މިނިސްޓަރުންގެ ޚަރަދު ކުޑަކުރުމުގެ ގޮތުން ސްރީ ލަންކާގެ ރައީސް އޮފީހުން މުހިންމު ފިޔަވަޅުތަކެއް އަޅައިފި ކަމަށް ލަންކާގެ މީޑިއާ އިން ރިޕޯޓު ކޮށްފިއެވެ.

އެ ގައުމުގެ ރައީސް އޮފީހުގެ ސަކިއުލާރ އަކުން މި ފިޔަވަޅުތައް ތަންފީޒު ކުރުމަށް ހުރިހާ މިނިސްޓްރީތަކުގެ ސެކްރެޓަރީންނަށް މިހާރު ވަނީ އަންގާފައެވެ.

އެ ސަރކިއުލަރ ގައި މިނިސްޓަރުންނަށް ދޭންޖެހޭ ވަސީލަތްތަކާއި ޚިދުމަތްތަކާ ގުޅޭގޮތުން އިރުޝާދު ދީފިއިވާ ކަމަށް ރިޕޯޓުތަކުގައި ވެއެވެ. 

އައު އުސޫލުތަކުގެ ދަށުން، ސަރުކާރުން މިނިސްޓަރުންނާއި ނައިބު މިނިސްޓަރުންނަށް އެހީތެރިވެ ދިނުމަށް މިނިސްޓްރީ ތަކަށް ގިނަވެގެން އައްޔަން ކުރެވޭނެ މުވައްޒަފުންގެ އަދަދު ވަނީ ކަނޑައަޅާފައެވެ. 

މިނިސްޓަރުންނަށް އެހީތެރިންގެ ގޮތުގައި ގިނަވެގެން 15 މުވައްޒަފުން އައްޔަން ކުރުމުގެ ހުއްދަ ދީފައިވާއިރު، ނައިބު މިނިސްޓަރުންނަށް އެހީތެރި ވުމަށް ގިނަވެގެން އައްޔަން ކުރެވޭނީ 12 މުވައްޒަފުންނެވެ. 

އެހީތެރިންގެ މަސްއޫލިއްޔަތަކީ މިނިސްޓަރުންނާއި ނައިބު މިނިސްޓަރުންގެ މަސައްކަތްތައް ހަލުވިކަމާއެކު ކުރުމަށް އެހީތެރި ވެދިނުމާއި ކަމާބެހޭ ހުރިހާ ފަރާތްތަކާ ގުޅިގެން މަސައްކަތް ކުރުމެވެ. 

މިނިސްޓްރީ ތަކަށް ލަފާދޭ ފަރާތްތައް އައްޔަންކުރުމާއި އެހީތެރިން އައްޔަންކުރުމާ ގުޅޭގޮތުން ވެސް އިރުޝާދު ދީފައިވެއެވެ. 

މީގެ އިތުރުން، ރައީސް އޮފީހުން މިނިސްޓަރުންނާއި ނައިބު މިނިސްޓަރުންނަށް ދޭނެ ރަސްމީ އުޅަނދުފަހަރާއި، ތެލުގެ އެލަވަންސާއި އަދި ފޯނު ޚަރަދުތަކާ ގުޅޭގޮތުން ވެސް އުސޫލުތަކެއް ކަނޑައަޅާފައިވެއެވެ. 

މިނިސްޓަރާއި، މިނިސްޓަރުގެ ނައިބު ގެ ބޭނުމަށް ގިނަވެގެން ދޫކުރެވޭނީ ރަސްމީ ދެ އުޅަނދު ކަމަށާއި އަދި ކުއްޔަށް ނުވަތަ އެހެން ގޮތަކަށް ހޯދާ އުޅަނދުފަހަރު ބެލެހެއްޓުމުގެ ޒިންމާ އުފުލާނީ މިނިސްޓްރީގެ ސެކްރެޓަރީ ކަމަށް ބުނެފައިވެއެވެ. 

މިނިސްޓަރުންނާއި ނައިބު މިނިސްޓަރުންނަށް މަހަކު ގިނަވެގެން 900 ލީޓަރު ތެޔޮ ރަސްމީ އުޅަނދުފަހަރަށް ދޫކުރެވޭނެ ކަމަށް ވެސް ވަނީ ބުނެފައެވެ. 

އަމިއްލަ ސެކްރެޓަރީ، ކޯޑިނޭޓިންގ ސެކްރެޓަރީ، މީޑިއާ ސެކްރެޓަރީ އަދި ޕަބްލިކް ރިލޭޝަންސް އޮފިސަރުގެ މަޤާމުތަކަށް މީހުން ހަމަޖައްސާނީ ވަގުތީ ގޮތުން ކަމަށާއި، އެހެން ނަމަވެސް މިނިސްޓަރު ނުވަތަ ނައިބު މިނިސްޓަރުގެ އާއިލާގެ މެންބަރުން ނުވަތަ ގާތް ތިމާގެ މީހުން މި މަޤާމުތަކަށް އައްޔަން ނުކުރެވޭނެ ކަމަށް ވަނީ ބުނެފައެވެ.