ މިންވަރަށް ވުރެ ބޮޑު ބިލެއް އަރާފައިވާ ކަމަށާއި، އާސަންދައިން ބިލް ނުކުރާތީ ޕޭޝަންޓް ހޮސްޕިޓަލުން ދޫނުކޮށް ބޭއްވި ކަމަށެވެ.

އާސަންދައިން ބިލް ނުކޮށް، ޚިދުމަތް ލަސްވެގެން ދިއުމުގެ ސަބަބުން އެކަމުގެ ދެރައާއި އުދަނގޫ ރައްޔިތުން ތަހައްމަލް ކުރަން ޖެހުމަކީ ބޭސްފަރުވާއަށް ސަލާންޖެހުން ކަމަށް ރައްޔިތުން ބުނެއެވެ. މިފަދަ ގިނަ މައްސަލަތައް ފެންމަތިވަމުންދާއިރު، ރާއްޖެއިން ބޭރުގައި އިންޑިއާގެ ހޮސްޕިޓަލުތަކުން ވެސް ބައެއް ޕޭޝަންޓުންނަށް އާސަންދަ ޚިދުމަތް ހަމަނުޖެހި ލަސްވާ ގިނަ މައްސަލަތައް ދަނީ ފެންމަތިވަމުންނެވެ.

މީގެ އިތުރުން ގިނަ ދިވެހިން ޚިދުމަތް ހޯދަމުން ދިޔަ އިންޑިއާގެ ބެންގަލޫރުގެ، މަނިޕާލް ހޮސްޕިޓަލުން އާސަންދަ ދިނުން ޖުލައި މަހުގެ ތެރޭގައި ވަނީ ހުއްޓާލާފައެވެ. އަދި އިންޑިއާގެ 49 ހޮސްޕިޓަލަކަށް އާސަންދައިގެ ޚިދުމަތް ލިބޭ ކަމަށް ސަރުކާރުން ބުނި ނަމަވެސް ބޮޑެތި ބަލިތަކަށް ފަރުވާ ހޯދާ މީހުން ފަރުވާއަށް އިންޑިއާއަށްދާ ފަހުން ބައެއް ޓެސްޓުތައް ރާއްޖޭގައި ހެދޭ ކަމަށް ބުނެ، އެޓެސްޓުތައް ހެދުމަށް އާސަންދައިން ޚިދުމަތް ނުދޭ ކަމަށް އެމީހުން ބުނެފައިވެއެވެ.

ކެންސަރު ބަައްޔަށް ފަރުވާ ހޯދާ މީހެއް ބުނެފައިވަނީ ކުރިން ފުލްކޮށް ޕޭމަންޓް ކަވަރުކުރަމުން އައި ބައެއް ޓެސްޓްތަކުން މިހާރު އާސަންދަ އެޕްރޫވްކުރަނީ ތިންބައި ކުޅަ އެއްބައި ކަމަށެވެ. މިއަދު ބިލުގެ ބޮޑު ބައެއް ދައްކަންޖެހުނީ ބަލިމީހާގެ ޖީބުން ކަމަށެވެ.

އާސަންދަ ހަރުދަނާ ކުރުމަށް އައި ސަރުކާރާއެކު މިހާރު ފެނިގެން މިދަނީ މި ޚިދުމަތް ރައްޔިތުންނަށް ނުލިބޭ މަންޒަރެވެ. ސިއްހީ ޚިދުމަތްދޭ ހޮސްޕިޓަލްތަކާ ކްލިނިކުންތަކުން އާސަންދައިން ލިބެންޖެހޭ ފައިސާ ނުލިބި އެތަންތަން ހިންގުމަށް ވަނީ ދަތިވެފައެވެ.

އެގޮތުން 13 އޯގަސްޓް 2024 ގައި މާލިއްޔަތު ކޮމެޓީގައި ޕްރައިވެޓް އެންމެ ބޮޑު ހޮސްޕިޓަލް އޭޑިކޭގެ ހުއްޓާލަންޖެހިދާނެ ކަމުގެ އިންޒާރު އޭޑީކޭ ގްރޫޕުގެ ޗެއާމަން އަހްމަދު ނާޝިދު ވަނީ ދެއްވާފައެވެ. އެދުވަހު ނާޝިދު ވިދާޅުވީ އޭޑީކޭ ހޮސްޕިޓަލް އޮތީ އައިސީޔޫގައި ކަމަށާއި، އާސަންދައިން 250 މިލިއަން ދޭން ޖެހޭ ކަމަށެވެ. އަދި އާސަންދައިން ލިބެން ޖެހޭ ފައިސާ ނުލިބި ފުނިޖެހެމުން ގޮސް، އޭޑީކޭ ހޮސްޕިޓަލް ހުއްޓާލަން ޖެހޭ ހިސާބަށް ކަންކަން ގޯސްވެފައިވާ ކަމަށެވެ.

ހާލަތު މިހެން އޮތްއިރު، އަންނަ އޮކްޓޫބަރު މަހު 1 އިން ފެށިގެން ޕްރައިވެޓް އިންޝުއަރެންސް އޮންނަ މީހުންނަށް އާސަންދަ ހިދުމަތް ލިބޭނީ އެ އިންޝިއުރަންސަށް ކަނޑާފައި ބާކީ ބިލަށް އަރާވަރު ކަމަށް އާސަންދަ ހިންގާ ސޯޝަލް ޕްރޮޓެކްޝަން އެޖެންސީ (އެންސްޕާ)އިން ބުނެފައިވާއިރު، ސަރުކާރަށް 9 މަހަށް ވުރެ ގިނަ ދުވަސްވީއިރު، ހަރުދަނާ ފިޔަވަޅެއް އެޅި މަންޒަރެއް އަދި ނުފެނެއެވެ. ފެނިގެންދަނީ ޚިދުމަތް ނުލިބި، ރައްޔިތުންނަށް މިއަދު ބޭސްފަރުވާއަށް ސަލާން ޖެހުމަށް މަޖުބޫރުކުރުވާ މަންޒަރެވެ. އަދި ޚިދުމަތް ލަސްވެ، ޕޭޝަންޓު ހޮސްޕިޓަލުން ދޫނުކޮށް ހިފަހައްޓާ މަންޒަރެވެ.