މެންބަރު އިސްމާއިލުގެ އިއުތިރާފަށް ބަލައި ތަހުގީގު އަވަސްކޮށްދިނުމަށް އެދިފައިވާނެ - މަހުފޫޒް

ޕީއެންސީގެ ވަގުފޯމުތަކުގައި ސޮއިކުރެއްވި މައްސަލައިގައި މެންބަރު މުހައްމަދު އިސްމާއިލުގެ އިއުތިރާފަށް ބަލައި ތަހުގީގު އަވަސްކޮށްދިނުމަށް އެދިފައިވާނެ ކަމަށް އެމްޑީޕީގެ ލީގަލް ޓީމުގައި ހިމެނިވަޑައިގަންނަވާ މަހުފޫޒް ސައީދު ވިދާޅުވެއެވެ.

ޕީއެންސީ އަށް މެމްބަރުން އިތުރުކުރަން މީހުންގެ ޒާތީ މައުލޫމާތުން ވައްކަން ކުރި މައްސަލައިގެ ތަހުގީގުގެ ވާނުވާ ބަލަން އެމްޑީޕީ އިން ފުލުހަށް ދިއުމަށްފަހު ރާއްޖެޓީވީއާ ވާހަކަދައްކަވަމުން އެމްޑީޕީގެ ލީގަލް ޓީމުގައި ހިމެނިވަޑައިގަންނަވާ މަހުފޫޒް ސައީދު ވިދާޅުވީ ޕީއެންސީން ހުށަހެޅި ވަގުފޯމުތަކުގައި އެންމެ ގިނައިން ހެއްކެއްގެ ސޮއިކުރެއްވި ވިލިމާލެ ދާއިރާގެ މެންބަރު މުހައްމަދު އިސްމާއިލް މީޑިއާއަށް ދޫކުރެއްވި ވީޑިއޯއެއްގައި ވިދާޅުވެފައިވަނީ ސޮއިކުރެއްވުމުގެ ކަންތަކުގައި އެބަދުވެސް އެކަން ކުރައްވާގޮތް ކަމަށާއި، އެހެންކަމުން އޭނާ ވެފައިވާ އިއުތިރާފަށް ބަަލައި އެ މައްސަލައިގެ ތަހުގީގު އަވަސްކޮށްދިނުމަށް އެދިފައިވާނެ ކަމަށެވެ.

މަހުފޫޒް ވިދާޅުވީ ވަގުފޯމު މައްސަލައިގައި ވަކިވަކިން މައްސަލަ ހުށަހެޅި ފަރާތްތަކާއި ސުވާލުކޮށް ބަޔާނާއި އިނގިލީގެ ނިޝާން ނަގާ ތަހުލީލުކުރުމުގެ މަސައްކަތް ކުރަމުންދާ ކަމަށް ފުލުހުން ވިދާޅުވެފައިވާ ކަމަށެވެ. މަހުފޫޒް ވިދާޅުވީ އެމްޑީީގެ ފަރާތުން 96 ފަރުދެއްގެ މައްސަލަ ހުށަހަޅާފައިވާނެ ކަމަށެވެ. އެ މައްސަލަތައް ހުށަހަޅާފައިވަނީ ވަކިވަކިން ކަމަށެވެ. އަދި ބައްދަލުވުމަށް އައި އިރު މީގެ ތެރެއިން ކިހާ މައްސަލައެއް ތަހުގީގުކުރަމުންދާކަން ފުލުހުންނަށް އެ މައުލޫމާތު ސާފުކުރެވިފައި ނުވާ ކަަމަށް މަހުފޫޒް ވިދާޅުވިއެވެ.

އޭނާ ވިދާޅުވީ އެ މައްސަލަތައް ވެސް ތަހުގީގުކުރާނެކަމުގެ ޔަގީންކަން ފުލުހުން ދެއްވި ކަމަށެވެ.

މީގެ އިތުރުން މަހުފޫޒް ވިދާޅުވީ ޑިސެމްބަރު 7 ވަނަ ދުވަހު ހުށަހަޅާފައިވާ އެންސްޕާއިން އަމިއްލަ ފަރުދެއްގެ އަތުން ބޮޑު އަގުގައި އިމާރާތެއް ކުއްޔަން ހިފުމުގެ މައްސަލައިގައި މަނީ ލޯންޑަރ ކުރުމުގެ މައްސަލައެއް ހިމެނޭކަމަށް ގަބޫލުކުރެވޭތީ އެ މައްސަލަ ތަހުގީގުކޮށްދެއްވުމަށް އެދިފައިވާނެ ކަމަށެވެ.

މަހުފޫޒް ވިދާޅުވީ ބައްދަލުވުމުގައި އެ މައްސަލައާއި ގުޅޭ މައުލޫމާތެއް ފުލުހުންގެ ފަރާތުން ސާފުކޮށް ނުދެވުނު ކަމަށެވެ. އެހެންނަމަވެސް އެ މައްސަލައާއި ގުޅިގެން ފުލުހުން ބަލަންޖެހޭ ކަންކަން ބެލުމަށްފަހު އެ މައްސަލައިގައިވެސް ޖަވާބެއް ދެއްވާނެކަމަށް ފުލުހުން ވިދާޅުވި ކަމަށް މަހުފޫޒް ހާމަކުރެއްވިއެވެ.