މޮލްޑޯވާ މުބާރާތެއްގައި ރާއްޖޭގެ ލައިބާ ވާދަކުރަނީ
މޮލްޑޯވާގައި ކުރިއަށްދާ މި މުބާރާތަކީ މިއަހަރުގެ ތެރޭގައި ލައިބާ ވާދަކުރާ ބައިނަލްއަޤުވާމީ ފުރަތަމަ މުބާރާތެވެ.
ޒުވާން ބެޑްމިންޓަން ކުޅުންތެރިޔާ ލައިބާ އަޙުމަދު މަޚްލޫފް (އެލީ)
މޮލްޑޯވާ ގައި ކުރިއަށްދާ ބެޑްމިންޓަން މުބާރާތެއްގައި ވާދަކުރުމަށް، ރާއްޖޭގެ ޒުވާން ބެޑްމިންޓަން ކުުޅުންތެރިޔާ ލައިބާ އަޙުމަދު މަޚްލޫފް (އެލީ) ފުރައިފި އެވެ.
މޮލްޑޯވާގެ ވިންޓަރ ޝިސިނައު 2025 މުބާރާތުގައި ވާދަކުރުމަށް ލައިބާ ފުރާފައި ވަނީ ބުދަ ދުވަހުގެ ވަގުތެއްގަ އެވެ. މޮލްޑޯވާގެ ޝިސިނައުގައި މި މުބާރާތް ކުރިއަށް ދާނީ ހުކުރު ދުވަހުން ފެށިގެން، ހޮނިހިރު ދުވަހުގެ ނިޔަލަށެވެ. ދެ ދުވަހުގެ މުއްދަތަކަށް ކުރިއަށްދާ މި މުބާރާތުގައި 209 ކުޅުންތެރިޔަކު ވާދަކުރާނެ އެވެ. އެއީ ޔޫކްރެއިން، މޮލްޑޯވާ، ރޮމޭނިއާ، ބުލްގޭރިއާ އަދި މިޔަންމާގެ ކުޅުންތެރިންނެވެ.
ބެޑްމިންޓަން ޔޫރަޕު ކަލަންޑަރުގެ މުބާރާތްތަކުގައި ވާދަކޮށް 2023 ވަނަ އަހަރު އަދި 2024 ވަނަ އަހަރު ގައި ލައިބާ ވަނީ ޖުމްލަ 17 ބައިނަލްއަގުވާމީ މެޑަލް ހޯދައިފަ އެވެ. އެއީ ހަތަރު ރިހި މެޑަލް އަދި 13 ލޯ މެޑަލް އެވެ. މިދިޔަ އަހަރު ބޭއްވި މޯލްޑިވްސް ސްޕޯޓްސް އެވޯޑްސްގައި، ޔަންގް އެތުލީޓް އޮފް ދަ އިޔަރ ކެޓެގަރީ އިން ލައިބާ ވަނީ 11 އަހަރުގައި ބްރޯންސް މެޑަލް ހާސިލްކޮށްފަ އެވެ.
މޮލްޑޯވާ ބެޑްމިންޓަން ފެޑެރޭޝަން އިން އިންތިޒާމްކުރާ މި މުބާރާތަކީ މިއަހަރުގެ ތެރޭގައި ލައިބާ ވާދަކުރާ ބައިނަލްއަޤުވާމީ ފުރަތަމަ މުބާރާތެވެ.
