"ފްލެޓް ލިސްޓް ނެރުނަސް ޤަބޫލު ކުރަން އުނދަނގޫވާ މިންވަރަށް ފްލެޓާއި ގޯތީގެ މައްސަލައިގައި އާއްމުންގެ ހިތުގައި ޖައްސައިފި"

ފްލެޓް ލިސްޓް ފައިނަލްކޮށް މި ސަރުކާރުން އެ ލިސްޓު ނެރުނަސް އެކަން ޤަބޫލު ކުރަން އުނދަނގޫވާ މިންވަރަށް ފްލެޓާއި ގޯތީގެ މައްސަލައިގައި އާއްމުންގެ ހިތުގައި ޖައްސާފައިވާ ކަމަށް ރައްޔިތުންގެ މަޖިލީހުގެ ގަލޮޅު އުތުުރު ދާއިރާގެ މެމްބަރު މުހައްމަދު އިބްރާޙިމް (ކުޑޫ) ވިދާޅުވެއްޖެއެވެ.

ދާއިރާގެ ރައްޔިތުންނާއި ހުކުރު ދުވަހުގެ ރޭ ބޭއްވި ބައްދަލުކުރެއްވުމަށް ފަހު ރާއްޖެއެމްވީ އަށް ދެއްވި ބަސްތީގަތުމެއްގައި ކުޑޫ ވަނީ އެ ދާއިރާގެ ރައްޔިތުން ތިބީ ގޯއްޗާއި ގެދޮރުގެ މައްސަލައިގައި ވަރަށް ބޮޑަށް ކަންބޮޑުވެފައިކަން ފާހަގަކުރައްވާފައެވެ. އެގޮތުން އާއްމުންގެ އެންމެ ބޮޑު ޝަކުވާއަކީ ގޯއްޗާއި ފްލެޓް ލިބޭނެ ދުވަހެއް ނޭނގުން ކަމަށް ކުޑޫ ވަނީ ވިދާޅުވެފައެވެ.

މީގެ އިތުރުންއެ ބައްދަލުވުމުގައި އާއްމުންގެ ޚިޔާލާއި މަޝްވަރާ ހޯދާފައިވާނެ ކަމަށް އޭނާ ވިދާޅުވިއެވެ. ދާއިރާގެ ރައްޔިތުންގެ އެންމެ ބޮޑު ކަންބޮޑުވުމެއް އޮތް ކަމަކީ ގޯއްޗާއި ފްލެޓް ދޭނެ ދުވަހެއް ނޭނގުން ކަމަށް ވެސް އޭނާ ވިދާޅުވިއެވެ. އަދި މިހާތަނަށް މަޖިލީހުގައި އޭނާ ކުރެއްވި މަސައްކަތްތަކުގެ މައުލޫމާތު އާއްމުންނާއި ހިއްސާކޮށްފައިވާނެ ކަމަށް މެމްބަރު ވަނީ ފާހަގަކުރައްވާފައެވެ. އަދި މާރޗް މަސް ފެށެންވާއިރަށް އޭނާ ކުރި މަސައްކަތްތަކުގެ މައުލޫމާތު އާއްމުންނާއި ހިއްސާކުރެވޭނެ ކަމަށް ކުޑޫ ވަނީ ވިދާޅުވެފައެވެ.

މި މައްސަލައިގައި ސަރުކާރުގެ ހެޔޮ ނިޔަތެއް ނެތް ކަަމަށް ވެސް އޭނާ ވަނީ ވިދާޅުވެފައެވެ. އެހެން ނޫން ނަމަ މިކަމާއި ގުޅޭގޮތުން މަޖިލީހުގެ ކޮމިޓީގައި އޮތް މަސައްކަތް ކުރިއަށް ނުގެންގޮސް ސަރުކާރުގެ ފުރިހަމަ މެޖޯރިޓީ އޮތް މަޖިލީހުގެ ނާޖާއިޒް މަންފާ ނުނަގާނެ ކަމަށް އޭނާ ވަނީ ސިފަކުރައްވާފައެވެ.